സർക്കാർ കെട്ടിടങ്ങളിൽ ആർട്ടിഫിഷ്യൽ ഇന്റലിജൻസ് നിരീക്ഷണ സംവിധാനം

മനാമ ∙ ബഹ്‌റൈൻ സർക്കാർ കെട്ടിടങ്ങളിൽ ആർട്ടിഫിഷ്യൽ ഇന്റലിജൻസ് നിരീക്ഷണ സംവിധാനം നടപ്പിലാക്കുന്നു. ആദ്യ പടിയായി സർവേ ആൻഡ് ലാൻഡ്  റജിസ്ട്രേഷൻ ബ്യൂറോ കെട്ടിടത്തിലെ നിയമലംഘനങ്ങൾ നിരീക്ഷിക്കാൻ ആർട്ടിഫിഷ്യൽ ഇന്റലിജൻസ് ഉപയോഗിച്ച് പുതിയസുരക്ഷാ സംവിധാനം ഏർപ്പെടുത്തി. ഉപഗ്രഹ ചിത്രങ്ങൾക്കായി പ്ലാനറ്റ് ലാബുകളുമായും ആർട്ടിഫിഷ്യൽ ഇന്റലിജൻസ് വിശകലനത്തിനായി എറ്റോസ്‌കിയുടെ പങ്കാളിത്തത്തോടെ വികസിപ്പിച്ച ഈ സംവിധാനം മുനിസിപ്പാലിറ്റി, കാർഷിക കാര്യ മന്ത്രാലയവുമായി സഹകരിച്ചാണ് നടപ്പിലാക്കിയിരിക്കുന്നത്.

റിയൽ എസ്റ്റേറ്റ് മേഖലയിലേക്കും ആധുനിക സാങ്കേതിക വിദ്യകൾ സമന്വയിപ്പിക്കുന്നതിന് മുന്നോടിയായിട്ടുള്ള രൂപരേഖയെക്കുറിച്ചും എസ്എൽആർബി ചെയർമാൻ എൻജിൻ ബാസിം ബിൻ യാക്കൂബ് അൽ ഹമർ പറഞ്ഞു. ഡിജിറ്റൽ സമ്പദ്‌വ്യവസ്ഥയുടെ ആവശ്യങ്ങൾ നിറവേറ്റുന്ന ഒരു ദേശീയനയം ആവിഷ്‌കരിക്കുന്നത് ബഹ്‌റൈൻ ഭരണാധികാരികളുടെ നിർദ്ദേശങ്ങൾ പ്രകാരമാണെന്നും ഇതിൽ വിവിധ മേഖലകളിൽ എഐ സാങ്കേതികവിദ്യകൾ നടപ്പിലാക്കുക, സാങ്കേതിക അടിസ്ഥാന സൗകര്യങ്ങൾ നവീകരിക്കുക, ദേശീയ സമ്പദ്‌വ്യവസ്ഥ മെച്ചപ്പെടുത്തുന്നതിനുള്ള നിക്ഷേപം പ്രോത്സാഹിപ്പിക്കുക എന്നിവ ഉൾപ്പെടുന്നതായും അദ്ദേഹം പറഞ്ഞു.

സർക്കാർ പദ്ധതികളും സേവനങ്ങളും ഡിജിറ്റൽ പരിവർത്തന ലക്ഷ്യങ്ങളോടെ വേഗത നൽകുന്നുണ്ടെന്ന് ഉറപ്പാക്കാൻ കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയുടെ തുടർച്ചയായ മേൽനോട്ടത്തെയും അദ്ദേഹം എടുത്തുപറഞ്ഞു. നിർമാണം, പരിസ്ഥിതി, നഗരപ്രദേശങ്ങൾ എന്നിവയിലെ മാറ്റങ്ങൾ നിരീക്ഷിക്കാൻ നൂതന സാങ്കേതികവിദ്യ പ്രയോജനപ്പെടുത്തുന്നതാണ് പുതിയ സംവിധാനം. പ്രകൃതിദത്തവും മാനുഷികവുമായ പ്രവർത്തനങ്ങൾ മൂലമുണ്ടാകുന്ന മാറ്റങ്ങൾ കണ്ടെത്തുന്നതിന് എഐ ഉയർന്ന മിഴിവുള്ള ഉപഗ്രഹ ചിത്രങ്ങൾ വിശകലനം ചെയ്യും. വലിയ അളവിലുള്ള ഡാറ്റ വേഗത്തിലും കൃത്യമായും വിശകലനം ചെയ്തും ഈ സാങ്കേതികവിദ്യ തത്സമയ നിരീക്ഷണം മെച്ചപ്പെടുത്തുന്നു. ഡിജിറ്റൽ സാങ്കേതിക വിദ്യയ്ക്ക് സർക്കാർ പ്രവർത്തനങ്ങൾ മെച്ചപ്പെടുത്താനും, നിർമാണ പരിഷ്കാരങ്ങൾ കണ്ടെത്തുന്നതിനുള്ള കാര്യക്ഷമത വർധിപ്പിക്കാനും, സമയവും ചെലവും ലാഭിക്കാനും, നഗര ഭൂപ്രകൃതിയെ സംരക്ഷിച്ചുകൊണ്ട് നിയന്ത്രണങ്ങൾ പാലിക്കാനും എങ്ങനെ കഴിയുമെന്ന് ഈ സംവിധാനം ഉദാഹരണമാക്കുന്നുവെന്നും ചെയർമാൻ പ്രസ്താവിച്ചു.