പരിശോധിച്ചത് 3000 വാഹനങ്ങൾ; 93 ഡ്രൈവർമാർക്കെതിരെ നടപടി; ഇനിയും തുടരും പരിശോധന

ആലുവ∙ റൂറൽ ജില്ലയിൽ പൊലീസ് നടത്തിയ കോമ്പിങ്ങിൽ കണ്ടെത്തിയത് 855 ഗതാഗത നിയമ ലംഘനങ്ങൾ. മദ്യപിച്ചു വാഹനമോടിച്ചതിനു 194 പേർ പിടിയിലായി. ഇവരിൽ 26 പേർ ഭാരവാഹനങ്ങൾ ഓടിച്ചവരാണ്. അമിതവേഗത്തിൽ വാഹനമോടിച്ച 37 ഡ്രൈവർമാരെയും അപകടകരമായി വാഹനമോടിച്ച 87 പേരെയും പിടികൂടി. ഇവരിൽ 13 പേർ ഭാരവാഹനങ്ങൾ ഓടിച്ചവരാണ്. അനധികൃത പാർക്കിങ്ങിനു 383 പേർക്കെതിരെ നടപടി സ്വീകരിച്ചു. ഇതിൽ 255 എണ്ണം വലിയ വാഹനങ്ങളാണ്.

ലൈൻ ട്രാഫിക് നിയമങ്ങൾ ലംഘിച്ച 93 ഡ്രൈവർമാർക്കെതിരെ നടപടി എടുത്തു. ഡ്രൈവിങ് ലൈസൻസില്ലാതെ വാഹനമോടിച്ച 24 പേർ പിടിയിലായി. അമിതഭാരം കയറ്റിയ 35 വാഹനം കസ്റ്റഡിയിലെടുത്തു. ആലുവ, മുനമ്പം, പെരുമ്പാവൂർ, മൂവാറ്റുപുഴ, പുത്തൻകുരിശ് മേഖല തിരിച്ചാണ് പരിശോധന നടത്തിയത്. മൂവായിരത്തിലേറെ വാഹനങ്ങൾ ഒറ്റ ദിവസം പരിശോധിച്ചതായി എസ്പി വൈഭവ് സക്സേന അറിയിച്ചു.