കലിഫോർണിയയിൽ ഓം ശാന്തി ധ്യാനകേന്ദ്രം പ്രവർത്തനം ആരംഭിച്ചു

കലിഫോർണിയ ∙  ബ്രഹ്മാകുമാരിസ് സിലിക്കൺ വാലി പുതിയ ഓം ശാന്തി ധ്യാനകേന്ദ്രത്തിന്‍റെ ഉദ്ഘാടനം നിർവഹിച്ചു. ചടങ്ങിൽ സിസ്റ്റർ മോഹിനി, സിസ്റ്റർ ജയന്തി, ബ്രഹ്മാകുമാരികളുടെ അഡീഷനൽ അഡ്മിനിസ്‌ട്രേറ്റീവ് മേധാവികൾ എന്നിവർ പങ്കെടുത്തു.

സിസ്റ്റർ കുസുമം കെജ്‌രിവാളിന്‍റെ നേതൃത്വത്തിൽ ബ്രഹ്മാകുമാരിസ് സിലിക്കൺ വാലി 28 വർഷത്തിലേറെയായി ബേ ഏരിയയിൽ സേവനമനുഷ്ഠിച്ചുവരുന്നു. ഓം ശാന്തി ധ്യാനകേന്ദ്രം പ്രാദേശിക സമൂഹത്തിന് രാജയോഗ ധ്യാനത്തിന്‍റെ പരിവർത്തനഫലങ്ങൾ വാഗ്ദാനം ചെയ്യുന്ന ഇടമാണെന്ന് സംഘടന അറിയിച്ചു. എല്ലാ മത-സാംസ്കാരിക പശ്ചാത്തലങ്ങളിൽ നിന്നുമുള്ള ആളുകൾക്കുമായിട്ടാണ് ഈ ധ്യാനകേന്ദ്രം തുറന്നിരിക്കുന്നത്.ആളുകളെ മികച്ച വ്യക്തിത്വം കണ്ടെത്താനും രൂപപ്പെടുത്താനും പ്രാപ്തരാക്കുക എന്ന ലക്ഷ്യത്തോടെ, ധ്യാനകേന്ദ്രം ആത്മീയ പരിപാടികൾ, വ്യക്തിഗത വികസന പരിപാടികൾ, കുട്ടികൾക്ക് മൂല്യാധിഷ്ഠിത വിദ്യാഭ്യാസം എന്നിവ നൽകും. രാജയോഗത്തിന്‍റെയും ധ്യാനത്തിന്‍റെയും പരിവർത്തന ഗുണങ്ങൾ അനുഭവിക്കാനും സാക്ഷ്യം വഹിക്കാനും ഇത് മികച്ച സ്ഥലമായിരിക്കും എന്ന് സംഘടന അറിയിച്ചു.