220 കി.മീ. വേഗത്തിൽ പാഞ്ഞു; ദുബായിൽ ഡ്രൈവർക്ക് 50,000 ദിർഹം പിഴ

ദുബായ് ∙ വാഹനത്തിന്റെ വേഗം കൂടിയത് അറിഞ്ഞില്ല, ഡ്രൈവർക്ക് പോയത് 50,000 ദിർഹം. ഷെയ്ഖ് മുഹമ്മദ് ബിൻ സായിദ് റോഡിലൂടെ 220 കിലോമീറ്റർ വേഗത്തിൽ പാഞ്ഞ ഡ്രൈവറെ പൊലീസ് കയ്യോടെ പൊക്കി പിഴയിട്ടു. സ്പീഡോമീറ്ററിൽ വേഗം 220 പിന്നിടുന്നതിന്റെ വിഡിയോ സഹിതം ഡ്രൈവറുടെ അമിതാവേശം പൊലീസ് പുറത്തു വിട്ടു.

ഡ്രൈവർ സീറ്റിൽ ഇരുന്നു തന്നെയാണ് വിഡിയോ എടുത്തതെന്നാണ് ആദ്യ സൂചന. അങ്ങനെയെങ്കിൽ അമിത വേഗത്തിൽ വാഹനം ഓടിച്ചതിനു പുറമെ മൊബൈൽ ഫോൺ ഉപയോഗിച്ചതിന്റെ പിഴ കൂടി അടയ്ക്കേണ്ടി വരും. കേസ് പബ്ലിക് പ്രോസിക്യൂഷനു കൈമാറി.