‘ഒടുവിൽ അവർ പോസ് ചെയ്യാൻ തയാറായി’; അരുമകൾക്കൊപ്പമുള്ള ഫോട്ടോ പങ്കുവച്ച് മോഹൻലാൽ

പ്രിയപ്പെട്ട താരങ്ങളെ നേരിട്ട് കണ്ടാൽ അവർക്കൊപ്പം ഒരു ഫോട്ടോയെടുക്കണമെന്ന് ആഗ്രഹിക്കുന്നവരാണ് മിക്കവരും. എന്നാലിവിടെ രണ്ടുപേരുടെ അനുമതിയോടുകൂടി അവർക്കൊപ്പം സൂപ്പർതാരം ഫോട്ടോയെടുത്തിരിക്കുകയാണ്. മലയാളത്തിന്റെ പ്രിയതാരം മോഹൻലാലിന്റെ കാര്യമാണ് പറയുന്നത്. ആ രണ്ട് പേർ വേറാരുമല്ല, താരത്തിന്റെ വളർത്തുനായകളായ കാസ്പറും വിസ്കിയും ആണ്.

‘ഒടുവിൽ കാസ്പറും വിസ്കിയും തനിക്കൊപ്പം പോസ് ചെയ്യാൻ തയാറായി’ എന്നാണ് ഫോട്ടോയ്ക്കൊപ്പം മോഹൻലാല്‍ കുറിച്ചത്. കാസ്പർ വളരെ ഗൗരവത്തോടെയാണ് ഫോട്ടോയ്ക്ക് പോസ് ചെയ്തത്. എന്നാൽ വിസ്കി ചിരിച്ചുകൊണ്ട് താരത്തിനൊപ്പം പോസ് ചെയ്യുകയായിരുന്നു. ചിത്രം കാണുമ്പോൾ നിർണയം സിനിമയിലെ മോഹൻലാലിനെ ഓർമവരുന്നതായി ചിലർ കുറിച്ചു.

കാസ്പറിനു നല്ല ക്ഷീണമുണ്ടെന്നും വിസ്കി സന്തോഷത്തിലാണെന്നും ആരാധകർ കുറിച്ചു. 90കളിലെ ലാലേട്ടൻ ലുക്ക് ആണ് ചിത്രത്തിലെന്നും ചിലർ പറഞ്ഞു. നിമിഷനേരം കൊണ്ടാണ് മോഹൻലാലും അരുമകളും സോഷ്യൽമിഡിയയിൽ വൈറലായത്. ബോളിവുഡ് നടി മലൈക അറോറയുടെ വളർത്തുനായയുടെ പേരും കാസ്പർ എന്നാണ്.