ഈ ആഴ്ച ഓരോ നക്ഷത്രക്കാർക്കും എങ്ങനെ? സമ്പൂർണ നക്ഷത്രഫലം– കാണിപ്പയ്യൂർ

അശ്വതി: ഉദ്യോഗം ഉപേക്ഷിച്ച് വ്യാപാര-വ്യവസായങ്ങളിൽ ഒരു പരിധിയിലധികം പണം മുടക്കുക, സ്വന്തം ചുമതലകൾ അന്യരെ ഏൽപിക്കുക തുടങ്ങിയവ ഒരു കാരണവശാലും അരുത്. പണം കടം കൊടുക്കുന്നതും ജാമ്യം നിൽക്കുന്നതും ഒഴിവാക്കണം. 
ഭരണി: ഔദ്യോഗിക മേഖലകളിൽ പലപ്പോഴും മേലധികാരിയുടെയും കീഴ്ജീവനക്കാരുടെയും ചുമതലകൾ വഹിക്കേണ്ടതായി വരും. അശ്രദ്ധ കൊണ്ടു യന്ത്രത്തകരാർ സംഭവിക്കാൻ യോഗമുണ്ട്.
കാർത്തിക: വിനയം, ക്ഷമ, ആദരവ്, കാര്യനിർവഹണ ശക്തി തുടങ്ങിയവ സകല കാര്യ പ്രതിബന്ധങ്ങളെയും അതിജീവിക്കുവാൻ ഉപകരിക്കും. അവിചാരിത ചെലവുകളാൽ ചിലപ്പോൾ അത്യാവശ്യത്തിന് കടം വാങ്ങേണ്ടതായി വരും.
രോഹിണി: ശുഭ സൂചകങ്ങളായ പ്രവർത്തനങ്ങളിൽ ആത്മാർഥമായി പ്രവർത്തിക്കുവാൻ അവസരമുണ്ടാകും. സുഖദുഃഖങ്ങൾ ഒരുപോലെ സ്വീകരിക്കുവാനുള്ള മാനസികാവസ്ഥ വന്നുചേരും.
മകയിരം: അനന്ത സാധ്യതകളോടു കൂടിയ മേഖലകളിൽ ജോലി ചെയ്യുവാനുള്ള അവസരം വന്നുചേരും. ഏറ്റെടുത്ത ദൗത്യം പ്രവൃത്തി പഥത്തിലെത്തിക്കുവാൻ പ്രവൃത്തി പരിചയമുള്ളവരെ നിയമിക്കും.
തിരുവാതിര: അവതരണ ശൈലിയിൽ അബദ്ധമുണ്ടാകാതെ സൂക്ഷിക്കണം. നിലവിലുള്ള ഉദ്യോഗം ഉപേക്ഷിച്ചു മറ്റൊന്നിനു ശ്രമിക്കുന്നത് അഭികാമ്യമല്ല.
പുണർതം: ദമ്പതികൾക്ക് ഒരുമിച്ചു താമസിക്കുവാൻ തക്കവണ്ണം ഉദ്യോഗമാറ്റമുണ്ടാകും. ഗഹനമായ വിഷയങ്ങൾ ലളിതമായി അവതരിപ്പിക്കുവാൻ സാധിക്കും.
പൂയം: ആദരണീയരുടെ കൂട്ടത്തിൽ സ്ഥാനം ലഭിച്ചതിനാൽ ആത്മാഭിമാനം തോന്നും. പരസ്പരവിശ്വാസം നഷ്ടപ്പെട്ടതിനാൽ കൂട്ടുകച്ചവടത്തിൽ നിന്നും പിന്മാറും.
ആയില്യം: വിദ്യാർഥികൾക്കും ശാസ്ത്രജ്ഞർക്കും ഗവേഷകർക്കും അനുകൂല അവസരങ്ങളും അംഗീകാരവും ബഹുമതിയും വന്നുചേരും. ഗുരുകാരണവന്മാരുടെ വാക്കുകൾ അനുസരിക്കും.
മകം: കടം കൊടുത്ത സംഖ്യ തിരിച്ചു ലഭിക്കും. വ്യവസ്ഥകൾക്കതീതമായി ചെയ്യുന്ന കാര്യങ്ങൾക്ക് അനുമോദനങ്ങൾ വന്നുചേരും.
പൂരം: കുടുംബത്തിലെ തർക്കം പരിഹരിക്കാൻ നേതൃത്വം നൽകുന്നതു വഴി അർഹമായ സ്വത്ത് വന്നുചേരും. മക്കളുടെ സംരക്ഷണം മനഃസമാധാനത്തിനു വഴിയൊരുക്കും.
ഉത്രം: സത്യാവസ്ഥ ബോധിപ്പിക്കുന്നതിനാൽ മിഥ്യാധാരണകൾ ഒഴിവാകും. പൊതുപ്രവർത്തനങ്ങളിൽ ശോഭിക്കും.
അത്തം: അഭിമാനത്തെ ചോദ്യം ചെയ്തതിനാൽ മനോവിഷമം തോന്നുമെങ്കിലും ഉദ്യോഗമുപേക്ഷിക്കരുത്. സഹകരണ പ്രസ്ഥാനങ്ങൾക്കു സാരഥ്യസ്ഥാനം വഹിക്കുവാനിടവരുമെങ്കിലും സാമ്പത്തിക വിഭാഗത്തിൽ നിന്നും പിന്മാറുകയാണു നല്ലത്.
ചിത്തിര: അറിവുള്ള വിഷയങ്ങൾ ആവശ്യമുള്ള സമയത്ത് അവതരിപ്പിക്കുവാൻ സാധിക്കുകയില്ല. വ്യവസ്ഥകൾ പാലിക്കുവാൻ കഠിനപ്രയത്നം വേണ്ടിവരും.
ചോതി: പൊതു താൽപര്യം മാനിച്ച് വികസന പ്രവർത്തനങ്ങളിൽ ഏർപ്പെട്ട് ലക്ഷ്യപ്രാപ്തിയിലെത്തിക്കുവാൻ സാധിക്കും. ഗുരുകാരണവന്മാരുടെ അനുഗ്രഹാശിസ്സുകളോടു കൂടി ചെയ്യുന്ന പ്രവർത്തനങ്ങൾ വിജയിക്കും.
വിശാഖം: ചിന്തകൾക്കതീതമായി പ്രവർത്തിക്കുന്നതിനാൽ ആശ്വാസവും ആഹ്ലാദവും ആത്മവിശ്വാസവും ഉണ്ടാകും. മറ്റുള്ളവരുടെ ഉയർച്ചയിൽ അഭിനന്ദിക്കുന്നതു വഴി ആത്മാഭിമാനമുണ്ടാകും.
അനിഴം: സ്വത്തു തർക്കം പരിഹരിക്കാനും വിട്ടുവീഴ്ച മനോഭാവം സ്വീകരിക്കും. അർഹമായ കാര്യങ്ങൾ അനുഭവത്തോടു കൂടി പ്രാബല്യത്തിൽ വന്നുചേരും.
തൃക്കേട്ട: കാര്യകാരണ സഹിതം സമർപ്പിക്കുന്ന അപേക്ഷകർക്ക് അംഗീകാരം ലഭിക്കും. സമ്മാന പദ്ധതികളിലും നറുക്കെടുപ്പിലും വിജയിക്കും.
മൂലം: മഹദ്‌വ്യക്തികളുടെ ആശയങ്ങളും ചിന്തകളും ജീവിതത്തിൽ പകർത്തുന്നതു വഴി സൽക്കീർത്തിയും സജ്ജനപ്രീതിയും ഉണ്ടാകും. സംഭവബഹുലമായ വിഷയങ്ങളെ അഭിമുഖീകരിക്കേണ്ടതായി വരും.
പൂരാടം: സുരക്ഷിതമായ ഗൃഹത്തിലേക്കു മാറിത്താമസിക്കും. കൈവിട്ടു പോകുമെന്നു കരുതിയ വസ്തുക്കൾ തിരിച്ചു വാങ്ങുവാൻ സാധിക്കും. പ്രണയബന്ധം സഫലമാകും.
ഉത്രാടം: ചിന്താ മണ്ഡലത്തിൽ പുതിയ ആശയങ്ങൾ പലതും വന്നുചേരുമെങ്കിലും വിദഗ്ധ നിർദേശം സ്വീകരിക്കുകയാവും നല്ലത്. സൗമ്യസമീപനത്താൽ അഭിപ്രായവ്യത്യാസങ്ങൾ പരിഹരിക്കപ്പെടും.
തിരുവോണം: പുരോഗതിയില്ലാത്ത ഗൃഹം വിൽക്കുവാൻ തയാറാകും. നിർണായകമായ തീരുമാനങ്ങൾക്കു വിദഗ്ധ നിർദേശം വേണ്ടിവരും.
അവിട്ടം: അനവധി കാര്യങ്ങൾ നിശ്ചിത സമയപരിധിക്കുള്ളിൽ ചെയ്തു തീർക്കുവാൻ സാധിക്കും. പൊതുജനാവശ്യം മാനിച്ച് ഉൽപന്നങ്ങൾക്കു ഗുണനിലവാരം വർധിപ്പിക്കും.
ചതയം: ദമ്പതികൾക്ക് ഒരുമിച്ചു താമസിക്കുവാൻ തക്കവണ്ണം ഉദ്യോഗമാറ്റമുണ്ടാകും. അവസരങ്ങൾ പരമാവധി പ്രയോജനപ്പെടുത്തും.
പൂരുരുട്ടാതി: സുതാര്യവും നീതിയുക്തവുമായ സംസാരശൈലി സർവാദരങ്ങൾക്കും വഴിയൊരുക്കും. പുതിയ ഗൃഹം വാങ്ങി താമസിച്ചു തുടങ്ങും.
ഉത്തൃട്ടാതി: സഹവർത്തിത്വ ഗുണത്താൽ സദ്ചിന്തകൾ വർധിക്കും. അംഗീകാരങ്ങൾക്കു കാലതാമസമുണ്ടാകും.
രേവതി: കലാകായിക രംഗങ്ങളിൽ പരിശീലനം തുടങ്ങും. പ്രാരംഭത്തിൽ എല്ലാ കാര്യങ്ങൾക്കും തടസ്സങ്ങൾ അനുഭവപ്പെടുമെങ്കിലും അന്തിമമായി വിജയം ഉണ്ടാകും.