അസ്‌ട്രോണമി, അസ്‌ട്രോഫിസിക്‌സ്, ഫിസിക്സ് ഗവേഷണത്തിന് ‘ഐനാറ്റ് ’

അസ്‌ട്രോണമി, അസ്‌ട്രോഫിസിക്‌സ്, ഫിസിക്സ് എന്നീ വിഷയങ്ങളിൽ സ്‌കോളർഷിപ്പോടെ പിഎച്ച്‌ഡി ഗവേഷണത്തിനു താൽപര്യമുള്ളവർക്ക് പുണെയിലെ ഇന്റർയൂണിവേഴ്‌സിറ്റി സെന്റർ ഫോർ അസ്‌ട്രോണമി നടത്തുന്ന ‘ഐനാറ്റ് 2024’ (IUCAA - National Admission Test 2024) ടെസ്‌റ്റെഴുതാം. യുജിസി നിയന്ത്രണത്തിലുള്ള സ്വയംഭരണസ്ഥാപനമാണിത്. വിലാസം: Inter-University Centre for Astronomy & Astrophysics, Pune University Campus, Ganeshkhind, Pune 411007. ഫോൺ: 020-2560 4100; ഇമെയിൽ: inat@iucaa.in; വെബ്: http://inat.iucaa.in

ഗ്രാവിറ്റേഷൻ, കോസ്മിക് മാഗ്നറ്റിക് ഫീൽഡ്സ്, കോസ്മോളജി, ഹൈ എനർജി അസ്ട്രോഫിസിക്സ്, ഇൻസ്ട്രുമെന്റേഷൻ, ഭൂമിയിൽനിന്നും ബഹിരാകാശത്തുനിന്നുമുള്ള നിരീക്ഷണം, സോളർ ഫിസിക്സ്, ഡേറ്റാ അനാലിസിസ് തുടങ്ങി അസ്ട്രോണമിയുടെയും അസ്ട്രോഫിസിക്സിന്റെയും വിവിധ മേഖലകളിൽ പഠനഗവേഷണമാകാം.

പ്രവേശന യോഗ്യത: ഇനിപ്പറയുന്ന ഏതെങ്കിലുമൊരു യോഗ്യത 55% മാർക്കോടെ 2024 ജൂലൈയോടെയെങ്കിലും പൂർത്തിയാക്കണം – ഫിസിക്‌സ്, അപ്ലൈഡ് ഫിസിക്‌സ്, മാത്തമാറ്റിക്‌സ്, അപ്ലൈഡ് മാത്തമാറ്റിക്‌സ്, ഇലക്ട്രോണിക്സ്, അസ്‌ട്രോണമി ഇവയൊന്നിലെ എംഎസ്‌സി / ഇന്റഗ്രേറ്റഡ് എംഎസ്‍സി, അല്ലെങ്കിൽ ഏതെങ്കിലും ശാഖയിലെ ബിഇ / ബിടെക് /എംഇ / എംടെക്. പട്ടിക, പിന്നാക്ക, സാമ്പത്തികപിന്നാക്ക, ഭിന്നശേഷി വിഭാഗക്കാർക്ക് 50% മാർക്ക് മതി.

ഇതിനു പുറമേ, അതിസമർഥരായ ബിഎസ്‌സി അവസാന വർഷക്കാർ, എംഎസ്‌സി ഒന്നാം വർഷക്കാർ, ഇന്റഗ്രേറ്റഡ് എം എസ്‌സി മൂന്നും നാലും വർഷക്കാർ, ബിഇ / ബിടെക് രണ്ടും മൂന്നും വർഷക്കാർ എന്നിവർക്കു മുൻകൂർ സിലക്‌ഷന് അപേക്ഷിക്കാം. ഇവർക്ക് ബിഇ/ ബിടെക്/ എംഎസ്‌സി പൂർത്തിയാക്കിയശേഷം ഇന്റർയൂണിവേഴ്‌സിറ്റി സെന്ററിൽ പിഎച്ച്ഡി ഗവേഷണ സ്കോളർഷിപ്പിനു ചേരാം.

അപേക്ഷകർ അസ്ട്രോണമി പഠിച്ചിരിക്കണമെന്നു നിർബന്ധമില്ല. ഫിസിക്സിൽ എംഎസ്‌സി തലം വരെയുള്ള അടിസ്ഥാനവിവരങ്ങളെ സംബന്ധിച്ച ചോദ്യങ്ങൾ ടെസ്റ്റിലും ഇന്റർവ്യൂവിലും ഉണ്ടാകും. മാത്തമാറ്റിക്സ്, ഇലക്ട്രോണിക്സ്, എൻജിനീയറിങ് എന്നിവയിലെ അടിസ്ഥാനകാര്യങ്ങളും അറിഞ്ഞിരിക്കണം. ഓൺലൈൻ അപേക്ഷ: നവംബർ 15നു രാത്രി 11.59ന് അകം സമർപ്പിക്കണം.

2 റഫറിമാർ ഓൺലൈനായി അയയ്ക്കുന്ന അസസ്മെന്റ് രഹസ്യറിപ്പോർട്ടുകൾ നവംബർ 19ന് അകം എത്തിക്കുകയും വേണം. ഈ റിപ്പോർട്ടുകളില്ലെങ്കിലും അപേക്ഷ പരിഗണിക്കുമെങ്കിലും സിലക്‌ഷനുള്ള സാധ്യത കുറയും. അപേക്ഷകരുടെ പഠനമികവു വിലയിരുത്താൻ ശേഷിയുള്ള അക്കാദമിക വിദഗ്ധരായിരിക്കണം റഫറി റിപ്പോർട്ട് തയാറാക്കുന്നത്. ബന്ധുക്കൾ പാടില്ല. പ്രവേശനപരീക്ഷ: സിലക്‌ഷന്റെ ഭാഗമായി ജനുവരി പത്തിനു രാവിലെ പത്തിനു പുണെയിൽവച്ച് 2 മണിക്കൂർ എഴുത്തുപരീക്ഷയും ജനുവരി 10–12 തീയതികളിൽ 45 മിനിറ്റ് വീതമുള്ള 2 ഇന്റർവ്യൂവുമുണ്ട്. അപേക്ഷകരുടെ മറ്റേതെങ്കിലും പരീക്ഷ ഇതേ തീയതികളിലാണെങ്കിൽ JEST വഴി (www.jest.org.in) പിഎച്ച്ഡി പ്രവേശനത്തിനു ശ്രമിക്കാം.

ഐനാറ്റ് വഴിഎംഎസ്‌സിയും

രണ്ടാം വർഷം വരെ മാത്‌സ് അടങ്ങിയ ബിഎസ്‌സി ഫിസിക്സ് പൂർത്തിയാക്കുന്ന വർക്കും ഏതെങ്കിലും ശാഖയിലെ ബിടെക് 55% എ‌ങ്കിലും മാർക്കോടെ ജയിച്ചവർക്കും പുണെ സർവകലാശാലയും ഇന്റർയൂണിവേഴ്‌സിറ്റി സെന്ററും ‌ചേർന്നു നടത്തുന്ന ജോയിന്റ് എംഎസ്‌സി (അസ്ട്രോഫിസിക്സ് അടങ്ങിയ ഫിസിക്സ്) പ്രോഗ്രാമിലേക്ക് അപേക്ഷിക്കാം. ഐനാറ്റ്‌ വഴി മാത്രമാണ് ഈ എംഎസ്‌സി പ്രവേശനം.