സാങ്കേതിക തകരാർ: അബുദാബിയിലേക്കുള്ള വിമാനം വൈകിയത് 13 മണിക്കൂർ; പ്രതിഷേധിച്ച് യാത്രക്കാർ

നെടുമ്പാശേരി ∙ സാങ്കേതിക തകരാറിനെ തുടർന്ന് വിമാനം 13 മണിക്കൂറിലേറെ വൈകി. ഇന്നലെ പുലർച്ചെ 4.25ന് ഇവിടെ നിന്ന് പുറപ്പെടേണ്ട ഇത്തിഹാദിന്റെ അബുദാബി വിമാനമാണ് വൈകിയത്. വിമാനം പുറപ്പെടുന്നതിന് മുൻപുള്ള പരിശോധനയിലാണ് തകരാർ കണ്ടെത്തിയത്.

ഏറെ സമയം വിമാനത്താവളത്തിൽ കാത്തിരുന്നിട്ടും എപ്പോൾ വിമാനം പുറപ്പെടുമെന്ന് അറിയിക്കാതിരുന്നതിനാൽ യാത്രക്കാർ വിമാനത്താവളത്തിൽ പ്രതിഷേധിച്ചു. തകരാർ പരിഹരിച്ച് വൈകിട്ട് അഞ്ചരയോടെയാണ് വിമാനം പിന്നീട് അബുദാബിയിലേക്ക് പുറപ്പെട്ടത്.