‘ കേന്ദ്രം അന്വേഷണം നടത്തിയില്ല’; വിഷ്ണുവിനെ തേടി കുടുംബം ഹൈക്കോടതിയിലേക്ക്

അമ്പലപ്പുഴ ∙ കപ്പലിൽ നിന്നു കടലിൽ വീണു കപ്പൽ ജീവനക്കാരൻ പുന്നപ്ര പറവൂർ വൃന്ദാവനത്തിൽ വിഷ്ണു ബാബുവിനെ (25)കാണാതായ സംഭവത്തിൽ കുടുംബം അടുത്ത ദിവസം ഹൈക്കോടതിയിൽ  ഹർജി നൽകും.

വിഷയത്തിൽ  കേന്ദ്ര, സംസ്ഥാന സർക്കാരുകൾ ഇടപെടണമെന്നാണ്  മാതാപിതാക്കളായ ബാബു കരുണാകരന്റെയും സിന്ധു ബാബുവിന്റെയും ആവശ്യം.  വിദേശ കാര്യ മന്ത്രാലയവും കേന്ദ്ര ഷിപ്പിങ് മന്ത്രാലയവും ഒരു അന്വേഷണവും നടത്തിയില്ലെന്നും മാതാപിതാക്കൾ പറഞ്ഞു. ഒഡീഷയിൽ നിന്ന് ചൈനയിലേക്ക് പോയ ഐഎസ്ഐ റസല്യുട്ട് എന്ന ചരക്കു കപ്പലിലെ ജീവനക്കാരനാണ് വിഷ്ണു. മലേഷ്യയ്ക്കും സിംഗപ്പൂരിനും ഇടയിൽ കടലിൽ വച്ച്  കഴിഞ്ഞ ജൂലൈ 17ന്  രാത്രിയിലാണ്  കാണാതായത്.