കന്യാകുമാരി ബോട്ട് ജെട്ടി: നിർമാണം പൂർത്തിയായിട്ട് 4 മാസം; ഉദ്ഘാടനം വൈകുന്നു

നാഗർകോവിൽ∙ നിർമാണം പൂർത്തിയായി 4 മാസം കഴിഞ്ഞിട്ടും ഉദ്ഘാടനം പ്രതീക്ഷിച്ച് പുതിയ ബോട്ട് ജെട്ടി. കന്യാകുമാരി വിവേകാനന്ദപാറ, തിരുവള്ളുവർ പ്രതിമ എന്നിവ  സന്ദർശിക്കുവാൻ വിനോദസഞ്ചാരികൾക്ക് പോകുന്നതിനായി തമിഴ്നാട് സർക്കാർ സ്ഥാപനമായ പൂംപുകാർ ഷിപ്പിങ് കോർപറേഷന്റെ നേതൃത്വത്തിൽ പൊതികൈ, ഗുഹൻ, വിവേകാനന്ദ എന്നീ 3 ബോട്ടുകളാണ് സർവീസ് നടത്തി വരുന്നത്. ഇൗ ബോട്ടുകൾ നിർത്തിയിടുന്നതിനായി വാവത്തൂറൈ കടൽതീരത്ത് ജെട്ടി സ്ഥാപിച്ചിട്ടുണ്ട്.

ഇവ കൂടാതെ വിവേകാനന്ദ കേന്ദ്രത്തിലെ ജീവനക്കാർക്ക് വിവേകാനന്ദപാറയിലേക്ക് ജോലിക്കു പോകുന്നതിനായി ഏക്നാഥ് എന്ന മറ്റൊരു ബോട്ടും വട്ടക്കോട്ട സന്ദർശിക്കാൻ 8 കോടി ചെലവിൽ വാങ്ങിയ താമ്രപർണി, തിരുവള്ളുവർ എന്നീ ആധുനിക സൗകര്യങ്ങളോടു കൂടിയ രണ്ടു  ബോട്ടുകളും  ഉൾപ്പെടെ ആകെ 6 ബോട്ടുകളാണ്  ഇവിടെ നിർത്തിയിടുന്നത്.6 ബോട്ടുകൾ ഒരേ  സ്ഥലത്ത് നിർത്തിയിടാനുള്ള സ്ഥലപരിമിതി കണക്കിലെടുത്താണ്  7 കോടി രൂപ ചെലവിൽ 80 മീറ്റർ നീളത്തിലും 20 മീറ്റർ വീതിയിലുമായി പുതിയ ജെട്ടി പണിയാൻ അധികൃതർ തീരുമാനിച്ചത്. കഴിഞ്ഞ ഏപ്രിലിൽ ഇതിന്റെ നിർമാണം പൂർത്തിയായിട്ടും ഉദ്ഘാടനം ഇതുവരെ നടന്നിട്ടില്ല.