‘സൈക്കിളും കൂടെ ചാടട്ടെ’; സൈക്കിളുമായി വെള്ളത്തിലേയ്ക്ക് കൊച്ചുമിടുക്കന്റെ സൂപ്പർ ഡൈവ്

അസാധാരണമായ കഴിവുകൾ പ്രകടിപ്പിക്കുന്ന കുട്ടികളുടെ വിഡിയോകൾ സമൂഹ മാധ്യമങ്ങളിൽ വൈറലാകാറുണ്ട്. ചിലതെല്ലാം ആരിലും ആശ്ചര്യം ജനിപ്പിക്കുന്ന കാഴ്ചകളാകും. അത്തരമൊരു കാഴ്ചയ്ക്ക് കഴിഞ്ഞ ദിവസം സോഷ്യൽ ലോകവും സാക്ഷിയായി. സൈക്കിൾ ചവിട്ടി ഒരു ജലാശയത്തിനു സമീപമെത്തി അതിലേക്കു മനോഹരമായി ഡൈവ് ചെയ്യുന്ന ഒരു മിടുക്കന്റെ വിഡിയോയ്ക്കാണ് സമൂഹ മാധ്യമങ്ങളിൽ കയ്യടികൾ ഉയരുന്നത്. അത്​ഭുതത്താൽ കാണുന്നവരുടെ വാ തുറപ്പിക്കുന്ന ഈ പ്രകടനത്തെ ''തീ''യുടെ ഇമോജി നൽകിയാണ് നെറ്റിസൺസ് സ്വീകരിച്ചിരിക്കുന്നത്. 

വേഗത്തിൽ സൈക്കിൾ ചവിട്ടി വരുന്ന കുട്ടിയാണ് ഈ വിഡിയോയിലെ ''ഹീറോ''. കാഴ്ചക്കാരെ എല്ലാം അമ്പരിപ്പിച്ചു കൊണ്ട് അതേ വേഗത്തിൽ തന്നെ സൈക്കിളിനൊപ്പം ജലാശയത്തിലേക്കു ഡൈവ് ചെയ്യുകയാണ് ആ കൊച്ചുമിടുക്കൻ. അസാധ്യമായ മെയ്‌വഴക്കവും അതിനൊപ്പം തന്നെ മനോഹരവുമാണ് ആ കാഴ്ച. സൈക്കിൾ ചവിട്ടിയെത്തിയതിനാൽ ഡൈവ് ചെയ്യുന്ന പോസിൽ യാതൊരു തരത്തിലുള്ള കോട്ടവുമില്ലായെന്നു മാത്രമല്ല, അതിസുന്ദരവുമാണ്. 

വളരെ വേഗത്തിലാണ് ഈ വിഡിയോ സോഷ്യൽ ലോകത്തിന്റെ ഹൃദയം കവർന്നത്. ചുരുങ്ങിയ സമയം കൊണ്ടുതന്നെ 5.2 മില്യൺ കാഴ്ചക്കാരെ സ്വന്തമാക്കാൻ ഈ ദൃശ്യങ്ങൾക്ക് കഴിഞ്ഞു. അവന്റെ ആ  മനോഹരമായ സ്റ്റണ്ടിനു തീയുടെയും ഹൃദയത്തിന്റെയും ഇമോജികളാണ് കൂടുതൽ പേരും കമന്റുകളായി കുറിച്ചിരിക്കുന്നത്. ആ സൈക്കിൾ കുളത്തിൽ നിന്നുമെടുക്കുന്നില്ലേ എന്നും സൈക്കിൾ മുങ്ങി മരിച്ചു എന്നുമൊക്കെയുള്ള രസകരമായ ചെറുകുറിപ്പുകളും വിഡിയോയുടെ താഴെയുണ്ട്. ഈ സൈക്കിൾ സ്റ്റണ്ട് ശ്രദ്ധയിൽപ്പെട്ട സിനിമാപ്രവർത്തകർ ആ മിടുക്കന് സിനിമയിൽ അവസരം നൽകാമെന്നുള്ള ഓഫറുകളും മുന്നോട്ടു വെച്ചിട്ടുണ്ട്.