ഇന്ത്യയിൽ കോവിഡ് രൂപം മാറിയാൽ നേരിടാനാകുമോ? പേടികൂട്ടുന്ന വകഭേദങ്ങൾ

ചൈനയിലെത്തിയ 3 മലയാളികൾ ദിവസങ്ങൾക്കു മുൻപ് സമൂഹമാധ്യമങ്ങളിൽ ഒരു വിഡിയോ പങ്കുവച്ചു. കോവിഡിന്റെ കാര്യത്തിൽ ലോകം പറയും പോലെ അവിടെ ഭീകരാന്തരീക്ഷം ഒന്നുമില്ലെന്നായിരുന്നു വിഡിയോയുടെ ചുരുക്കം. എന്നാ‍ൽ, രാജ്യാന്തര വാർത്താ ഏജൻസികളും പത്ര–ദൃശ്യമാധ്യമങ്ങളും ചൈനയിലെ സ്ഥിതി അതിരൂക്ഷമാണെന്നും യഥാർഥ വിവരം ചൈന മറച്ചുവയ്ക്കുകയാണെന്നും സൂചിപ്പിക്കുന്ന റിപ്പോർട്ടുകൾ നൽകിക്കൊണ്ടേയിരിക്കുന്നു. ഇതിനിടയ്ക്കു കഴിഞ്ഞദിവസം ലോകാരോഗ്യ സംഘടനയുടെ വിദഗ്ധ സംഘം ചൈനയുമായി നടത്തിയ വിഡിയോ കോൺഫറൻസ് യോഗത്തിലും ഇതേകാര്യം ആവർത്തിച്ചതോടെ ഒരു കാര്യം വ്യക്തമായിരിക്കുന്നു. സ്ഥിതി രൂക്ഷമാണെങ്കിലും ഇല്ലെങ്കിലും ചൈന തന്നെയാണ് ഇക്കുറിയും കോവിഡ് വ്യാപനത്തിന്റെയോ അതുസംബന്ധിച്ച ആശങ്കകളുടെയോ പ്രഭവ കേന്ദ്രം.

ചൈനയിലെ വുഹാനിലായിരുന്നു ആദ്യ കൊറോണ വൈറസ് ബാധയുടെ സ്ഥിരീകരണം. അതുകൊണ്ടുതന്നെ ചൈന കോവിഡിന്റെ പ്രഭവ കേന്ദ്രമായി കരുതപ്പെട്ടു. ഇതിൽ അൽപം രാഷ്ട്രീയം കൂടി ചേർത്ത് അമേരിക്കൻ പ്രസിഡന്റ് കൊറോണയെ ‘ചൈനീസ് വൈറസ്’ എന്നു പോലും വിളിച്ചു. പക്ഷേ കോവിഡിന്റെ പല വ്യാപന തരംഗങ്ങൾ ലോകമെങ്ങും അലയടിച്ചപ്പോഴും കുലുങ്ങാതെ നിൽക്കാൻ ചൈനയ്ക്കായിരുന്നു. രണ്ടു വർഷത്തിനിടെ ഒരു ലക്ഷത്തിൽ താഴെ കേസുകൾ മാത്രമായിരുന്നു ചൈന ലോകത്തോടു റിപ്പോർട്ട് ചെയ്തത്. കോവിഡ് നിയന്ത്രണത്തിനായി ഏർപ്പെടുത്തിയ കർശന നിയന്ത്രണ നടപടികളായിരുന്നു വലിയ വ്യാപനത്തിൽനിന്നു ചൈനയെ രക്ഷപ്പെടുത്തിയതെന്നാണ് വിലയിരുത്തലുകൾ. ഈ കർശന നടപടികളെ ‘സീറോ കോവിഡ് പ്ലാൻ’ എന്നായിരുന്നു ചൈന തന്നെ വിശേഷിപ്പിച്ചത്. ലോകത്താകെ സ്ഥിതി ശാന്തമായെന്നു കണ്ടപ്പോൾ നിയന്ത്രണങ്ങൾ ചൈനയും ഒഴിവാക്കി. ഇതോടെ അടക്കിപ്പിടിച്ചിരുന്നതെല്ലാം പുറത്തുചാടി എന്നതു പോലെയായി സ്ഥിതി. ചൈനയുടെ ‘സീറോ കോവിഡ് പ്ലാൻ’ കോവിഡിനെ സംബന്ധിച്ചിടത്തോളം ‘സീറോ പ്ലാനായി’ മാറിയ അവസ്ഥ.

ഒരാഴ്ചയ്ക്കുള്ളിൽ ചൈനയിൽ കോവിഡ് കേസുകൾ പാരമ്യത്തിലെത്തുമെന്നാണു പ്രവചനങ്ങൾ. അങ്ങനെ വന്നാൽ പ്രതിദിനം 37 ലക്ഷം കേസുകളും കാൽലക്ഷത്തോളം മരണവുമാണ് യുകെയിലെ ഗവേഷണസ്ഥാപനമായ എയർഫിനിറ്റി പ്രവചിച്ചിരിക്കുന്നത്. ജനുവരി 13ഓടെയുള്ള ആദ്യ കോവിഡ് പാരമ്യത്തിനു ശേഷം ഇതു കുറയുകയും വീണ്ടും മാർച്ച് ആദ്യവാരം കേസുകൾ വീണ്ടും വർധിക്കുമെന്നും കമ്പനി കണക്കുകൂട്ടുന്നു. മേയ് മാസത്തിലെ കേസുകൾ കുറയുവെന്നാണു പ്രവചനം. ചൈനയ്ക്കു പുറമേ, ജപ്പാൻ, ദക്ഷിണ കൊറിയ, ഫ്രാൻസ്, യുഎസ്, തായ്‌ലൻഡ് തുടങ്ങി കൂടുതൽ രാജ്യങ്ങളിൽ കോവിഡ് ശക്തമാകുന്നുവെന്നാണു റിപ്പോർട്ട്. പ്രതിദിനം 5 ലക്ഷത്തോളം കേസുകൾ വീതം കഴിഞ്ഞ ആറാഴ്ചയായി ലോകത്തു റിപ്പോർട്ട് ചെയ്യുന്നുണ്ടെന്നും കണക്കുകളിലുണ്ട്. ചൈന, ജപ്പാൻ എന്നിവിടങ്ങളിൽ ലക്ഷത്തിൽ പരം കേസുകളുണ്ടെങ്കിൽ യൂറോപ്പ്, ഹോങ്കോങ്, മെക്സിക്കോ, യുഎസ്, ദക്ഷിണകൊറിയ, തയ്‌വാൻ എന്നിവിടങ്ങളിൽ കേസുകൾ പതിനായിരം കടന്നു.

∙ ഇന്ത്യയിലെന്താകും സ്ഥിതി?

ലോകത്തെങ്ങുമുള്ള ആശങ്കാസാഹചര്യം ഇതുവരെ ഇന്ത്യയിൽ പ്രകടമായിട്ടില്ലെന്ന് ആരോഗ്യമന്ത്രാലയം പറയുന്നുവെന്നു മാത്രമല്ല, കണക്കുകളിലും വ്യക്തമാണ്. പുതിയ കോവിഡ് കേസുകളും ചികിത്സയിൽ തുടരുന്നവരുടെ എണ്ണവും സംശയാസ്പദമായി വർധിക്കുന്നില്ല. അതുകൊണ്ടുതന്നെ കൂടുതൽ നിയന്ത്രണങ്ങളുടെ സാഹചര്യമില്ല എന്നാണ് ആരോഗ്യമന്ത്രാലയത്തിന്റെ വിലയിരുത്തൽ. എന്നാൽ, പൊതുവേ സ്വീകരിക്കേണ്ട ജാഗ്രത നടപടികൾക്കും മുൻകരുതലിനുമുള്ള അവസരമായി ചൈനയിലെ സ്ഥിതി കാണാനും തയാറെടുപ്പു നടത്താനും കഴിഞ്ഞുവെന്നതാണ് ഇന്ത്യയ്ക്കുള്ള നേട്ടം. പുതിയൊരു വകഭേദമോ വ്യാപനമോ ഉണ്ടായാൽ തിരിച്ചറിയാൻ നമുക്കു കഴിയുമോ എന്ന ചോദ്യമാണ് കോവിഡിന്റെ കാര്യത്തിൽ ശേഷിക്കുന്ന ചോദ്യം. ഇതേക്കുറിച്ചു പ്രമുഖ വൈറോളജിസ്റ്റ് ഡോ. ഗഗൻദീപ് കാങ് ‘മനോരമ’യ്ക്ക് അനുവദിച്ച അഭിമുഖത്തിൽ ഇങ്ങനെ പറഞ്ഞു:

‘രാജ്യത്തിപ്പോൾ മതിയായ ജനിതക ശ്രേണീകരണ സംവിധാനമുണ്ട്. യഥാവിധി ഇതു നടക്കുകയും ആശുപത്രികളിൽ ഗുരുതര കോവിഡ് കേസുകൾ റിപ്പോർട്ട് ചെയ്യപ്പെടുകയും ചെയ്താൽ നമുക്കു സ്ഥിതി മനസ്സിലാകും. ഒരുതരത്തിൽ ഇപ്പോഴുണ്ടായ ജാഗ്രത ഗുണം ചെയ്യും. അപകടാവസ്ഥ ഇല്ലാതെ തന്നെ ഇന്ത്യ ജാഗ്രതയിലായി. വാക്സീന്റെ പ്രാഥമിക ഡോസുകൾ മികച്ച നിലയിൽ നൽകി, പല തരംഗങ്ങളിലായി 90% പേർക്കും വൈറസ് ബാധയേറ്റു എന്നീ ഘടകങ്ങൾ കോവിഡിനെതിരെ ഇന്ത്യയ്ക്കു കൂടുതൽ ശക്തമായ സങ്കര പ്രതിരോധം (hybrid immunity) നൽകും. അതേസമയം, വാക്സീൻ ഫലപ്രാപ്തി കുറഞ്ഞുവരുമെന്ന കാര്യത്തിൽ ഇന്ത്യയിൽനിന്ന് ഡേറ്റ ഇല്ലെങ്കിലും പുറംരാജ്യങ്ങളിൽ നിന്നുണ്ട്. മുതിർന്നവർക്കെങ്കിലും ബൂസ്റ്റർ ഡോസ് വേണം’.

∙ പേടികൂട്ടുന്ന വകഭേദങ്ങൾ

കഴിഞ്ഞ ദിവസം ലോകാരോഗ്യ സംഘടന തന്നെ വൈറസിന്റെ ഉപവിഭാഗമായ ഒമിക്രോണിനു പുതിയ ഉപവിഭാഗങ്ങൾ (ലീനിയേജ്) ഉണ്ടാകുന്നതിന്റെ ആശങ്ക പങ്കിട്ടിരുന്നു. വലിയ ജനസംഖ്യയും രോഗവ്യാപന സാധ്യതയും ഏറിയ ഇന്ത്യയെ സംബന്ധിച്ച് ഇതു വലിയ പ്രശ്നമാണ്. ഒമിക്രോണിന്റെ നൂറുകണക്കിനു ഉപവിഭാഗങ്ങൾ ആശങ്ക നൽകുന്നതിനാൽ വരുംദിവസങ്ങളിൽ പലയിടത്തായി വൈറസ് വ്യാപനം ഉണ്ടാകാമെന്ന മുന്നറിയിപ്പാണ് ലോകാരോഗ്യ സംഘടന നൽകുന്നത്. ചൈനയിൽ ഇപ്പോൾ ആശങ്ക നൽകുന്ന ബിഎഫ്.7, യുഎസിലും സിംഗപ്പൂരിലും വ്യാപനത്തിനു കാരണമാകുന്ന എക്സ്ബിബിയുടെ തന്നെ ലീനിയേജുകൾ എന്നിവയുടെ സാന്നിധ്യം ഇന്ത്യയിലുമുണ്ട്. ഇതിൽ, യുഎസിൽ വീണ്ടും മിന്നൽവേഗത്തിൽ കോവിഡ് വ്യാപനത്തിനു കാരണമാകുന്ന ഒമിക്രോണിന്റെ തന്നെ ‘എക്സ്ബിബി.1.5’ ലീനിയേജിന്റെ സാന്നിധ്യം ഡിസംബറിൽ സ്ഥിരീകരിച്ചതാണ് ഇന്ത്യയിലെ പുതിയ ആശങ്ക. എക്സ്ബിബിയിൽ വീണ്ടും ചില ജനിതക മാറ്റങ്ങൾ സംഭവിച്ചതാണ് ഈ പുതിയ ലീനിയേജ്. കൂടുതൽ വ്യാപനശേഷിയുള്ളതാക്കി മാറ്റുന്നതാണ് ജനിതക മാറ്റമെന്നും വിലയിരുത്തലുകളുണ്ട്.