കൂടുതൽ നിക്ഷേപ സൗഹൃദമായി ഇന്ത്യ; യുഎഇ നിക്ഷേപകർക്ക് ഇനി 3 വർഷത്തിനകം തർക്കപരിഹാരം

അബുദാബി ∙ ഉഭയകക്ഷി നിക്ഷേപ കരാറിലെ നിബന്ധനകളിൽ യുഎഇക്ക് ഇന്ത്യ ഇളവു നൽകി. കഴിഞ്ഞ ഓഗസ്റ്റ് 31ന് നിലവിൽ വന്ന ഇന്ത്യ- യുഎഇ ഉഭയകക്ഷി നിക്ഷേപ ഉടമ്പടി (ബിഐടി) പ്രകാരമുള്ള പ്രാദേശിക തർക്കപരിഹാര കാലയളവ് 5 വർഷത്തിൽനിന്ന് 3 വർഷമാക്കിയാണ് കുറച്ചത്. അതോടെ, ഇന്ത്യയുടെ നിയമവ്യവസ്ഥകൾ അനുസരിച്ച് 3 വർഷത്തിനകം തർക്കങ്ങൾ പരിഹരിച്ചില്ലെങ്കിൽ യുഎഇക്ക് രാജ്യാന്തര കോടതിയെ സമീപിക്കാനാകും. 

 നിക്ഷേപകർക്കു തർക്കപരിഹാരം എളുപ്പമാക്കുന്ന തീരുമാനത്തിലൂടെ ഇന്ത്യ കൂടുതൽ നിക്ഷേപ സൗഹൃദമാകുമെന്നാണ് സൂചന. അതേസമയം, ഇന്ത്യയുടെ തീരുമാനങ്ങളെ വെല്ലുവിളിക്കുന്ന കേസുകളുടെ എണ്ണം ഈ ഇളവ് വരുന്നതോടെ വർധിച്ചേക്കുമെന്നു ഗ്ലോബൽ ട്രേഡ് റിസർച് ഇനിഷ്യേറ്റീവ് അഭിപ്രായപ്പെട്ടു. തർക്കം രാജ്യാന്തരതലത്തിലേക്കു പോകുന്നത് ഇന്ത്യയ്ക്ക് കൂടുതൽ ചെലവു വരുത്തും. അതിനാൽ, എത്രയും വേഗം പ്രാദേശികമായി പരിഹരിക്കാൻ ശ്രമിക്കുന്നതാണ് ഉചിതമെന്നും അവർ സൂചിപ്പിച്ചു.