വന്ധ്യതയ്ക്ക് വ്യാജ ചികിത്സ; സൗദിയിൽ ഒരാൾ അറസ്റ്റിൽ

ജിദ്ദ ∙ വന്ധ്യത, ന്യൂറോളജിക്കൽ ഡിസോർഡേഴ്സ്, മറ്റ് അസുഖങ്ങൾ എന്നിവ ചികിത്സിക്കാമെന്ന് ‌ അവകാശപ്പെട്ട് ദുർബലരായ രോഗികളെ ചൂഷണം ചെയ്തതിന്, സർക്കാർ ഏജൻസികളുമായി സഹകരിച്ച് ആരോഗ്യ മന്ത്രാലയം ഒരാളെ പിടികൂടി. ജിദ്ദയിലെ ലൈസൻസില്ലാത്ത കെട്ടിടത്തിലാണ് പ്രതികൾ അനധികൃത ക്ലിനിക്ക് നടത്തിയിരുന്നത്.

പൗരന്മാരുടെയും താമസക്കാരുടെയും സുരക്ഷയ്ക്ക് മുൻഗണന നൽകി കൂടുതൽ അന്വേഷണത്തിനും നിയമനടപടികൾക്കുമായി പ്രതിയെ പബ്ലിക് പ്രൊസിക്യൂഷന് കൈമാറി. വൈദ്യചികിത്സയുടെ തെറ്റായ ക്ലെയിമുകൾ ഉൾപ്പെടെ വഞ്ചനാപരമായ പ്രവർത്തനങ്ങളുടെ റിപ്പോർട്ടുകളെ തുടർന്നാണ് അധികാരികൾ നടപടി സ്വീകരിച്ചത്. മെഡിക്കൽ നിയമ ലംഘനങ്ങൾക്ക്  ഇയാളുടെ റജിസ്ട്രേഷൻ  മുമ്പ്  റദ്ദാക്കിയതായി കണ്ടെത്തി. അരലക്ഷം റിയാൽ പിഴയും അഞ്ച് വർഷം വരെ തടവ് ശിക്ഷയും ലഭിക്കും.

കൂടാതെ, നിയമവിരുദ്ധ ക്ലിനിക്ക് സ്ഥിതിചെയ്യുന്ന കെട്ടിടത്തിൻ്റെ ഉടമയെയും അധികാരികൾക്ക് കൈമാറി. അതേസമയം കേസിൽ ഉൾപ്പെട്ട എല്ലാ കക്ഷികളെയും തിരിച്ചറിയാനുള്ള അന്വേഷണം തുടരുകയാണ്. കാലഹരണപ്പെട്ട മെഡിക്കൽ മരുന്നുകൾ, ലഹരി മരുന്നുകൾ, സൈക്കോട്രോപിക് ലഹരിവസ്തുക്കൾ,  മറ്റ് സുരക്ഷിതമല്ലാത്ത മെഡിക്കൽ വസ്തുക്കൾ എന്നിവ പിടിച്ചെടുക്കുകയും ചെയ്തിട്ടുണ്ട്.

രോഗികളുടെ സുരക്ഷ ഉറപ്പാക്കുന്നതിനായി ആരോഗ്യ നിയന്ത്രണങ്ങൾ നിരീക്ഷിക്കുന്നതിനും നടപ്പിലാക്കുന്നതിനുമുള്ള പ്രതിബദ്ധത ആരോഗ്യ മന്ത്രാലയം ആവർത്തിച്ചു.  ചൂഷണത്തിന് ഇരയാകരുതെന്നും ലൈസൻസുള്ള പ്രാക്ടീഷണർമാരിൽ നിന്നും സൗകര്യങ്ങളിൽ നിന്നും മാത്രം ആരോഗ്യ സേവനങ്ങൾ തേടണമെന്നും മന്ത്രാലയം പൗരന്മാരോടും താമസക്കാരോടും അഭ്യർഥിച്ചു.