ഒരു വനത്തിലെ എല്ലാ കടുവകളെയും കൊന്നു! വടക്കിന്റെ വീരപ്പൻ അഥവാ സൻസർ ചന്ദ്

ഇരുപതാം നൂറ്റാണ്ടിന്റെ തുടക്കത്തിൽ ഒരുലക്ഷത്തിലധികം കടുവകളുണ്ടായിരുന്നു ഇന്ത്യയിൽ. എന്നാൽ ഇന്ന് അവയുടെ എണ്ണം തുലോം കുറവാണ്. കടുവകൾക്കും സിംഹങ്ങൾക്കും സ്വാഭാവിക ആവാസ വ്യവസ്ഥയുള്ള ഒരേയൊരു രാജ്യമെന്നത് ഇന്ത്യയുടെ പാരിസ്ഥിതികമായ പ്രത്യേകതയാണ്. എന്നാൽ കടുവാ വേട്ട ഇന്ത്യയിൽ വ്യാപകമായി ഉണ്ട്. കടുവകളുടെ എണ്ണം കുറയുന്നതിൽ ഈ അനധികൃത വേട്ട ഒരു കാരണവുമാണ്.

ഇന്ത്യയിൽ പല കടുവാവേട്ടക്കാരുമുണ്ടായിട്ടുണ്ട്. എന്നാൽ അവരിൽ സൻസാർ ചന്ദിനോളം കുപ്രസിദ്ധരായവർ മറ്റാരുമുണ്ടാകില്ല. രാജസ്ഥാനിലെ സരിസ്‌ക സംരക്ഷിത വനത്തിലെ കടുവകളെ മൊത്തത്തിൽ കൊന്നൊടുക്കുന്നതിന് കാരണക്കാരനായ സൻസാറിനെ വടക്കിന്റെ വീരപ്പൻ എന്നാണു വിളിച്ചിരുന്നത്. 500 കടുവകൾ, രണ്ടായിരത്തിലധികം പുലികൾ, അരലക്ഷത്തോളം കുറുക്കൻമാരും മറ്റു വന്യജീവികളും തുടങ്ങിയവ നശിക്കാൻ സൻസറും സംഘവും കാരണക്കാരായിട്ടുണ്ടെന്നാണു വിലയിരുത്തപ്പെടുന്നത്.

Read Also: ആന്ധ്ര തീരത്ത് 25 അടി നീളമുള്ള തിമിംഗലം; ജഡത്തിനു മുകളിൽകയറി ഫോട്ടോയെടുത്ത് ജനങ്ങള്‍–വിഡിയോ

ചെറുപ്പത്തിൽ തന്നെ സൻസർ അനധികൃത വേട്ടയും മറ്റു നിയമവിരുദ്ധ പ്രവർത്തനങ്ങളും നടത്തിയിരുന്നു. 1674ൽ ഇയാൾ ഡൽഹിയിൽ പിടിയിലായി. 680 മൃഗത്തോലുകൾ അന്ന് സൻസറിൽ നിന്നു പിടികൂടി. ഇവയിൽ കടുവകളുടേതും പുലികളുടേതുമുണ്ടായിരുന്നു.

അന്ന് പ്രായം 16 വയസ്സ് മാത്രമായിരുന്നതിനാൽ കോടതി ശിക്ഷയിൽ ഇളവു നൽകി സൻസറിനെ വിട്ടയച്ചു. എന്നാൽ മൃഗവേട്ട വിപുലപ്പെടുത്തുകയാണ് പിന്നീട് സൻസർ ചെയ്തത്. സൻസറിന്റെ ഭാര്യ റാണിയും മകൻ ആകാശുമുൾപ്പെടെ ബന്ധുക്കൾ ഈ അനധികൃത മൃഗവേട്ട സംഘത്തിലെ അംഗങ്ങളായി.

ചൈന, നേപ്പാൾ, തിബറ്റ് എന്നിവിടങ്ങളിലായിരുന്നു സൻസറിന്റെ പ്രധാന ക്ലയന്റ്സ് സ്ഥിതി ചെയ്തതെന്നത് ഇയാളുടെ ക്രിമിനൽ ശൃംഖലയുടെ നേർചിത്രമായിരുന്നു. ചൈനീസ് പരമ്പരാഗത വൈദ്യത്തിൽ കടുവകളുടെ ശരീരഭാഗങ്ങൾക്ക് വലിയ ആവശ്യമുണ്ട്. അതിനാൽ തന്നെ അവിടുന്ന് ഒട്ടേറെ ഓർഡറുകൾ സൻസറിനു ലഭിച്ചിരുന്നു. കടുവാത്തോലും പല്ലും എല്ലുമെല്ലാം അങ്ങനെ അതിർത്തികടന്നു.