എറണാകുളം ജില്ലയിൽ ഇന്ന് (23-11-2024); അറിയാൻ, ഓർക്കാൻ

ഗതാഗതം  നിരോധിക്കും
പറവൂർ ∙ പെരുവാരം – ചേന്ദമംഗലം റോഡിൽ ചേന്ദമംഗലം കവലയിൽ 25ന് കലുങ്ക് നിർമാണം തുടങ്ങുന്നതിനാൽ കവലയിൽ നിന്നു ചേന്ദമംഗലം, കരിമ്പാടം ഭാഗത്തേക്കുള്ള ഗതാഗതം പൂർണമായി നിരോധിക്കും.  അവിടേക്ക് പോകുന്ന വാഹനങ്ങൾ വെടിമറ കവലയിൽ നിന്നു ഫയർസ്റ്റേഷൻ റോഡ് വഴി പോകണമെന്ന് പൊതുമരാമത്ത് റോഡ് വിഭാഗം അസിസ്റ്റന്റ് എൻജിനീയർ അറിയിച്ചു.

നേതൃത്വ പരിശീലന  ക്യാംപ് നാളെ
ആരക്കുന്നം ∙ സെന്റ് ജോർജ് യാക്കോബായ വലിയപള്ളിയിൽ കുടുംബയൂണിറ്റ് സെൻട്രൽ കമ്മിറ്റിയുടെ നേതൃത്വത്തിൽ നാളെ നേതൃത്വ പരിശീലന ക്യാംപ് നടത്തും. വൈകിട്ട് 4 മുതൽ 6 വരെ നടക്കുന്ന ക്യാംപ് ഫാ.എബി വർക്കി നയിക്കും.

ശുദ്ധജല വിതരണം മുടങ്ങും
കളമശേരി ∙ യൂണിവേഴ്സിറ്റി പമ്പ്ഹൗസിലെ ജലസംഭരണികൾ വൃത്തിയാക്കുന്നതിനും ട്രാൻസ്ഫോമറുകളുടെ അറ്റകുറ്റപ്പണികൾ നടത്തുന്നതിനുമുള്ള ജോലികൾ നടത്തുന്നതിനാൽ 26ന് രാവിലെ 7 മുതൽ വൈകിട്ട് 8 വരെ കളമശേരി, തൃക്കാക്കര നഗരസഭകളിൽ ശുദ്ധജല വിതരണം മുടങ്ങും.
പള്ളുരുത്തി∙ പള്ളുരുത്തിയിലെ പമ്പ് ഹൗസിൽ പുതിയ പമ്പും മെയിൻ പാനലും സ്ഥാപിക്കുന്നതിനാൽ ഇവിടെ നിന്ന് ജല വിതരണം നടത്തുന്ന നഗരസഭയുടെ 13 മുതൽ 21 വരെയുള്ള ഡിവിഷനുകളിൽ 26, 27 തീയതികളിൽ പൂർണമായും ജല വിതരണം തടസ്സപ്പെടും.

ലാപ്ടോപ് നൽകും
മട്ടാഞ്ചേരി ∙ കെ.ജെ.മാക്സി എംഎൽഎയുടെ പ്രത്യേക വികസന ഫണ്ട് ഉപയോഗിച്ച് കൊച്ചി മണ്ഡലത്തിലെ 20 വിദ്യാലയങ്ങൾക്ക് 81 ലാപ്ടോപ്പുകൾ, 4  പ്രൊജക്ടറുകൾ, സ്കാനർ എന്നിവ നൽകും. ഇവയുടെ വിതരണ ഉദ്ഘാടനം 25ന് രാവിലെ 10ന് തോപ്പുംപടി ഔവർ ലേഡീസ് കോൺവന്റ് ഗേൾസ് ഹൈസ്കൂളിൽ സംസ്ഥാന സർക്കാരിന്റെ ഡൽഹിയിലെ പ്രത്യേക പ്രതിനിധി കെ.വി.തോമസ് നിർവഹിക്കും. കെ.ജെ.മാക്സി എംഎൽഎ അധ്യക്ഷത വഹിക്കും.

കലൂർ മോഡൽ ടെക്നിക്കൽ എച്ച്എസ്എസ്
കൊച്ചി ∙ കലൂർ മോഡൽ ടെക്നിക്കൽ എച്ച്എസ്എസി‍ൽ കെമിസ്ട്രി അധ്യാപക ഒഴിവ്. കൂടിക്കാഴ്ച 26നു 10ന്. 0484 2347132.
കൂവപ്പടി ഗവ.  എൽപിഎസ് 
പെരുമ്പാവൂർ ∙കൂവപ്പടി ഗവ. എൽപി സ്കൂളിൽ എൽപിഎസ്ടി ഒഴിവ്. കൂടിക്കാഴ്ച 27ന് 11ന്. 9447513282