ബ്ലാക്ക്‌ബെറി കൃഷിയിൽ നേട്ടവുമായി അൽ ബഹ

അൽ ബഹ ∙  അൽ ബഹയിൽ ബ്ലാക്ക്‌ബെറി കാർഷിക സംരംഭം വൻ വിജയം നേടുന്നു. കർഷകരെയും കാർഷിക സംഘടനകളെയും സഹകരിപ്പിച്ചും വിവിധ പരിപാടികൾ നടപ്പാക്കിയും അടുത്ത മൂന്ന് വർഷത്തിനുള്ളിൽ അൽ ബഹയിലെ  ബ്ലാക്ക്‌ബെറി ചെടികളുടെ എണ്ണം 30 ലക്ഷമായി ഉയർത്താനാണ് കൃഷി വകുപ്പ് ലക്ഷ്യമിടുന്നത്.

പദ്ധതിയുടെ വിജയത്തിന് പിന്നിലെ പ്രധാന കാരണങ്ങളിലൊന്ന് നൂതന പ്ലാന്‍റ് ടിഷ്യു കൾച്ചർ സാങ്കേതികവിദ്യയുടെ ഉപയോഗമാണ്. ഈ രീതി വേഗതയേറിയ വളർച്ച, ഉയർന്ന വിളവ്, മികച്ച ഗുണമേന്മയുള്ള പൂക്കൾ എന്നിവ ഉറപ്പാക്കുന്നതോടൊപ്പം കർഷകർക്കും തേനീച്ച വളർത്തുന്നവർക്കും ഗുണം ചെയ്യുന്നു. കൂടാതെ, ബ്ലാക്ക്‌ബെറി കൃഷി ഈ പ്രദേശത്തിന് മികച്ച സാമ്പത്തിക നേട്ടവും നിക്ഷേപ വരുമാനവും വാഗ്ദാനം ചെയ്യുന്നു.

ഈ പദ്ധതി ഇതിനകം തന്നെ 100% വിജയം കൈവരിച്ചിട്ടുണ്ട്. തുറസ്സായ സ്ഥലങ്ങളിൽ 30,000 ത്തിലധികം ബ്ലാക്ക്‌ബെറി  തൈകൾ നട്ടുപിടിപ്പിച്ചു. 2024 ലെ വസന്തകാലത്ത് ഈ തൈകൾ ഉയർന്ന നിലവാരമുള്ള ഫലങ്ങൾ ഉത്പാദിപ്പിക്കാൻ തുടങ്ങി. 30 ലക്ഷം എന്ന ലക്ഷ്യം നേടാനും ബ്ലാക്ക്‌ബെറി  കൃഷിയുടെ വ്യാപകമായ പ്രചാരം നടത്താനും കർഷകർക്ക് പരിപാലന രീതികളും വിപണന തന്ത്രങ്ങളും പരിശീലിപ്പിക്കുന്നതിനായി കൃഷി വകുപ്പ് ഫീൽഡ് വർക്ക് ഷോപ്പുകൾ നടത്തുന്നു. ഈ പദ്ധതി അൽ ബഹയിലെ കാർഷിക വൈവിധ്യവൽക്കരണത്തിനും പ്രാദേശിക സമ്പദ്‌വ്യവസ്ഥയുടെ വികസനത്തിനും ഗണ്യമായ സംഭാവന നൽകുമെന്ന് പ്രതീക്ഷിക്കുന്നു.