ശ്വാസമടക്കി ത്രില്ലർ പോര് കണ്ട് അമേരിക്കയിലെ ക്രിക്കറ്റ് പ്രേമികൾ; ഇന്ത്യൻ ജയത്തിൽ ‘ആഘോഷപൂരം’

ഡാലസ് ∙ 17 വർഷത്തിന് ശേഷം ലോക കിരീടത്തിൽ ഇന്ത്യൻ ടീം മുത്തമിട്ടതിന്‍റെ ആഘോഷത്തിലാണ് ക്രിക്കറ്റ് പ്രേമികൾ. ഇന്ത്യയിൽ മാത്രമല്ല വിദേശരാജ്യങ്ങളിലും ഇന്ത്യക്കാരും ഇന്ത്യൻ വംശജരുമായ ക്രിക്കറ്റ് പ്രേമികൾ ഇന്ത്യയുടെ വിജയം വിപുലമായ തോതിൽ ആഘോഷമാക്കി മാറ്റുകയാണ്. അത്തരത്തിൽ ഒരു ആഘോഷമാണ് അമേരിക്കയിലെ ഡാലസിലും നടന്നത്. 

ഇന്ത്യ–ദക്ഷിണാഫ്രിക്ക തത്സമയ  മത്സരം ടിവിയിൽ കാണുന്നതിന് ശനിയാഴ്ച രാവിലെ പ്ലാനോ കുമാർ ഇന്ത്യൻ  റസ്റ്ററന്‍റിൽ ഡാലസ് ഫോർട്ട് വർത്തിലെ ക്രിക്കറ്റ് കളിക്കാരും പ്രേമികളും ഒത്തുചേർന്നു.ആദ്യം ബാറ്റു ചെയ്ത ഇന്ത്യൻ ബാറ്റസ്മാൻമാരുടെ പ്രകടനം ഹർഷാരവത്തോടെയാണ് കാണികൾ ആസ്വദിച്ചത്. ഒരു  ഘട്ടത്തിൽ മുപ്പതുബോളിൽ മുപ്പതു റൺസ് നേടി വിജയം ദക്ഷിണാഫ്രിക്കയ്ക്കു അനുകൂലമാകുമെന്നത് കാണികളിൽ നിരാശ പടർത്തിയെങ്കിലും സന്ദർഭത്തിനൊത്തുയർന്ന  ഇന്ത്യൻ ബൗളർമാരുടെ അവിശ്വസനീയ പ്രകടനം ശ്വാസമടക്കിപിടിച്ചാണ് കാണികൾ ആസ്വദിച്ചത് . വിജയം സുനിശ്ചിതമായതോടെ കാണികളുടെ ആഹ്ലാദ പ്രകടനം അണപൊട്ടിയൊഴുകി .അജു മാത്യു, ടോണി അലക്സാണ്ടർ, എബിൻ വർഗീസ്, മാറ്റ് സെബാസ്റ്റ്യൻ, ബാബു സൈമൺ എന്നിവരുടെ നേതൃത്വത്തിലായിരുന്നു ഡാലസിലെ ക്രിക്കറ്റ് പ്രേമികൾ ഇന്ത്യയുടെ വിജയം ആഘോഷിച്ചത്.