കുമ്പളങ്ങി ഫെറി–തുറവൂർ റോഡിൽ പാതാളക്കുഴികൾ

അരൂർ∙ കുമ്പളങ്ങി ഫെറി–തുറവൂർ റോഡിലൂടെയുള്ള യാത്ര അപകടകരം. തുറവൂരിൽ നിന്നു തുടങ്ങി കുമ്പളങ്ങി ഫെറിവരെയുള്ള ഇടങ്ങളിൽ ഒട്ടേറെ പാതാളക്കുഴികളാണ് രൂപപ്പെട്ടിരിക്കുന്നത്. ചിലയിടങ്ങളിൽ കുഴികളിൽ വാഹനങ്ങൾ വീണ് ആക്സിൽ ഒടിഞ്ഞ് ഗതാഗതക്കുരുക്കും വാഹനങ്ങൾക്ക് സാമ്പത്തിക നഷ്ടവും നേരിടുന്നു. അരൂർ–തുറവൂർ ഉയരപ്പാത നിർമാണവുമായി ബന്ധപ്പെട്ട് ഗതാഗതക്കുരുക്ക് കാരണം ചെറുവാഹനങ്ങൾ പോകുന്നത് തുറവൂർ ജംക്‌ഷനിൽ നിന്നു ടിഡി റോഡ് വഴിയാണ്.

തുറവൂർ ജംക്‌ഷന് പടിഞ്ഞാറു ഭാഗത്തുള്ള വളവിൽ രൂപപ്പെട്ട കുഴിയിൽക്കൂടിയുള്ള യാത്രയാണ് ആരംഭം. റെയിൽവേ ഗേറ്റ്, നാലുകുളങ്ങര, പറയകാട്, വല്ലേത്തോട്, കരുമാഞ്ചേരി, പിഎസ്‌കവല, വാടക്കകം, എഴുപുന്ന കുമ്പളങ്ങി പാലത്തിന്റെ അപ്രോച്ച് റോഡിലുമാണ് എണ്ണിയാൽ തീരാത്ത കുഴികൾ രൂപപ്പെട്ടത്.പല സ്ഥലങ്ങളിലും കുഴികളിൽ പെയ്ത്തുവെള്ളം നിറഞ്ഞു കിടക്കുന്നതിനാൽ കുഴികളുടെ ആഴമെന്തന്ന് അറിയാതെ വാഹനങ്ങൾ കുഴികളിൽ അകപ്പെടുന്നുണ്ട്. 

സാധാരണ മഴ സമയങ്ങളിൽ കുഴികൾ നിറയുകയും പൊതുമരാമത്ത് വകുപ്പിന്റെ നേതൃത്വത്തിൽ അറ്റകുറ്റപ്പണി നടത്തുകയുമായിരുന്നു മുൻകാലങ്ങളിൽ ചെയ്തിരുന്നത്. എന്നാൽ 2 വർഷമായി ഉയരപ്പാത നിർമാണം തുടങ്ങിയതിനു ശേഷം. ഉയരപ്പാത കരാറുകാരെ കൊണ്ട് കുഴികളടപ്പിക്കുകയാണ് ചെയ്യുന്നത്. ഇവർ കോൺക്രീറ്റ് മിശ്രിതം ഉപയോഗിച്ച് കുഴികളടച്ചു പോകുന്നതിന് പിന്നാലെ വാഹനങ്ങൾ കയറിയിറങ്ങുമ്പോൾ കോൺക്രീറ്റ് ചെയ്തഭാഗത്ത് മുഴകൾ രൂപപ്പെടുകയും വാഹനങ്ങൾ അപകടത്തിൽപ്പെടാനും കാരണമാകുന്നു. അടിയന്തരമായി റോഡ് പുനർ നിർമിക്കണമെന്നാണ് യാത്രക്കാരുടെ ആവശ്യം