നാല് മണിക്കൂർ വെയ്ക്കാം, സേവനം സൗജന്യം ; ഹറം പള്ളിയിൽ തീർഥാടകർക്ക് ലഗേജ് സൂക്ഷിക്കാൻ സൗകര്യം

മക്ക ∙ ഹറം പള്ളിയിൽ (മക്ക ഗ്രാൻഡ് മോസ്ക്) ഉംറ തീർഥാടകരുടെ വസ്തുക്കൾ  സൂക്ഷിക്കാൻ സൗജന്യ സ്റ്റോറേജ് സൗകര്യം. 7 കിലോ വരെയുള്ള സാധനങ്ങൾ 4 മണിക്കൂർ നേരത്തേക്കു സൂക്ഷിക്കാം. നിരോധിത വസ്തുക്കൾ, മരുന്ന്, വിലപിടിപ്പുള്ള ഉൽപന്നങ്ങൾ എന്നിവ സൂക്ഷിക്കാൻ അനുവദിക്കില്ല. സ്റ്റോറേജിൽ സൂക്ഷിക്കുമ്പോൾ നൽകുന്ന ടിക്കറ്റ് ഹാജരാക്കി വസ്തുക്കൾ തിരിച്ചെടുക്കാം. നിലവിൽ ഗ്രാൻഡ് പള്ളിയുടെ കഴക്കുഭാഗത്തെ ലൈബ്രറിക്കു സമീപവും പടിഞ്ഞാറു ഭാഗത്തെ ഗേറ്റ് 64ലുമാണ് ഈ സൗകര്യം ലഭിക്കുക. 

ഭാവിയിൽ മറ്റു കവാടങ്ങൾക്കു സമീപവും ലഭ്യമാക്കും. സ്റ്റോറേജ് ആവശ്യമുള്ളവർ നുസുക് ആപ്പിലൂടെയാണ് സേവനം ബുക്ക് ചെയ്യേണ്ടത്. സ്വദേശികൾക്കും മലയാളികളടക്കം വിദേശ രാജ്യങ്ങളിൽനിന്നുള്ളവർക്കും സുഗമമായ തീർഥാടനം ഉറപ്പാക്കുന്നതിന്റെ ഭാഗമായാണ് നടപടിയെന്ന് അധികൃതർ അറിയിച്ചു.