സൗരരഹസ്യങ്ങള്‍‍ തേടി ആദിത്യ; സൂര്യനെ കുറിച്ച് പഠിക്കാൻ ഇന്ത്യയുടെ ആദ്യ ബഹിരാകാശ നിരീക്ഷണ ദൗത്യം

പേ ലോഡുകൾ 
പ്രധാനമായും 7 നിരീക്ഷണ ഉപകരണങ്ങളാണ്  ആദിത്യയിലുള്ളത് (244 കിലോഗ്രാം ആണ് പേലോഡിന്റെ ഭാരം). അവയിൽ നാലെണ്ണം വിദൂര സംവേദന (Remote sensing) ഉപകരണങ്ങളാണ്. ബാക്കി 3 എണ്ണം in situ (ഉപഗ്രഹ പരിസരങ്ങളെയും അവിടത്തെ പദാർഥങ്ങളെയും അവിടെ തന്നെ പരീക്ഷണനിരീക്ഷണ വിധേയമാക്കുന്ന രീതി) പരീക്ഷണത്തിനായുള്ളതും.

വിസിബിൾ എമിഷൻ ലൈൻ കൊറോണഗ്രാഫ് (VELC) സോളർ കൊറോണയെയും കൊറോണൽ മാസ് ഇജക്‌ഷനുകളുടെ ചലനാത്മകതയെയും കുറിച്ച് പഠിക്കുന്നു. സൂര്യന്റെ ചിത്രങ്ങൾ പകർത്താനും സൗരവികിരണ വ്യതിയാനങ്ങളും അളക്കാനും സോളർ അൾട്രാ-വയലറ്റ് ഇമേജിങ് ടെലിസ്‌കോപ്പ് (SUIT ) ഉപയോഗിക്കും. ആദിത്യ സോളർ വിൻഡ് പാർട്ടിക്കിൾ എക്സ്പെരിമെന്റ് (ASPEX), പ്ലാസ്മ അനലൈസർ പാക്കേജ് ഫോർ ആദിത്യ (PAPA) എന്നിവ സൗരവാതത്തെയും അയോണുകളെയും അവയുടെ ഊർജ വിതരണത്തെയുംപറ്റി പഠിക്കുന്നു. സോളർ ലോ എനർജി എക്സ്-റേ സ്പെക്ട്രോമീറ്ററും (SoLEXS) ഹൈ എനർജി L1 ഓർബിറ്റിങ്  എക്സ്-റേ സ്പെക്ട്രോമീറ്ററും (HEL1OS)  സൂര്യനിൽ നിന്നുള്ള എക്സ്-കിരണങ്ങളെപറ്റി പഠിക്കുന്നു. മാഗ്‌നെറ്റോമീറ്ററിന്  (Advanced Tri-axial High Resolution Digital Magnetometers)  L1 പോയിന്റിൽ ഗ്രഹാന്തര കാന്തികക്ഷേത്രങ്ങൾ അളക്കാൻ കഴിയും. ഇവയിൽ പലതും സൂര്യനെ നിരീക്ഷിക്കാൻ ഇതുവരെയും പരീക്ഷിക്കാത്ത സംവിധാനങ്ങളാണ്. ഈ ശാസ്ത്ര ഉപകരണങ്ങളെല്ലാം രാജ്യത്തെ വിവിധ ലബോറട്ടറികളിൽ തദ്ദേശീയമായി വികസിപ്പിച്ചതാണ്. തിരുവനന്തപുരത്തെ വിക്രം സാരാഭായ് സ്പേസ് സെന്ററിലെ സ്പേസ് ഫിസിക്സ് ലബോറട്ടറിയിലാണ് PAPA വികസിപ്പിച്ചത്.  

ആദിത്യയുടെ യാത്ര 
ശ്രീഹരിക്കോട്ടയിലെ സതീഷ് ധവാൻ സ്‌പേസ് സെന്ററിൽ (SDSC- SHAR) നിന്ന്  PSLV -C57 റോക്കറ്റിലാണ് ആദിത്യ-എൽ1 ദൗത്യം വിക്ഷേപിക്കുന്നത്. പ്രാരംഭഘട്ടത്തിൽ ഭൂമിയുടെ താഴ്ന്ന ഭ്രമണപഥത്തിലായിരിക്കും പേടകത്തെ നിലനിർത്തുക. തുടർന്ന്, ഭ്രമണപഥം കൂടുതൽ ദീർഘവൃത്താകൃതിയിലാക്കുകയും പിന്നീട് ഓൺ-ബോർഡ് പ്രൊപ്പൽഷൻ ഉപയോഗിച്ച് പേടകം ലഗ്രാഞ്ച്യൻ പോയിന്റ് L1-ലേക്ക് നീക്കുകയും ചെയ്യും. അപ്പോൾ അത് ഭൂമിയുടെ ഗുരുത്വാകർഷണ സ്വാധീന മേഖലയായ സ്ഫിയർ ഓഫ് ഇൻഫ്ലുവൻസിൽ നിന്ന് (SOI) പുറത്തുകടക്കും. അതിന് ശേഷം, ക്രൂയിസ് ഘട്ടം ആരംഭിക്കുകയും പിന്നീട് L1ന് ചുറ്റുമുള്ള ഒരു വലിയ ഹാലോ ഭ്രമണപഥത്തിലേക്ക് (Halo orbit) പേടകത്തെ മാറ്റുകയും ചെയ്യും. വിക്ഷേപണം മുതൽ  L1ൽ എത്തുന്നതിനുമിടയിൽ  ഏകദേശം 4 മാസം സമയം ഉണ്ടാകും.

എന്തുകൊണ്ട്   L1 
ഭൂമിയെപ്പോലെ തന്നെ  ആദിത്യയും 365 ദിവസം കൊണ്ടാകും സൂര്യനെ ചുറ്റി വരിക. ഇതാണ് L1 പ്രദേശത്ത് അതിനെ എത്തിക്കുന്നത് കൊണ്ടുണ്ടാവുന്ന ഒരു ഗുണം. ആദിത്യ ഒരിക്കലും ഭൂമിയുടെയോ ചന്ദ്രന്റെയോ നിഴലിലേക്ക് പോവില്ല. ഗ്രഹണവും ബാധിക്കില്ല. അതിനാൽ 365 ദിവസവും രാപകലില്ലാതെ സൂര്യനെ നിരീക്ഷിച്ചു കൊണ്ടിരിക്കാം. 5 വർഷമാണ് ദൗത്യകാലാവധി.

ആദിത്യ എൽ1ന്റെ  റൂട്ട് മാപ് ഇങ്ങനെ! 
ലഗ്രാഞ്ച്യൻ പോയിന്റുകൾ- സൂര്യനെയും ഭൂമിയെയും പോലെ  ഗുരുത്വാകർഷണത്തിൽ അധിഷ്ഠിതമായ രണ്ട് ആകാശഗോളങ്ങളുടെ ആകർഷണ -വികർഷണ പരിധിയിൽ കൃത്രിമ ഉപഗ്രഹം പോലുള്ള  ഒരു വസ്തുവിന്  ഇന്ധന ഉപഭോഗം കുറച്ച് ഒരേപാതയിൽ സന്തുലിതമായി തുടരാൻ സാധിക്കുന്ന സവിശേഷ ഇടങ്ങളാണ് ലഗ്രാഞ്ച് പോയിന്റുകൾ. രണ്ട് ഗോളങ്ങളുടെയും ഗുരുത്വാകർഷണബലം ആ ബിന്ദുക്കളിൽ സമതുലിതമായതിനാലാണ് ഇതു സാധിക്കുന്നത്. 

ഇറ്റാലിയൻ- ഫ്രഞ്ച് ഗണിതശാസ്ത്രജ്ഞനായ ജോസഫ് ലൂയി ലഗ്രാഞ്ചിന്റെ ബഹുമാനാർഥം  പേര് നൽകിയിരിക്കുന്നു. L1, L2, L3, L4, L5 എന്നിങ്ങനെ അഞ്ച് ലഗ്രാഞ്ച്യൻ പോയിന്റുകൾ ആണുള്ളത്. ഉദാഹരണത്തിന് ഡീപ് സ്‌പേസ് ക്ലൈമറ്റ് ഒബ്‌സർവേറ്ററി (DSCOVR), Solar and Heliospheric Observatory  (SOHO) തുടങ്ങിയവ L1ൽ സ്ഥിതി ചെയ്യുന്നു. ജയിംസ് വെബ് ബഹിരാകാശ ദൂരദർശിനി  L2 ലാണ് സ്ഥിതി ചെയ്യുന്നത് .

ആദിത്യ -L1 
സൂര്യനെ കുറിച്ച് പഠിക്കുന്ന ഇന്ത്യയുടെ ആദ്യത്തെ ബഹിരാകാശ നിരീക്ഷണ  ദൗത്യമാണ് ആദിത്യ എൽ1. ഭൂമിയിൽ നിന്ന്  15 ലക്ഷം കിലോമീറ്റർ  അകലെയുള്ള സൗര -  ഭൗമ ലഗ്രാഞ്ച്യൻ  പോയിന്റ് 1 (L1) ന്  ചുറ്റുമുള്ള ഒരു ഹാലോ  ഭ്രമണപഥത്തിൽ പേടകത്തെ എത്തിക്കാനാണ് പദ്ധതി.

ലക്ഷ്യങ്ങൾ-പ്രത്യേകതകൾ 
∙ കൊറോണൽ ഹീറ്റിങ്ങും സോളർ വിൻഡ് ആക്സിലറേഷനും (സൗര വാത ഗതിവേഗം) മനസ്സിലാക്കുക. 

∙ കൊറോണൽ മാസ് ഇജക്‌ഷന്റെ ആരംഭം മനസ്സിലാക്കൽ(CME)

∙ സൗര ജ്വാലയെയും ഭൂമിയോടടുത്ത  ബഹിരാകാശ കാലാവസ്ഥയും പഠിക്കൽ

∙ സൗരാന്തരീക്ഷത്തിന്റെ  ചലനാത്മകതയും ഘടനയും മനസ്സിലാക്കൽ 

∙ സൗരവാത വിതരണവും താപനിലയിൽ ഉള്ള വ്യതിയാനങ്ങളും മനസ്സിലാക്കൽ

Content Highlight - Aditya-L1 solar mission | Indian Space Research Organization | Solar flares and solar storms | Study of the Sun's corona and chromosphere | Lagrangian point L1 orbit