ബുദ്ധവഴികളിലേക്കൊരു ചിത്രസ​ഞ്ചാരം; ‘കോതായം’ ചിത്രപ്രദർശനം ഇന്നുകൂടി അക്കാദമി ആർട് ഗാലറിയിൽ

കോട്ടയം ∙ ബൗദ്ധപാരമ്പര്യം പങ്കുവയ്ക്കുന്ന ചിത്രങ്ങൾ.  കോട്ടയത്തിന്റെ പാരമ്പര്യവഴികൾ വരകളിൽ കാണാം.  ‘കോതായം’ എന്ന പേരിൽ ഡിസി കിഴക്കേമുറിയിടത്തിലെ കേരള ലളിതകലാ അക്കാദമി ആർട് ഗാലറിയിലാണ്​ ഈ ചിത്രങ്ങൾ അറിവിലേക്കും പാരമ്പര്യത്തിലേക്കും വഴി തുറക്കുന്നത്. പ്രദർശനം ഇന്നു കൂടി കാണാം. രാവിലെ 10 മുതൽ 6.30 വരെയാണ് സമയം. പ്രവേശനം സൗജന്യം. അനിരുദ്ധ് രാമൻ, ഡോ.അജയ് എസ്.ശേഖർ എന്നിവരുടേതാണു ചിത്രങ്ങൾ. അക്രിലിക്കിലും ചാർക്കോളിലും മിശ്രമാധ്യമങ്ങളിലുമാണ് കലാരചനകൾ. കാലടി സർവകലാശാലയിലെ ഇംഗ്ലിഷ്​ വിഭാഗം അസോഷ്യേറ്റ് പ്രഫസറാണ് ഗാന്ധിനഗർ സ്വദേശിയായ​ അജയ്​ എസ്​.ശേഖർ.  കാഞ്ഞിരപ്പള്ളി പാറ​ത്തോട്​ സ്വദേശിയായ അനിരുദ്ധ് രാമൻ ഡയറ്റിൽ കലാധ്യാപകനും. 

ബുദ്ധിസത്തിന്റെ  ചരിത്രം പഠിക്കുന്ന ഇരുവരുടെയും ആദ്യപ്രദർശനമാണിത്. ഗൗതമ ബുദ്ധനെ സൂചിപ്പിക്കുന്ന പ്രാചീന തമിഴ് പദമാണ് ‘കോത’. കോട്ടയുടെ അയം അല്ലെങ്കിൽ കോട്ടയ്ക്ക്​ അകമായ ‘കോട്ടയം’ ആയി മാറിയെന്നാണ് വിശദീകരണം. നഗരത്തോടു ചേർന്ന ഈരയിൽക്കടവിൽ തിരുഗോതമപുരം എന്നു വിശേഷിപ്പിക്കാവുന്ന ക്ഷേത്രമുണ്ട്​. കിളിരൂർ, നീലംപേരൂർ എന്നീ ബുദ്ധവിഹാരങ്ങളെയും പ്രദർശനം ഓർമിപ്പിക്കുന്നു. ബുദ്ധന്റെ തത്വചിന്തയായ അനിത്യവാദം, സമുദായ വാദം എന്നിവയിലധിഷ്ഠിതമായ കലാവിഷ്​കാരമാണ്​ ഒരുക്കിയിട്ടുള്ളത്​.  അൻപതോളം ചിത്രങ്ങൾക്കൊപ്പം പ്രാചീന ബൗദ്ധ പുരാവസ്തുക്കളു​ടെയും ഇടങ്ങളുടെയും ഫോട്ടോകളും അംബേദ്​കർ, അയ്യങ്കാളി തുടങ്ങിയ നവോത്ഥാന നായകരുടെ പോർട്രെയിറ്റുകളും പ്രദർശനത്തിൽ ഉണ്ട്​.