ഓട്ടോ എക്സ്പോയിലെ അവതരണത്തിൽ നിന്നും
വലിയ സെഡാനായ 'സിവിക്' വീണ്ടും ഓട്ടോ എക്സ്പോയിലവതരിച്ച് ഇന്ത്യൻ വിപണിയിലേക്കെത്തുന്നു. വിൽപ്പനയിൽ കുറവുണ്ടായതിനെത്തുടർന്ന് 2013 ല്‍ സിവിക്കിനെ ഹോണ്ട പിന്‍വലിക്കുകയായിരുന്നു. ഇപ്പോൾ സിറ്റിക്കുണ്ടായ ജനപ്രീതിയാണ് സിവികിനെ തിരിച്ചെത്തിക്കാൻ കമ്പനിയെ പ്രേരിപ്പിച്ചിരിക്കുന്നത്.മുൻമോഡലിലെ പോലെ 1.8 ലീറ്റർ ഐ — വിടെക് പെട്രോൾ എൻജിനാവും ഈ ‘സിവിക്കി’നും കരുത്തേകുക. അതേസമയം മുമ്പത്തേതിൽ നിന്നു വ്യത്യസ്തമായി ഡീസൽ എൻജിൻ സഹിതവും ‘സിവിക്’ വിൽപ്പനയ്ക്കെത്തുമെന്നതാണു പ്രധാന പുതുമ.1.6 ലിറ്റർ ഐഡിടെക് ഡീസൽ എ‍ഞ്ചിനാവും ഉണ്ടാവുക. മികച്ച ഇന്ധനക്ഷമതയും കുറഞ്ഞ എമിഷനുമാണ് ഈ എഞ്ചിന്റെ പ്രത്യേകത.
ഇന്ത്യയിൽ സ്കോഡ ‘ഒക്ടേവിയ’യോടും ഫോക്സ്വാഗൻ ‘ജെറ്റ’യോടും ടൊയോട്ട ‘കൊറോള’യോടുമൊക്കെയാവും ‘സിവിക്കി’ന്റെ പോരാട്ടം. അതുകൊണ്ടുതന്നെ കാറിന്റെ വില 15 — 20 ലക്ഷം രൂപ നിലവാരത്തിലാവുമെന്നാണു പ്രതീക്ഷ. ഇന്ത്യൻ വിപണിയിലെ ‘ഡി’ വിഭാഗത്തിന്റെ താഴെത്തട്ടിൽ 2006ലാണ് ഹോണ്ട ‘സിവിക്കി’നെ അവതിപ്പിച്ചത്. മാനുവൽ, ഓട്ടമാറ്റിക് ട്രാൻസ്മിഷനുകളോടെ എത്തിയ കാറിനു കരുത്തേകിയത് 1.8 ലീറ്റർ, ഐ — വി ടെക് എൻജിനായിരുന്നു.
2007ലെ ‘ഇന്ത്യൻ കാർ ഓഫ് ദ് ഇയർ’(ഐ — കോടി’ പുരസ്കാരം നേടിയ ‘സിവിക്’ 2010ലെ ജെ ഡി പവർ ഇനീഷ്യൽ ക്വാളിറ്റി സ്റ്റഡിയിലും മുന്നിലെത്തി. പക്ഷേ 2012 — 13ൽ ‘ലോവർ ഡി’ വിഭാഗത്തിലെ വിൽപ്പന ഇടിഞ്ഞതാണു ‘സിവിക്കി’നു തിരിച്ചടിയായത്. ‘കൊറോള’യുടെയും ഹ്യുണ്ടേയ് ‘ഇലാൻട്ര’യുടെയുമൊക്കെ വിൽപ്പന 29% ഇടിഞ്ഞപ്പോൾ ഹോണ്ട വെറും 685 ‘സിവിക്’ ആണു വിറ്റത്; മുൻവർഷത്തെ അപേക്ഷിച്ച് 70% കുറവ്. ഇതോടെ 2013ൽ ഹോണ്ട ‘സിവിക്കി’നെ ഇന്ത്യയിൽ നിന്നു പിൻവലിക്കുകയും ചെയ്തു
