ഏറ്റവും ആഴമുള്ള മലയിടുക്ക്; അതിൽ മറഞ്ഞിരിക്കുന്ന ഏഷ്യയിലെ ഏറ്റവും പൊക്കമുള്ള മരം

ലോകത്തിലെ ഏറ്റവും ആഴവും വലുപ്പവുമുള്ള മലയിടുക്കാണ് തിബറ്റിലുള്ള യാർലങ് സാങ്പോ . ഏറ്റവും ആഴമുള്ള ഭാഗത്ത് താഴെ മുതൽ മുകളിൽ വരെ 20000 അടിയാണ് ഇതിനു പൊക്കമുള്ളത്. യുഎസിലെ അതിപ്രശസ്ത മലയിടുക്കായ ഗ്രാൻഡ് കാന്യണെക്കാൾ നീളമുള്ളതും അതിനെക്കാൾ 3 മടങ്ങ് ആഴമുള്ളതുമാണ് യാർലങ് സാങ്പോ.

നദികളിലെ എവറസ്റ്റ് എന്നറിയപ്പെടുന്ന യാർലങ് സാങ്പോ നദിയിൽ നിന്നാണ് ഈ പേര് ഈ മലയിടുക്കിന് ലഭിച്ചത്. വളരെ ദുർഘടമായ സഞ്ചാരഗതിയുള്ള നദിയാണ് ഇത്. ഈ നദി പിന്നീട് ബ്രഹ്മപുത്രയിൽ ലയിക്കും. യാർലങ് സാങ്പോ മലയിടുക്ക് വളരെ കാഠിന്യമേറിയതും പര്യവേക്ഷണങ്ങൾ വളരെക്കുറച്ചുമാത്രം നടക്കുന്നതുമായ മേഖലയാണ്. നാംച ബർവ, ഗ്യാല പേരി എന്നിങ്ങനെ രണ്ട് ഉയർന്ന പർവതങ്ങൾക്കിടയിലാണ് ഈ മലയിടുക്ക്.

ഈ വിശേഷങ്ങളെല്ലാം ഉള്ളപ്പോൾ തന്നെ മറ്റൊരു പ്രത്യേകതയും യാർലങ് സാങ്പോ മലയിടുക്കിനുണ്ട്. ഏഷ്യയിൽ ഇതുവരെ കണ്ടെത്തപ്പെട്ടിട്ടുള്ളതിൽ ഏറ്റവും പൊക്കമുള്ള മരം സ്ഥിതി ചെയ്യുന്നത് ഇവിടെയാണ്. 335 അടി പൊക്കമുള്ള ഒരു സൈപ്രസ് മരമാണ് ഇത്.യുഎസിലെ സ്റ്റാച്യൂ ഓഫ് ലിബർട്ടി പ്രതിമയേക്കാ‍ൾ പൊക്കമുള്ളതാണ് ഈ മരം.