കുട്ടികളിലെ അമിതവണ്ണം നിസാരമായി കാണരുതേ; പ്രശ്നങ്ങൾ നിരവധി

കുട്ടികളിലെ അമിതവണ്ണം 21-ാം നൂറ്റാണ്ടിലെ ​വെല്ലുവിളികളിൽ ഒന്നായി മാറിയിരിക്കുകയാണ്. ലോകത്ത് 5 വയസ്സിൽ താഴെയുള്ള 41 മില്യൻ കുട്ടികൾ അമിതവണ്ണമുള്ളവരാണെന്നാണ് ലോക ആരോ​ഗ്യ സംഘടനയുടെ കണക്ക്. ഈ അമിതവണ്ണം കുട്ടികൾ വളരുമ്പോൾ ​തുടരുന്നു. ഇത് പിന്നീട് ​ഗുരുതര ആരോ​ഗ്യ പ്രശ്നങ്ങൾക്കും കാരണമാകുന്നു. ജീവിതത്തിന്റെ നിലവാരം താഴുക, സാമൂഹികമായ പ്രത്യാഘാതങ്ങൾ, മാനസികമായ നിലയെ ബാധിക്കാനുള്ള സാധ്യത എന്നിങ്ങനെ പ്രശ്നങ്ങൾ സങ്കീർണമാണ്. അതിനാൽ അമിതവണ്ണത്തെ മാതാപിതാക്കൾ ​ഗൗരവമായി എടുക്കേണ്ടതുണ്ട്. 

നിശ്ചിത പ്രായത്തിൽ ഉയരത്തിലും ആവശ്യമായതിലും അധികം ഭാരം ശരീരത്തിനുണ്ടാവുകയും ഇത് കുട്ടിയുടെ ആരോ​ഗ്യത്തെയും ക്ഷേമത്തെയും ദോഷകരമായി ബാധിക്കുകയും ചെയ്യുമ്പോഴാണ് അമിത വണ്ണം എന്നു പറയാനാവുക. പല കാരണങ്ങൽ കൊണ്ട് അമിത വണ്ണമുണ്ടാകാം. ജനിതക കാരണങ്ങളും ശാരീരിക ശാരീരിക പ്രവർത്തനങ്ങളുടെ അഭാവവുമാണ് പ്രധാന കാരണങ്ങൾ. ഫാസ്റ്റ്ഫുഡുകളുടെ സ്വീകാര്യത, ടെലിവിഷനും മൊബൈലിനും ചെലവഴിക്കുന്ന സമയത്തിന്റെ വർധനവ്, കളിക്കാനുള്ള ​ഗ്രൗണ്ടുകളുടെ ലഭ്യതക്കുറവ് എന്നിവയും ഇതിനെല്ലാം വഴിവയ്ക്കുന്നു. 

ടൈപ്പ് 2 പ്രമഹം, കൊളസ്ട്രോൾ, രക്ത സമ്മർദം, ഹൃദയസംബന്ധമായ അസുഖങ്ങൾ, ലിവർ പ്രശ്നങ്ങൾ, മസിലുകളുടെയും എല്ലുകളുടെയും ബലക്കുറവ്, ആസ്മ പോലുള്ള ശ്വാസപ്രശ്നങ്ങൾ, ഉറക്കക്കുറവ്, ആത്മവിശ്വാസക്കുറവ് ഉൾപ്പെടയുള്ള മാനസിക പ്രശ്നങ്ങൾ എന്നിവയും അമിതവണ്ണം മൂലമുണ്ടാകുന്നു. 

ഭക്ഷണരീതിയിൽ മതിയായ ശ്രദ്ധ നൽകുകയാണ് അമിതവണ്ണം നിയന്ത്രിക്കാനുള്ള ആദ്യ വഴി. പഞ്ചസാരയുടെ ഉപയോ​ഗം കുറയ്ക്കുകയാണ് ഇതിൽ പ്രധാനം. പഴങ്ങളും പച്ചക്കറികളും ധാന്യങ്ങളും നട്സും ഉൾപ്പെടുത്താം. ദിവസവും കളിക്കാനോ, വ്യായാമം ചെയ്യാനോ അവരെ നിർബന്ധിക്കാം. ടിവി, കമ്പ്യൂട്ടർ എന്നിവ ഉപയോ​ഗിക്കാൻ ഒരു നിശ്ചിത സമയം മാത്രം അനുവദിക്കുക. ശരിയായ ഉറക്കം അവർക്ക് ലഭിക്കുന്നുണ്ടെന്ന് ഉറപ്പക്കുക. ആരോ​ഗ്യപരമായ കാര്യങ്ങൾ, ആഹാരരീതികൾ എന്നിവയിൽ കൃത്യമായ അവബോധം മക്കൾക്ക് പകർന്നു നൽകാനും മാതാപിതാക്കൾ മടിക്കരുത്. പ്രശ്നം ​ഗുരുതരമാണെന്നു തോന്നിയാൽ ആരോ​ഗ്യ വിദ​ഗ്ധരുടെ സേവനം തേടാനും മടിക്കരുത്. 

Content Summary : Childhood obesity: causes and consequences