അൽ ബാഹ മേഖലയിൽ മഴ; കാർഷിക മേഖലയ്ക്ക് ഉണർവ്

അൽ ബാഹ ∙ അൽ ബാഹ മേഖലയിൽ അടുത്തിടെ പെയ്ത മഴ പ്രാദേശിക കാർഷിക മേഖലയെ പുനരുജ്ജീവിപ്പിച്ചു. ഇത് പ്രദേശത്തെ പച്ചപ്പ് നിറഞ്ഞ ഭൂപ്രകൃതിയാക്കി മാറ്റി. സരവത് പർവതനിരകൾക്കിടയിൽ സ്ഥിതി ചെയ്യുന്ന അൽ-ബഹ ധാന്യം, ഗോതമ്പ്, ബാർലി, പഴത്തോട്ടങ്ങൾ, പച്ചക്കറി വയലുകൾ എന്നിവയുൾപ്പെടെ വൈവിധ്യമാർന്ന കാർഷിക ഭൂപ്രകൃതിയാണ്.

ഗവർണറേറ്റുകളിലുടനീളമുള്ള ഫാമുകൾ, വയലുകൾ, തോട്ടങ്ങൾ എന്നിവ കാലാനുസൃതമായ പഴങ്ങളുടെയും വിളകളുടെയും സമൃദ്ധമായ വിളവെടുപ്പ് കാലമായി മാറി. പൂക്കളുടെ വർണശബളമായ നിറങ്ങളും തുളസി, കാഞ്ഞിരം, എന്നിവയുടെ സുഗന്ധവും ഈ പ്രദേശത്തിന്റെ പ്രകൃതിഭംഗി കൂടുതൽ വർധിപ്പിക്കുന്നു. സമൃദ്ധമായ മഴ ഈ മേഖലയിലെ അണക്കെട്ടുകളും താഴ്‌വരകളും ഇതിനകം നിറഞ്ഞു.

കഴിഞ്ഞ ദിവസം പെയ്ത മഴയിൽ അൽബാഹയിലെ നാല് അണക്കെട്ടുകൾ നിറഞ്ഞു കവിഞ്ഞിരുന്നു. അവശ്യവിളകളുടെ ഉൽപ്പാദനം വർധിക്കാൻ കാരണമായ മഴയെ തുടർന്ന് മേഖലയിലെ കർഷകർ സന്തോഷം പ്രകടിപ്പിച്ചു. തക്കാളി, വെള്ളരി, സ്ട്രോബെറി എന്നിവ ഏറ്റവും പ്രധാനപ്പെട്ടവയാണ്. അവ പ്രാദേശിക ആവശ്യങ്ങൾ നിറവേറ്റുക മാത്രമല്ല മറ്റ് പ്രദേശങ്ങളിലേക്ക് കയറ്റുമതി ചെയ്യുകയും ചെയ്യുന്നു.