പ്രവാസികൾക്ക് സന്തോഷവാർത്ത: ദുബായ് മെട്രോയിലും ട്രാമിലും ഇ - സ്‌കൂട്ടറുകൾ കൊണ്ടുപോകാം

ദുബായ് ∙ ദുബായ് മെട്രോ യാത്രക്കാർക്ക് ഒരു സന്തോഷവാർത്ത; മെട്രോയിലും ട്രാമിലും യാത്രക്കാർക്ക്  ഇ-സ്‌കൂട്ടറുകൾ കൊണ്ടുപോകാമെന്ന് ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർടിഎ) അറിയിച്ചു. സീറ്റില്ലാത്തതും മടക്കാവുന്നതുമായ ഇ-സ്‌കൂട്ടറുകൾക്കാണ് മെട്രോയിലും ട്രാമിലും എല്ലാ പ്രവർത്തന സമയത്തും കൊണ്ടുപോകാൻ അനുവാദം നൽകിയത്. അവ 120സെ.മീ x 70സെ.മീ x 40സെ.മീറ്റർ വലിപ്പത്തിലുള്ളവയായിരിക്കണമെന്നും 20 കിലോയിൽ കൂടുതൽ ഭാരം പാടില്ലെന്നും വ്യക്തമാക്കി. 

പാലിക്കേണ്ട നിയമങ്ങൾ 
 ∙ ദുബായ് മെട്രോയിലോ ട്രാം പരിസരങ്ങളിലോ ഇ-സ്കൂട്ടർ ചാർജ് ചെയ്യാൻ പാടില്ല
 ∙ വാതിലുകൾ, സീറ്റുകൾ, ഇടനാഴികൾ അല്ലെങ്കിൽ അടിയന്തര സ്ഥലങ്ങൾ എന്നിവിടങ്ങളിൽ തടസ്സമുണ്ടാക്കരുത്
 ∙  ദുബായ് മെട്രോയിലോ ട്രാം പരിസരത്തോ നനഞ്ഞതോ വൃത്തികെട്ടതോ ആയ ഇ-സ്കൂട്ടറുകൾ അനുവദിക്കില്ല 
 ∙ സ്റ്റേഷനുകളിലോ നടപ്പാലങ്ങളിലോ ഇ-സ്കൂട്ടർ ഓടിക്കരുത് 
 ∙ സ്റ്റേഷനുകളിലേക്കോ പ്ലാറ്റ്‌ഫോമുകളിലേക്കോ ട്രെയിനുകളിലേക്കോ ട്രാമുകളിലേക്കോ പ്രവേശിക്കുമ്പോൾ ഇ-സ്‌കൂട്ടറുകൾ മടക്കിയിരിക്കണം.
 ∙ മെട്രോ അല്ലെങ്കിൽ ട്രാം പരിസരങ്ങളിൽ എല്ലാ സമയത്തും ഇ-സ്കൂട്ടർ പവർ ഓഫ് ചെയ്യുക 
 ∙ വസ്തുവകകൾക്ക് കേടുപാടുകൾ വരുത്താനോ മറ്റോ സാധ്യതയുള്ള,  നീണ്ടുനിൽക്കുന്ന ഭാഗങ്ങൾ മറയ്ക്കുകയോ ഒഴിവാക്കുകയോ ചെയ്യണം (ഹാൻഡിൽബാറുകളും സൈക്കിൾ പെഡലുകളും പോലുള്ളവ).
 ∙ ഇ-സ്‌കൂട്ടറുകൾ സുരക്ഷിതമായി കൊണ്ടുപോകുന്നതിന് യാത്രക്കാർ ഉത്തരവാദികളാണ് 
 ∙ മെട്രോ സ്‌റ്റേഷനുകളിൽ ചെക്ക് ഇൻ/ഔട്ട് ചെയ്യുമ്പോൾ ഇ-സ്‌കൂട്ടറുകൾ മടക്കിവയ്ക്കുകയും വിശാലമായ ഗേറ്റുകൾ ഉപയോഗിക്കുകയും വേണം. 
 ∙ എല്ലായ്‌പ്പോഴും സൂക്ഷ്മത പാലിക്കുകയും നിയമങ്ങൾക്കനുസൃതമായി  ഇ-സ്‌കൂട്ടറിനെക്കുറിച്ച് അറിഞ്ഞിരിക്കുകയും ചെയ്യുക 
 ∙ കേടായ ബാറ്ററികളില്ല, ഇരട്ട ബാറ്ററികളില്ല, പാരിസ്ഥിതിക മാലിന്യങ്ങൾ പുറന്തള്ളുന്നില്ല, ഉപയോഗിക്കുന്ന ബാറ്ററികൾ രാജ്യാന്തര മാനദണ്ഡങ്ങൾക്ക് അനുസൃതമാണ് (അതായത് യുഎൽ, ഐഇസി മുതലായവ) എന്ന് ഉറപ്പുവരുത്തണം.

യാത്രക്കാരുടെ സുരക്ഷ ഉറപ്പാക്കാൻ കഴിഞ്ഞ മാർച്ച് 1 മുതൽ മെട്രോയിലും ട്രാമിലും ഇ-സ്കൂട്ടറുകൾ നിരോധിക്കുമെന്ന് നേരത്തെ ആർടിഎ പ്രഖ്യാപിച്ചിരുന്നു.