ഇ-സ്കൂട്ടർ ഉപയോക്താക്കൾക്ക് ദുബായ് പൊലീസിന്‍റെ ബോധവത്കരണം

ദുബായ് ∙ ദുബായിൽ ഇ-സ്കൂട്ടർ ഉപയോക്താക്കൾക്ക് ബോധവത്കരണവുമായി ദുബായ് പൊലീസ്. ഗതാഗത വകുപ്പിന്‍റെ നേതൃത്വത്തിൽ നായിഫ് പൊലീസ് സ്റ്റേഷൻ, പോസറ്റീവ് സ്പിരിറ്റ് കൗൺസിൽ എന്നിവയുടെ സഹകരണത്തോടെയാണ് പരിപാടി സംഘടിപ്പിച്ചത്. ഗതാഗത നിയമം, റോഡ് സുരക്ഷ, ഇ-സ്കൂട്ടറുകൾക്ക് സഞ്ചരിക്കാൻ അനുമതിയുള്ള വഴികൾ എന്നിവയെക്കുറിച്ചാണ് ബോധവത്കരണം. പരിപാടിയിൽ പങ്കെടുത്തവർ പൊലീസിന്‍റെ നിർദേശാനുസരണം ബനിയാസ് സ്ട്രീറ്റ് വഴി സഞ്ചരിച്ചു.

ഇ-സ്കൂട്ടർ ഓടിക്കുന്നവർ ഹെൽമറ്റ് ധരിക്കണമെന്നും ഇ-സ്കൂട്ടറിന്‍റെ മുൻ വശത്ത് തിളക്കമുള്ള വെള്ള ലൈറ്റുകളും പിൻവശത്ത് തിളക്കമുള്ള ചുവന്ന ലൈറ്റുകളും സ്ഥാപിക്കണമെന്നും നായിഫ് പൊലീസ് സ്റ്റേഷൻ ആക്ടിങ് ഡയറക്ടർ ബ്രി. ഒമർ അഷർ മൂസ വ്യക്തമാക്കി. യാത്രയ്ക്ക് മുൻപ് ബ്രേക്ക് പരിശോധിക്കണമെന്നും ആവശ്യപ്പെട്ടു.