കണ്ണൂർ കന്റോൺമെന്റ് ഇല്ലാതാകും; കടുത്ത നിയന്ത്രണങ്ങ‌ൾ നീങ്ങും, സാധാരണക്കാർക്കു ഗുണകരം

കണ്ണൂർ ∙ കന്റോൺമെന്റുകളെ സൈനിക താവളങ്ങളാക്കി മാറ്റാനും ഈ മേഖലയിലെ സാധാരണക്കാരെ കന്റോൺമെന്റ് ബോർഡിനു പകരം തൊട്ടടുത്ത തദ്ദേശ സ്ഥാപനത്തിനു കീഴിൽ ഉൾപ്പെടുത്താനുമുള്ള നീക്കം സാധാരണക്കാർക്കു ഗുണകരമാകുമെന്നു പ്രതീക്ഷ. നിലവിൽ ജനാധിപത്യ അവകാശങ്ങളെല്ലാം നിഷേധിക്കപ്പെട്ട നിലയിലാണ് കന്റോൺമെന്റ് പ്രദേശത്തെ ജനജീവിതം. കേന്ദ്ര–സംസ്ഥാന സർക്കാരുകൾ പ്രഖ്യാപിക്കുന്ന പല പദ്ധതികളുടെയും ഗുണഫലം ഇവർക്കു ലഭിക്കുന്നില്ല. 

കെട്ടിട നിർമാണത്തിനുള്ള കടുത്ത നിയന്ത്രണങ്ങൾ കാരണം പുതിയ വീട് നിർമിക്കാനോ നിലവിലുള്ളവ അറ്റകുറ്റപ്പണി നടത്താനോ പോലും സാധിക്കാത്ത സ്ഥിതിയുമുണ്ടായിരുന്നു. നിലവിലെ കെട്ടിടങ്ങൾക്ക് 30 ശതമാനം വരെ നികുതി വർധിപ്പിച്ചതും ജനത്തിനു ദുരിതമായി. കന്റോൺമെന്റ് പരിധിക്കകത്തു സാധാരണ ജനങ്ങൾ താമസിക്കുന്ന ഭാഗത്തേക്കുള്ള റോഡ് ടാർ ചെയ്യാനും വികസിപ്പിക്കാനും രാമചന്ദ്രൻ കടന്നപ്പള്ളി എംഎൽഎയുടെ ഫണ്ടിൽ നിന്നു തുക അനുവദിക്കാമെന്ന് അറിയിച്ചിട്ടും കന്റോൺമെന്റ് അനുമതി നൽകിയിരുന്നില്ല.

സൈനിക താവളമാക്കി മാറ്റുന്നതോടെ സാധാരണക്കാർ താമസിക്കുന്ന ഇടങ്ങൾ കോർപറേഷൻ പരിധിയിലേക്കു മാറും. കന്റോൺമെന്റ് ബോർഡ് ഭരണം അവസാനിക്കുകയും ചെയ്യും. കേന്ദ്ര പ്രതിരോധ മന്ത്രാലയം പുറപ്പെടുവിച്ച ഉത്തരവ് പ്രകാരം ഹിമാചലിലെ യോൽ കന്റോൺമെന്റാണ് ആദ്യം ഇല്ലാതാവുക. 

കേരളത്തിലെ ഏക കന്റോൺമെന്റ്

രാജ്യത്തെ 64 കന്റോൺമെന്റുകളെയും സേനാത്താവളങ്ങളാക്കി മാറ്റാനുള്ള കേന്ദ്ര സർക്കാർ തീരുമാനം നടപ്പാവുന്നതോടെ കണ്ണൂർ കന്റോൺമെന്റും ഇല്ലാതാകും. 1938ൽ ബ്രിട്ടിഷ് കാലഘട്ടത്തിലാണു കണ്ണൂർ കന്റോൺമെന്റ് രൂപീകരിച്ചത്. 500 ഏക്കറോളം ഭാഗത്ത് 400 ഏക്കറോളം സേനാസന്നാഹങ്ങളും സേനാംഗങ്ങളും കുടുംബാംഗങ്ങളുമാണു താമസിക്കുന്നത്. 100 ഏക്കറോളം ഭാഗത്താണു സാധാരണ ജനങ്ങൾ താമസിക്കുന്നത്.

കന്റോൺമെന്റ് ബോർഡിനാണ് ഇവിടെ പ്രാദേശിക ഭരണ ചുമതലയെങ്കിലും ബോർഡ് തിരഞ്ഞെടുപ്പ് പലപ്പോഴും അനിശ്ചിതമായി വൈകി നടക്കുന്നതിനാൽ ഇവരുടെ ജനാധിപത്യ അവകാശങ്ങളെല്ലാം തടസ്സപ്പെടുന്ന സ്ഥിതിയായിരുന്നു. 2015 ജനുവരി 11നായിരുന്നു അവസാനം തിരഞ്ഞെടുപ്പ് നടന്നത്. ഇക്കഴിഞ്ഞ മാർച്ചിൽ വിജ്ഞാപനം പുറപ്പെടുവിച്ച് ഏപ്രിൽ 30നു തിരഞ്ഞെടുപ്പ് നടത്താനുള്ള നടപടിക്രമങ്ങൾ തുടങ്ങിയിരുന്നെങ്കിലും പിന്നീട് റദ്ദാക്കി.