വ്യവസായ സ്ഥാപനങ്ങളിലെ വിദേശതൊഴിലാളികളുടെ ലെവി ഇളവ്​ ദീർഘിപ്പിച്ച് സൗദി; പ്രവാസികൾക്ക് നേട്ടം

ജിദ്ദ ∙ സൗദിയിലെ വ്യവസായ സ്ഥാപനങ്ങളിലെ വിദേശതൊഴിലാളികളുടെ ലെവി ഇളവ്​  ദീർഘിപ്പിച്ചു. കിരീടാവകാശിയും പ്രധാനമന്ത്രിയുമായ അമീർ മുഹമ്മദ്​ ബിൻ സൽമാന്റെ അധ്യക്ഷതയിൽ ജിദ്ദയിൽ ചേർന്ന മന്ത്രിസഭായോഗമാണ്​ ഈ തീരുമാനം കൈകൊണ്ടത്.

വിദേശതൊഴിലാളികളുടെ പേരിൽ തൊഴിലുടമകൾ മാനവവിഭവശേഷി മന്ത്രാലയത്തിൽ അടയ്ക്കേണ്ട ഈ തുക സർക്കാർ നൽകുന്നത്​ തുടരാനാണ്​ തീരുമാനം.  സുപ്രധാന  ലെവി ഇളവ് 2025 ഡിസംബർ 31 വരെയാണ് നീട്ടിയത്. പ്രവാസികൾക്ക്​  സഹായകരമാണ് നടപടി.

ഇത്​ വൻതോതിൽ രാജ്യത്തെ വ്യവസായ മേഖലക്ക്​ ഉണർവും പ്രയോജനവും നൽകും. ഒരു വിദേശ തൊഴിലാളിക്ക്​ മേലുള്ള പ്രതിമാസ ലെവി 800 റിയാലാണ്​. സൗദി തൊഴിൽ നിയമം അനുസരിച്ച്​ തൊഴിലുടമ അല്ലെങ്കിൽ സ്ഥാപന നടത്തിപ്പുകാരാണ്​ ഇത്​ അടയ്​ക്കേണ്ടത്​. വ്യവസായ മേഖലയ്ക്കുള്ള ഉത്തേജക പദ്ധതിയുടെ ഭാഗമായാണ് നേരത്തെ സർക്കാർ ലെവി ഇളവ് പ്രഖ്യാപിച്ചത്. ഇത് അവസാനിക്കാനിരിക്കെയാണ് അടുത്ത വർഷാവസാനം വരെ പദ്ധതി ദീർഘിപ്പിച്ചിരിക്കുന്നത്.