ഹോർത്തൂസ് വേദിയിൽ ചമുർചിത്രങ്ങളെഴുതി കുട്ടിപ്പട്ടാളം

കോഴിക്കോട്∙ ഹോർത്തൂസ് വേദിയിലെ ചുമരുകളിൽ ചുമർചിത്രങ്ങൾ വരച്ച് കുട്ടിപ്പട്ടാളം. സദ്ഭാവന ഇന്റർനാഷനൽ സ്കൂളിലെ പത്തോളം വിദ്യാർഥികളാണ് ഇന്നലെ ചുമർചിത്രങ്ങൾ വരയ്ക്കാൻ എത്തിയത്. എസ്.കെ.പൊറ്റെക്കാടും ബഷീറും അടക്കമുള്ളവരുടെ ചിത്രങ്ങളാണ് ചുമരിൽ വരയ്ക്കുന്നത്.നിലവിൽ കടപ്പുറത്തെ വാക്ക് വേയിൽ ഹോർത്തൂസിന്റെ പന്തലുകൾ ഉയരുന്നുണ്ട്. ഇവിടെ സിഗ്നൽഹൗസിനു സമീപത്തെ ചുമരിലാണ് കുട്ടികൾ ചിത്രങ്ങൾ വരയ്ക്കുന്നത്.

സമൂഹത്തിനു പ്രയോജനപ്പെടുന്ന 2 പദ്ധതികൾ വിദ്യാർഥികളെ ഉൾപ്പെടുത്തി സ്കൂൾ എല്ലാ വർഷവും നടത്താറുണ്ട്. ഈ വർഷം വയോജനമന്ദിരത്തിലെ അംഗങ്ങൾക്കായി വസ്ത്രവിതരണം അടക്കമുള്ള പ്രവൃത്തികളും വിവിധ കലാപരിപാടികളുടെ അവതരണവും നടത്തിയിരുന്നു. ഈ പദ്ധതിയുടെ രണ്ടാംഘട്ടമായാണ് കുട്ടികൾ ഇന്നലെ കടപ്പുറത്ത് എത്തിയത്.സാഹിത്യനഗരമായ കോഴിക്കോട്ടെ സാഹിത്യനായകരുടെ ചിത്രങ്ങളാണ് ചുമരിൽ വരയ്ക്കുന്നതെന്ന് സ്കൂളിലെ കലാധ്യാപകനായ കെ.സുധീഷ് പറഞ്ഞു.  സാഹിത്യകാരന്മാരുടെ കൃതികളിലെ പ്രധാനവാചകങ്ങളും ചുമരിൽ എഴുതുന്നുണ്ട്. ഇന്നും ചിത്രരചന തുടരും.