ജോസ: അവസരം നഷ്ടമാവാതിരിക്കാൻ ശ്രദ്ധിക്കണം ഒട്ടേറെ കാര്യങ്ങൾ

ഐഐടി/ എൻഐടി/ ഐഐഐടി എന്നിവ ഉൾപ്പെടെ 121 സ്ഥാപനങ്ങളിലെ ബിടെക്, ബിഇ, ബിആർക്, ബി പ്ലാനിങ്, 5 വർഷ എംടെക് / എംഎസ്‌സി, 4 വർഷ ബിഎസ് പ്രോഗ്രാമുകളിലെ പ്രവേശനത്തിനുള്ള ആദ്യറൗണ്ട് അലോട്മെന്റ് ‘ജോസ’ (ജോയിന്റ് സീറ്റ് അലൊക്കേഷൻ അതോറിറ്റി– https://josaa.nic.in) പ്രഖ്യാപിച്ചു. ഓൺലൈൻ റിപ്പോർട്ടിങ് അടക്കമുള്ള നടപടിക്രമങ്ങൾ ശ്രദ്ധയോടെ ചെയ്യണം. ഓരോന്നും നിർദിഷ്ട സമയത്തു ചെയ്തില്ലെങ്കിൽ അവസരം നഷ്ടപ്പെടും. സമയക്രമം വെബ്സൈറ്റിലെ Schedule ലിങ്കിലുണ്ട്.

ഇനി ചെയ്യേണ്ടത്
∙ ആദ്യം ജോസ സൈറ്റിലെത്തി നിങ്ങൾക്ക് അലോട്മെന്റുണ്ടോയെന്നു പരിശോധിക്കുക. ഇതു താൽക്കാലിക അലോട്മെന്റാണ്.
∙ ‘ഇനിഷ്യൽ സീറ്റ് അലോട്മെന്റ് ഇന്റിമേഷൻ സ്ലിപ്’ ഡൗൺലോഡ് ചെയ്യുക. ഇതിൽ അലോട്മെന്റ് വിവരങ്ങളും തുടർനടപടികളെക്കുറിച്ചുള്ള വിവരങ്ങളുമുണ്ടാകും.
∙ സീറ്റ് സ്വീകരിച്ച്, തുടർറൗണ്ടുകളിലേക്കുള്ള ഫ്രീസ്, ഫ്ലോട്ട്, സ്ലൈഡ് ഇവയിലൊന്നു തിരഞ്ഞെടുക്കുക.

(1) ഫ്രീസ്: കിട്ടിയ സീറ്റു മതി. ഇനി മാറ്റം വേണ്ട. ഇതു സ്വീകരിച്ചുകഴിഞ്ഞാൽ തുടർറൗണ്ടുകളിലൊന്നും മാറ്റം കിട്ടില്ല.
(2) ഫ്ലോട്ട്: കിട്ടിയതു സ്വീകരിക്കുന്നു. പക്ഷേ, ഉയർന്ന ഓപ്ഷനുകളിലേക്കു മാറാൻ താൽപര്യമുണ്ട്. ഏതു സ്ഥാപനങ്ങളിലേക്കു മാറ്റം ലഭിച്ചാലും സ്വീകരിക്കും.
(3) സ്ലൈഡ്: ഇപ്പോൾ കിട്ടിയ സ്ഥാപനത്തിലെ ഉയർന്ന ഓപ്ഷനുകളിലേക്കു മാത്രം മാറാൻ താൽപര്യം. (ബിസിനസ് റൂൾസ് പേജ് 45, 46).

∙ ആദ്യ ചോയ്സ് കിട്ടിക്കഴിഞ്ഞാൽ പിന്നീട് ‌ഫ്ലോട്ടോ സ്ലൈഡോ ഇല്ല. അലോട്മെന്റിന് ഐഐടിക്ക് 5 റൗണ്ടും മറ്റെല്ലാറ്റിനും 6 റൗണ്ടുമുണ്ട്. അവസാന റൗണ്ടിൽ ‌ഫ്രീസ് മാത്രമേയുള്ളൂ. മറ്റു റൗണ്ടുകളിൽ ഫ്ലോട്ടിൽനിന്നു സ്ലൈഡിലേക്കോ ഫ്രീസിലേക്കോ  മാറാം. സ്ലൈഡിൽനിന്നു ഫ്രീസിലേക്കും മാറാം.
∙ ബിസിനസ് റൂൾസിന്റെ 87, 88 പേജുകളിൽ നിർദേശിച്ചിട്ടുള്ള രേഖകളിൽ നിങ്ങളെ സംബന്ധിച്ചു പ്രസക്തമായവ  പോർട്ടലിൽ അപ്‌ലോഡ് ചെയ്യുക.
∙ സീറ്റ് അക്സപ്റ്റൻസ് ഫീ 35,000 രൂപ ഓൺലൈനായി അടയ്ക്കുക, പട്ടിക, ഭിന്നശേഷി വിഭാഗക്കാർക്ക് 17,500 രൂപ. ഫീസ് ഒരിക്കൽ മാത്രം അടച്ചാൽ മതി; തുടർറൗണ്ടുകളിൽ വേണ്ട. ഈ ഫീ അടച്ചെങ്കിലേ രേഖകൾ പരിശോധിക്കൂ. ഫീയിലെ 5000 രൂപ ജോസ പ്രോസസിങ് ചാർജാണ്. ബാക്കി പ്രവേശനസമയത്തു നൽകാനുള്ള ഫീസിൽ ഉൾപ്പെടുത്തും. 24ന് വൈകിട്ട് 5 മണിക്കകം ഫീസടക്കണം.
∙ അപ്‌ലോഡ് ചെയ്ത രേഖകൾ സംബന്ധിച്ചു പ്രവേശനാധികാരികൾ ചോദ്യങ്ങളുന്നയിച്ചിട്ടുണ്ടോയെന്നു സൈറ്റിൽ ഇടയ്ക്കിടെ നോക്കുക. ഉണ്ടെങ്കിൽ, നിർദിഷ്ട സമയത്തിനുള്ളിൽ അവയ്ക്കു മറുപടി നൽകുക.
∙ ഓൺലൈൻ റിപ്പോർട്ടിങ്, ഫീസടയ്ക്കൽ, രേഖകളുടെ അപ്‌ലോഡ് എന്നിവ 25 വൈകിട്ട് 5ന് അകം പൂർത്തിയാക്കണം.

പ്രവേശനം പൂർത്തിയാകാൻ
∙ യോഗ്യതയും രേഖകളും എല്ലാം തൃപ്തികരമെങ്കിൽ സീറ്റ് ഉറപ്പാണെന്ന അറിയിപ്പു കിട്ടും. തുടർന്നു സൈറ്റിൽനിന്നു ‘പ്രൊവിഷനൽ സീറ്റ് അലോട്മെന്റ് െലറ്റർ’‍‍ ഡൗൺലോഡ് ചെയ്യാം. ഈ ഘട്ടത്തിൽ സീറ്റ് സ്വീകരിക്കുന്നതുകൊണ്ടു മാത്രം പ്രവേശനം അന്തിമമാകുന്നില്ല. അലോട്മെന്റ് കിട്ടിയ സ്ഥാപനത്തിലെത്തി സർട്ടിഫിക്കറ്റ് വെരിഫിക്കേഷൻ പൂർത്തിയാക്കി ഇൻസ്റ്റിറ്റ്യൂട്ട് ഫീസും അടച്ചുകഴിയുമ്പോഴേ പ്രവേശനം പൂർണമാകൂ.
∙താൽക്കാലിക അലോട്മെന്റ് പ്രകാരം സ്വീകരിച്ച സീറ്റിൽനിന്ന് ഉയർന്ന ഓപ്ഷനുകളിലേക്കു മാറാൻ തുടർറൗണ്ടുകളിൽ അവസരമുണ്ട്. ഐഐടിയല്ലാത്ത സ്ഥാപനത്തിൽ (എൻഐടി പ്ലസ്) നിന്ന് ഐഐടിയിലേക്കോ തിരിച്ചോ മാറ്റം കിട്ടിയാൽ അതതു സ്ഥാപനങ്ങളുടെ വ്യവസ്ഥകൾ പ്രകാരം, രേഖകളെല്ലാം  ബോധ്യപ്പെടുത്തണം. ഇത്തരം മാറ്റങ്ങൾ വരുത്തുന്നവർ 2 തവണ ഓൺലൈൻ റിപ്പോർട്ടിങ് ചെയ്യേണ്ടി വരും.
∙എൻഐടി പ്ലസ് താൽക്കാലിക അലോട്മെന്റ് കിട്ടിയ വിദ്യാർഥികൾ  അഞ്ചാം റൗണ്ടിനൊടുവിൽ പാർഷ്യൽ അഡ്മിഷൻ ഫീ 45,000 രൂപ അടയ്ക്കണം. പട്ടിക, ഭിന്നശേഷി വിഭാഗക്കാർക്ക് 20,000 രൂപ. ഈ തുകയും പ്രവേശനസമയത്തു വകവച്ചു കിട്ടും. ഐഐടിയിൽ സീറ്റ് സ്വീകരിച്ചവർക്ക്  നാലാം റൗണ്ടിൽ, സീറ്റ് സ്വീകരിക്കാനുള്ള സമയം തീരുംവരെ (ജൂലൈ 16 വൈകിട്ട് 5 മണി)  പിന്മാറാം.  സീറ്റ് അക്സപ്റ്റൻസ് ഫീയിൽനിന്ന് 7000 രൂപ കുറച്ചു ബാക്കി തിരിച്ചുകിട്ടും.
∙‘എൻഐടി പ്ലസ്’ സ്ഥാപനങ്ങളിൽ ഇപ്പോൾ നേരിട്ടു ചെന്നു ചേരേണ്ട; ജോസ റൗണ്ടുകളെല്ലാം തീർന്നതിനു ശേഷമുള്ള സിഎസ്എബി സ്പെഷൽ റൗണ്ടുകളും പൂർത്തിയായിട്ടു മതി. (സെൻട്രൽ സീറ്റ് അലൊക്കേഷൻ ബോർഡ്–https://csab.nic.in).  ഫോൺ:  ഐഐടി: 044-22579220 മറ്റു സ്ഥാപനങ്ങൾ: 9606946338