ഖത്തർ അമീറിനൊപ്പം ആദ്യമായി വിദേശ വേദിയിൽ പത്‌നിയും; ചർച്ചയായി ചിത്രങ്ങൾ

ദോഹ ∙ യൂറോപ്യന്‍ പര്യടനത്തിന്റെ ഭാഗമായി സ്‌പെയിനിലെത്തിയ അമീര്‍ ഷെയ്ഖ് തമീം ബിന്‍ ഹമദ് അല്‍താനിയ്‌ക്കൊപ്പം പത്‌നി ഷെയ്ഖ ജവഹര്‍ ബിന്‍ത് ഹമദ് ബിന്‍ സുഹെയിം അല്‍താനിയും ഔദ്യോഗിക ചടങ്ങുകളില്‍ പങ്കെടുത്തതിന്റെ ചിത്രങ്ങള്‍ ശ്രദ്ധ നേടുന്നു.

ഇതാദ്യമായാണ് രാജ്യാന്തര തലത്തില്‍ അമീറിനൊപ്പം പത്‌നി ഷെയ്ഖ ജവഹര്‍ ഔദ്യോഗിക ചടങ്ങില്‍ പങ്കെടുക്കുന്നത്. ഇതാണ് സമൂഹ മാധ്യമങ്ങളില്‍ ഇരുവരുടെയും സ്‌പെയ്ന്‍ സന്ദര്‍ശനം ശ്രദ്ധ നേടാന്‍ കാരണം. 

ഖത്തര്‍ ഫൗണ്ടേഷന്റെ ബിരുദ ദാന ചടങ്ങുകളില്‍ ഉള്‍പ്പെടെ പ്രാദേശിക തലത്തില്‍ പൊതുവേദികളില്‍ എത്താറുണ്ടെങ്കിലും ഖത്തറിന്റെ ഭരണാധികാരിയായി അമീര്‍ ഷെയ്ഖ് തമീം ചുമതലയേറ്റ ശേഷം ഇതാദ്യമായാണ് പത്‌നി ഷെയ്ഖ ജവഹറിനൊപ്പം വിദേശരാജ്യത്തെ പൊതുവേദിയില്‍ എത്തുന്നത്.

ഷെയ്ഖ ജവഹറിന്റെ വസ്ത്രധാരണവും ഏറെ ശ്രദ്ധ നേടി കഴിഞ്ഞു. മനോഹരമായ പേള്‍-വൈറ്റ് കോട്ട് ധരിച്ച് കോട്ടിന് അനുയോജ്യമായുള്ള വജ്ര ആഭരണങ്ങളും അണിഞ്ഞാണ് റോയല്‍ പാലസിലേയ്ക്ക് എത്തിയത്. വജ്രങ്ങള്‍ പതിച്ച കറുത്ത ഹൈ-നെക്ക് ഗൗണില്‍ അതിമനോഹരിയായാണ് ഔദ്യോഗ വിരുന്നില്‍ പങ്കെടുത്തത്. 

മാഡ്രിഡിലെ റോയല്‍ പാലസില്‍ തികച്ചും രാജകീയ സ്വീകരണമാണ് സ്‌പെയിന്‍ രാജാവ് ഫെലിപ് ആറാമനും രാജ്ഞി ലെറ്റിസിയയും ഇരുവര്‍ക്കും നല്‍കിയത്. റോയല്‍ പാലസില്‍ നടന്ന ഔദ്യോഗിക വിരുന്നിലും അമീറിനൊപ്പം പത്‌നി ഷെയ്ഖ ജവഹറും പങ്കെടുത്തു. 

അമീറിന്റെ പത്‌നി ഷെയ്ഖ ജവഹറിന് സ്‌പെയ്ന്‍ രാജ്ഞി ലെറ്റിസിയ റോയല്‍ ഓര്‍ഡര്‍ ഓഫ് ഇസബെല്ല ദ കത്തോലിക് സമ്മാനിച്ചു. രാജ്ഞിയ്ക്ക് ഹമദ് ബിന്‍ ഖലീഫ സാഷ് നല്‍കി ഷെയ്ഖ ജവഹറും ആദരിച്ചു.