കൊച്ചി∙ നെടുമ്പാശേരി വിമാനത്താവളം വഴി കടത്താൻ ശ്രമിച്ച വന്‍ ലഹരിമരുന്നുശേഖരം പിടികൂടി. 25 കോടി വിലമതിക്കുന്ന കൊക്കെയ്നുമായി ഫിലിപ്പീൻസ് സ്വദേശിയായ യുവതിയാണ് പിടിയിലായത്. നാലേമുക്കാൽ കിലോ ലഹരിമരുന്ന് ഇവരുടെ ബാഗിൽനിന്ന് നാർക്കോട്ടിക് കൺ‍ട്രോൾ വിഭാഗം പിടികൂടി.
മസ്കത്തിൽ നിന്നെത്തിയ ജോന്നാ ദെടോറ എന്ന യുവതിയുടെ പക്കലാണ് കൊക്കെയ്ൻ കണ്ടെത്തിയത്. ലഹരിമരുന്ന് കൊച്ചിയിൽ എത്തിക്കാനാണ് ഇവർക്ക് കിട്ടിയിരുന്ന നിർദേശം എന്നറിയുന്നു. എന്നാൽ, ആർക്കാണ് ഇത് എത്തിക്കാൻ ശ്രമിച്ചതെന്ന് വ്യക്തമായിട്ടില്ല. ബ്രസീലിലെ സാവോപോളയില്‍ നിന്ന് ആഫ്രിക്കന്‍ രാജ്യങ്ങളിലൂടെ യാത്ര ചെയ്താണ് യുവതി ഇവിടെ എത്തിയത്. ലഹരികടത്തിന് മറ്റാരെങ്കിലും സഹായം ചെയ്തിട്ടുണ്ടോ എന്നതടക്കമുള്ള കാര്യങ്ങളിൽ അന്വേഷണം തുടങ്ങി. യുവതിയെ വിശദമായി ചോദ്യം ചെയ്യുകയാണ്.
×
