സാമ്പത്തിക നേട്ടം, സർവകാര്യവിജയം, വാഹനലാഭം; വിശാഖം നാളുകാർക്ക് നേട്ടങ്ങളുടെ വർഷം

ചിങ്ങമാസം – വ്യവസ്ഥകൾക്കതീതമായി പ്രവർത്തിക്കാൻ സാധിക്കും. സന്താനഭാഗ്യത്തിനു സാധ്യതയുണ്ട്. കഴിവുകൾക്കും പ്രയത്നങ്ങൾക്കും അംഗീകാരവും ഫലവും ഉണ്ടാകും. സമയോചിതമായ ഇടപെടലുകളാൽ സർവകാര്യവിജയം നേടും. അവസരങ്ങൾ പരമാവധി പ്രയോജനപ്പെടുത്തുവാൻ സാധിക്കും. 

കന്നിമാസം – സാമ്പത്തികകാര്യങ്ങളിൽ നിയന്ത്രണം വേണം. വീഴ്ചകളുണ്ടാകാതെ സൂക്ഷിക്കണം. അവിചാരിതമായി ഉദ്യോഗം നഷ്ടപ്പെടും. പരീക്ഷകളിൽ അറിവുളള വിഷയങ്ങളാണെങ്കിലും ചിലപ്പോൾ മറന്നുപോകും. മാസത്തിലൊരിക്കൽ വീട്ടിൽ വന്നുപോകാൻ തക്കവണ്ണം ഉദ്യോഗമാറ്റമുണ്ടാകും.  

തുലാമാസം – വിജയസാധ്യതകളെ വിലയിരുത്തി കർമമണ്ഡലങ്ങൾക്കു മാറ്റം വരുത്തും. വിദേശ ഉദ്യോഗത്തിനു വിരാമം വന്നു സ്വദേശത്തേക്കു മടങ്ങാനുള്ള സാധ്യത കൂടും. ഗൗരവമുള്ള വിഷയങ്ങൾ ലാഘവബുദ്ധിയോടുകൂടി ചെയ്തു തീർക്കാൻ സാധിക്കും. ആരോഗ്യം തൃപ്തികരമായിരിക്കും. വ്യാപാര–വിപണന–വിതരണമേഖലകളിൽ നിന്നു സാമ്പത്തികനേട്ടമുണ്ടാകും.  

വൃശ്ചികമാസം – ശാസ്ത്രജ്ഞർക്കും ഗവേഷകർക്കും അനുകൂലസാഹചര്യങ്ങൾ വന്നുചേരും. അവസരങ്ങൾ പ്രയോജനപ്പെടുത്തുവാൻ സാധിക്കും. വിദഗ്ധോപദേശം സ്വീകരിച്ച് പുതിയ വ്യാപാര–വ്യവസായ–വിപണന–വിതരണമേഖലകൾ തുടങ്ങും. സാമ്പത്തികസ്ഥിതി മെച്ചപ്പെടും. കഴിവുള്ളവരെ അംഗീകരിക്കാനും പ്രോത്സാഹിപ്പിക്കാനും അവസരമുണ്ടാകും.  

ധനുമാസം – കക്ഷിരാഷ്ട്രീയപ്രവർത്തനങ്ങളിൽ സജീവസാന്നിധ്യം വേണ്ടിവരും. പുതിയ വ്യാപാരവ്യവസായങ്ങൾ തുടങ്ങും. തീരുമാനങ്ങളിൽ ഔചിത്യമുണ്ടാകും. വിധിയെ കുറ്റം പറയാതെ ആത്മാർഥമായി പ്രവർത്തിക്കാൻ തയാറാകും. സാഹസപ്രവൃത്തികളിൽ നിന്നു പിന്മാറണം. ജീവിത ശൈലീരോഗങ്ങൾക്കു യോഗ, പ്രാണായാമം, പ്രകൃതിഭക്ഷണരീതി എന്നിവ ജീവിതചര്യയിൽ ഉൾപ്പെടുത്തും.  

മകരമാസം – തൃപ്തിയുള്ള വീടു വാങ്ങി താമസിച്ചുതുടങ്ങും. കുടുംബസമേതം ആരാധനാലയത്തിലെ ഉത്സവാഘോഷങ്ങളിൽ പങ്കെടുക്കും. അമിതവേഗത്തിലുളള വാഹന ഉപയോഗം അരുത്. മാതാവിന്റെ ആരോഗ്യകാര്യങ്ങളിൽ ശ്രദ്ധ വേണം. ഉദ്യോഗത്തിൽ സ്ഥാനക്കയറ്റമുണ്ടാകും. കാർഷികമേഖലകളിൽ നിന്ന് ആദായമുണ്ടാകും. ബന്ധുമിത്രാദികളുടെ ആവശ്യങ്ങൾ പരിഗണിക്കും. വ്യാപാര വിപണനമേഖലകളിൽ നിന്നു സാമ്പത്തികനേട്ടമുണ്ടാകും.  

കുംഭമാസം – വിജ്ഞാനം നേടാനും പകർന്നുകൊടുക്കുവാനും അവസരമുണ്ടാകും. പുത്രപൗത്രന്മാരുടെ സംരക്ഷണത്താൽ ആത്മാഭിമാനവും ആശ്വാസവും തോന്നും. കലാകായിക മത്സരങ്ങളിൽ വിജയിക്കും. പ്രവർത്തനമേഖലകളോടു ബന്ധപ്പെട്ട ദൂരയാത്ര വേണ്ടിവരും. വിവേചനബുദ്ധിയും അനുഭവജ്ഞാനവും പൊതുജന ആവശ്യവും പുതിയ തൊഴിൽമേഖലകളുടെ ആശയങ്ങൾക്കു വഴിയൊരുക്കും.  

മീനമാസം – ആത്മവിശ്വാസക്കുറവിനാൽ ഊഹക്കച്ചവടത്തിൽ നിന്നു പിന്മാറും. പകർച്ചവ്യാധികളും മൂത്രാശയരോഗങ്ങളും പിടിപെടാതിരിക്കാൻ കരുതൽ വേണം. ഭക്ഷ്യവിഷബാധയേൽക്കാതെ സൂക്ഷിക്കണം. വിജയപ്രതീക്ഷകളോടു കൂടി പരീക്ഷ എഴുതുവാൻ സാധിക്കും. ആഗ്രഹസാഫല്യത്തിനായി അശ്രാന്തപരിശ്രമം വേണ്ടിവരും. അവധി ലഭിച്ചതിനാൽ ജന്മനാട്ടിൽ വന്നുപോകുവാനിടവരും. 

മേടമാസം – കടം കൊടുത്ത സംഖ്യ തിരിച്ചുലഭിക്കും. വാഹനം മാറ്റിവാങ്ങാനിടവരും. ഏറ്റെടുത്ത ദൗത്യം മനസ്സംതൃപ്തിയോടു കൂടി ചെയ്തുതീർക്കാൻ സാധിക്കും. പരീക്ഷയിൽ പ്രശസ്ത വിജയം ഉണ്ടാകും. ഉദ്ദേശിച്ച വിഷയത്തിൽ ഉപരിപഠനത്തിനു ചേരാൻ സാധിക്കും. ഓർമശക്തി കൂടും. വിദ്യാർഥികൾക്കും ഗവേഷകർക്കും ശാസ്ത്രജ്ഞർക്കും അനുകൂല സമയമാണ്. 

ഇടവമാസം – പ്രതിസന്ധികൾ തരണം ചെയ്യാൻ കഠിനപ്രയത്നം വേണ്ടിവരും. ലാഭോദ്ദേശ്യപ്രവൃത്തികളിൽ അശ്രാന്തപരിശ്രമത്താൽ പകുതി അനുഭവമുണ്ടാകും. വാഹന ഉപയോഗത്തിൽ വളരെ ശ്രദ്ധിക്കണം. കാലാവസ്ഥാ വ്യതിയാനത്താൽ കൃഷിനാശം സംഭവിക്കും. വാഗ്വാദങ്ങളിൽ നിന്ന് ഒഴിഞ്ഞുമാറണം. പലവിധത്തിലുളള അസുഖങ്ങളാൽ വിദഗ്ധ പരിശോധനയ്ക്കു തയാറാകും.  

മിഥുനമാസം – ധാരാളം കാര്യങ്ങൾ നിഷ്കർഷയോടു കൂടി ചെയ്തുതീർക്കും. ഉത്സാഹവും ഉന്മേഷവും കാര്യനിർവഹണശക്തിയും കൂടും. വിജ്ഞാനപ്രദമായ ആശയങ്ങൾ പങ്കുവയ്ക്കാൻ അവസരം ഉണ്ടാകും. വ്യവസ്ഥകൾക്കതീതമായി പ്രവർത്തിക്കാൻ സാധിക്കും. പിതാവിന്റെ ആരോഗ്യകാര്യങ്ങളിൽ ശ്രദ്ധ വേണം. ധർമപ്രവൃത്തികളിലും ജീവകാരുണ്യ പ്രവർത്തനങ്ങളിലും സഹകരിക്കും.  

കർക്കടകമാസം – ആത്മാർഥമായ പ്രവർത്തനങ്ങളാൽ അധികൃതരുടെ പ്രീതി നേടാൻ കഴിയും. പ്രത്യേക വിഭാഗം കൈകാര്യം ചെയ്യാനുള്ള അധികാരം ലഭിക്കും. പുണ്യതീർഥ ദേവാലയദർശനത്തിന് അവസരമുണ്ടാകും. ആധ്യാത്മിക–ആത്മീയചിന്തകൾ മനസ്സമാധാനത്തിനു വഴിയൊരുക്കും. ശുഭാപ്തിവിശ്വാസത്തോടു കൂടിയുളള പ്രവർത്തനങ്ങൾ ലക്ഷ്യപ്രാപ്തിക്കു വഴിയൊരുക്കും. 

Content Highlights: Yearly Prediction | Vishakham | Yearly Star Prediction | Star Predictions | Malayalam Star Prediction | Manorama Star Prediction | Astrology News | Manorama Astrology | Manorama Online