പ്രാർഥനാസമയത്ത് റോഡുകളിൽ വാഹനം നിർത്തിയിടരുത്; മുന്നറിയിപ്പുമായി ദുബായ് പൊലീസ്

ദുബായ്∙ റമസാനിൽ പ്രാർഥനാ സമയങ്ങളിൽ റോഡിൽ വാഹനം നിർത്തി ഗതാഗത തടസ്സം സൃഷ്ടിക്കരുതെന്ന് ദുബായ് പൊലീസ്. തറാവീഹ്, ഖിയാമുല്ലൈൽ എന്നിവയിൽ പങ്കെടുക്കാൻ റോഡിൽ വാഹനം നിർത്തി പോകുന്നതുമൂലം പലയിടങ്ങളിലും ഗതാഗത തടസ്സവും ഗതാഗത കുരുക്കും അനുഭവപ്പെട്ടിരുന്നു. റസിഡൻഷ്യൽ മേഖലകളിലാണ് ഈ പ്രവണത  വ്യാപകം. 

പാർക്കിങ്ങിലാണ് വാഹനം നിർത്തിയിടേണ്ടതെന്നും ഗതാഗതത്തിന് തടസ്സമാകുംവിധം നിർത്തിയവ നീക്കം ചെയ്യുമെന്നും സൂചിപ്പിച്ചു. മസ്ജിദുകൾക്ക് സമീപമുള്ള പാർക്കിങ്ങുകളിൽ ദീർഘനേരം നിർത്തിയിടരുതെന്നും പ്രാർഥനയ്ക്ക് എത്തുന്നവരുടെ അവസരം നിഷേധിക്കരുതെന്നും ഓർമിപ്പിച്ചു.