ഇടുക്കിയിലേക്കുള്ള ഓരോ ബൈക്ക് ട്രിപ്പും ഓരോ അനുഭവമാണ്. ഇത്തവണ മഴ പെയ്തുകഴിഞ്ഞാൽ ആനന്ദക്കണ്ണീരൊഴുക്കുന്നൊരു റോഡിലൂടെ വൺഡേ റൈഡ് ചെയ്തുവരാം. എകാന്തമായ റോഡ്, ഇടതുവശം പുഴ. വലതുവശം കുന്നിൻചെരിവും കാടും, പുഴയിലേക്കു ചേരുന്ന ഒട്ടേറെ കുഞ്ഞുവെള്ളച്ചാട്ടങ്ങൾ... രസമുള്ളൊരു വഴിയാണിത്. വൈറ്റിലയിൽ തുടങ്ങി തൃപ്പൂണിത്തുറ - കോലഞ്ചേരി- മൂവാറ്റുപുഴ- കോതമംഗലം- നേര്യമംഗലം. (ഈ റൂട്ടിലൂടെ രാവിലെ പാസ് ചെയ്യണം. എങ്കിൽ തിരക്കുകളൊക്കെ ഒഴിവാക്കാം). പിന്നെ കോതമംഗലം നേര്യമംഗലം റോഡ്. മൂന്നാറിലേക്കുള്ളതാണ് ആ പാത. നേര്യമംഗലം പാലം കയറാതെ വലത്തോട്ട് ഇടുക്കി റൂട്ടിലേക്കാണു നമുക്കു തിരിയേണ്ടത്. ഇതിലൂടെയുള്ള 33 കിലോമീറ്റർ ദൂരമാണ് നമ്മുടെ ബൈക്ക് റൈഡിന്റെ ആകർഷണം.