പാലക്കാട് ജില്ലയിൽ ഇന്ന് (19-11-2024); അറിയാൻ, ഓർക്കാൻ

അധ്യാപക ഒഴിവ്
മുടപ്പല്ലൂർ ∙ മുടപ്പല്ലൂർ ഗവ. ഹൈസ്കൂളിൽ എൽപി വിഭാഗം ടീച്ചർ ഒഴിവിലേക്ക് ദിവസ വേതനാടിസ്ഥാനത്തിൽ യോഗ്യരായവരെ നിയമിക്കുന്നു. ഉദ്യോഗാർഥികൾ അസ്സൽ സർട്ടിഫിക്കറ്റുകൾ സഹിതം നാളെ രാവിലെ 10.30ന് സ്കൂളിൽ ഹാജരാകണം.
പൊൽപ്പുള്ളി ∙ പഞ്ചായത്ത് ഗവ. ഹയർ സെക്കൻഡറി സ്കൂളിൽ ഹയർ സെക്കൻഡറി വിഭാഗത്തിൽ ഇക്കണോമിക്സ് (ജൂനിയർ) തസ്തികയിൽ താൽക്കാലിക അധ്യാപക ഒഴിവുണ്ട്. കൂടിക്കാഴ്ച 21 നു രാവിലെ 11നു സ്കൂളിൽ നടക്കും.

സംഘാടക സമിതി യോഗം നാളെ
കൊടുവായൂർ ∙ സംസ്ഥാന യുവജന ക്ഷേമ ബോർഡിന്റെ സഹകരണത്തോടെ കൊടുവായൂർ പഞ്ചായത്ത് സംഘടിപ്പിക്കുന്ന കേരളോത്സവത്തിന്റെ സംഘാടക സമിതി യോഗം നാളെ ഉച്ചയ്ക്കു ശേഷം 3 മണിക്കു പഞ്ചായത്ത് ഹാളിൽ നടക്കും. പഞ്ചായത്ത് പരിധിയിലെ ക്ലബ്ബുകളുടെ പ്രസിഡന്റ്, സെക്രട്ടറി, യുവജന സംഘടനാ ഭാരവാഹികൾ എന്നിവർ പങ്കെടുക്കണമെന്നു സെക്രട്ടറി അറിയിച്ചു.
മേലാർകോട് ∙ പഞ്ചായത്ത് കേരളോത്സവം പരിപാടിയുടെ ഭാഗമായി പഞ്ചായത്ത്തല സംഘാടക സമിതി യോഗം നാളെ 11ന് പഞ്ചായത്ത് ഹാളിൽ ചേരുമെന്ന് സെക്രട്ടറി അറിയിച്ചു.

സഹകരണ വാരാഘോഷം
കോങ്ങാട് ∙ പഞ്ചായത്ത് അഗ്രികൾചറൽ ഇംപ്രൂവ്മെന്റ് കോഓപ്പറേറ്റീവ് സൊസൈറ്റിയിൽ 71-ാമത് ദേശീയ സഹകരണ വാരാഘോഷം മുൻ ദേശീയ അധ്യാപക അവാർഡ് ജേതാവ് പാലാട്ടുകളം നാരായണൻ കുട്ടി ഉദ്ഘാടനം ചെയ്തു. സൊസൈറ്റി പ്രസിഡന്റ് കെഎസ്.സുന്ദരേശൻ അധ്യക്ഷനായി. സെക്രട്ടറി കെ.ആർ.ചാത്തു, ശുകപുരം രാധാകൃഷ്ണൻ, ടി.ഗോപാലൻ, കെ.രാധാകൃഷ്ണൻ ടി. ഉദയകുമാർ കെ.എസ് നരസിങി, കെ.എം.രതി, പി.മുരളീധരൻ, പി.വിജയലക്ഷ്മി, സി.രാമകൃഷ്ണൻ, എം.സി.പൊന്നു കുട്ടൻ, സി.ബി.ഹംസ, വി.സുജിത, വി.എസ്.സുനില എന്നിവർ പ്രസംഗിച്ചു. മികച്ച സഹകാരികളെ ആദരിച്ചു.