ഇസഹാക്കിന്റെ ‘ഹൾക്ക് കുഞ്ചാക്കോ’: അപ്പന്റെ പിറന്നാൾ ദിനത്തിൽ താരമായി ഇസ്സുവും

അപ്പയുടെ പിറന്നാള്‍ ദിനത്തിൽ അപ്പനൊപ്പം താരമായിരിക്കുകയാണ് കുഞ്ഞ് ഇസ്സു. കഴിഞ്ഞ ദിവസമായിരുന്നു കുഞ്ചാക്കോ ബോബന്റെ നാല്പത്തിയാറാം പിറന്നാൾ. കുഞ്ചാക്കോ ബോബന്റെ പിന്നാൾ കേക്കിലെ സൂപ്പർ ഹീറോയും കുട്ടിത്താരവും ശ്രദ്ധ നേടുകയാണിപ്പോൾ. ആരാധകരും സിനിമാതാരങ്ങും താരത്തിന് പിറന്നാൾ ആശംസകളുമായെത്തിയിരുന്നു. പിറന്നാൾ ദിനത്തിൽ കേക്കിൽപ്പോലും തിളങ്ങി നിന്നത് ചാക്കോച്ചന്റെ മകൻ ഇസഹാക്ക് ആയിരുന്നു. കേക്ക് ആർട്ടിസ്റ്റായ ടിന അവിര തയാറാക്കിയ ഈ സ്പെഷൽ കേക്കിൽ ഇസ്സുവിന്റ സൂപ്പർ ഹീറോയായ ഹൾക്ക് ആയാണ് ചാക്കോച്ചനെ നിർമിച്ചിരിക്കുന്നത്. ‘ഹൾക്ക് കുഞ്ചാക്കോ’യുടെ തോളിൽ കുട്ടി ഹൾക്ക് ഇസ്സുവുമുണ്ട്.

ടിന തന്റെ സമൂഹമാധ്യമ പേജിൽ പങ്കുവച്ച ചിത്രങ്ങളാണ് ഇപ്പോൾ വൈറലാകുന്നത്. ഒരു മകന്റെ ആദ്യ നായകൻ, എപ്പോഴും അവന്റെ അച്ഛനാണെന്നും  ഇസഹാക്കിന്റെ ഹൾക്ക് കുഞ്ചാക്ക്സിന് ജന്മദിനാശംസകൾ നേരുന്നുവെന്നുമാണ് ടിന ചിത്രങ്ങൾക്കൊപ്പം കുറിച്ചത്. കേക്ക് നിർമിക്കാൻ തന്നെ വിശ്വസിച്ചതിന് കുഞ്ചാക്കോയുടെ ഭാര്യ പ്രിയയ്ക്ക് നന്ദിയും പറയുകയാണ് ടിന.

Content Summary : Kunchacko Boban's son Isahak in birthday cake