കോവിഡ് 19 വാഹന മേഖലയെ തകർത്തു, ബിഎസ്6 നടപ്പാക്കാൻ കൂടുതൽ സമയം ആവശ്യപ്പെട്ട് എഫ്എഡിഎ

ഏപ്രിൽ ഒന്നുമുതൽ ബിഎസ് 6 മലിനീകരണ നിയന്ത്രണ ചട്ടങ്ങൾ നിലവിൽ വരാനിരിക്കെ. ബിഎസ് 4 നാലു വാഹനങ്ങളുടെ റജിസ്ട്രേഷന് കൂടുതൽ സമയം അനുവദിക്കണമെന്ന് എഫ്എഡിഎ (ദ ഫെഡറേഷൻ ഓഫ് ഓട്ടോമൊബൈൽ ഡീലേഴ്സ് അസോസിയേഷൻ). ബിഎസ് 4 വാഹനങ്ങൾ റജിസ്റ്റർ ചെയ്യാനുള്ള സമയം മാർച്ച് 31 വരെ എന്നത് നീട്ടി നൽകണം എന്നാണ് എഫ്എഡിഎ സുപ്രീം കോടതിയോട് ആവശ്യപ്പെട്ടത്.

നേരത്തെ നിർമാതാക്കൾ ഈ ആവശ്യവുമായി സമീപിച്ചുവെങ്കിലും കോടതി അപേക്ഷ നിസരിക്കുകയായിരുന്നു. കോവിഡ് 19 ഡീലർഷിപ്പുകളുടെ പ്രവർത്തനത്തെ പ്രതികൂലമായി ബാധിച്ചെന്നും ബിഎസ് 4 വാഹനങ്ങൾ വിറ്റു തീർക്കുക ബുദ്ധിമുട്ടാണെന്നും കാണിച്ചാണ് സുപ്രീം കോടതിയെ സമീപിക്കുന്നത്. കഴിഞ്ഞ ഒരാഴ്ചയായി ഡീലർഷിപ്പുകൾ പൂർണമായും പ്രവർത്തിക്കുന്നില്ല. വാഹനം വാങ്ങാൻ താൽപര്യം മിക്കവരും കാണിക്കുന്നില്ല. അതുകൊണ്ട് തന്നെ ബിഎസ് 4 സ്റ്റോക്ക് വിറ്റു തീർക്കാൻ കൂടുതൽ സമയം നൽകണമെന്നുമാണ് എഫ്എഡിഎ ആവശ്യപ്പെട്ടിരിക്കുന്നത്.

മലീനികരണ നിയന്ത്രണ ചട്ടം കൂടുതൽ കർശനമാക്കുന്നതിന്റെ ഭാഗമായാണ് ബിഎസ് 4 ൽ നിന്ന് ബിഎസ് 6 ലേക്ക് ഇന്ത്യൻ വാഹനലോകം മാറാനൊരുങ്ങുന്നത്. ബിഎസ് 5 നടപ്പാക്കിയാൽ ബിഎസ് 6 വീണ്ടും വൈകും എന്നുകാണിച്ചാണ് അത് ഒഴിവാക്കി ബിഎസ് 6 ലേക്ക് ഏപ്രിൽ ഒന്നുമുതൽ മാറുന്നത്. പുതിയ മാനദണ്ഡം പ്രകാരം ഏപ്രിൽ ഒന്നുമുതൽ രാജ്യത്ത് റജിസ്റ്റർ ചെയ്യുന്ന വാഹനങ്ങളെല്ലാം ബിഎസ് 6 നിലവാരത്തിലുള്ളവയായിരിക്കണം.

English Summary: FADA approaches Supreme Court seeking BS4 deadline extension over COVID-19 epidemic