12 ലക്ഷത്തിനു സൂപ്പർ വീട്! ചൂട് കാലത്തും ഇവിടം കൂൾ; പ്ലാൻ

പാലക്കാട് ജില്ലയിലെ കൈലിയാട് എന്ന സ്ഥലത്തെ വിശാലമായ എട്ടേക്കർ പ്ലോട്ടിലാണ് ഷാനവാസ് ഖാന്റെ ഈ ഫാം ഹൗസ് സ്ഥിതി ചെയ്യുന്നത്. പൊതുവെ ചൂട് കൂടിയ പ്രദേശമാണ് ഇവിടം. അതിനാൽ ചൂടിനെ പ്രതിരോധിക്കുംവിധമാണ് വീടിന്റെ നിർമാണം. കണ്ടാൽ വിശാലമായ ഇരുനില വീട് എന്നുതോന്നുമെങ്കിലും വെറും 700 ചതുരശ്രയടി മാത്രമാണ് വിസ്തീർണം. സിറ്റൗട്ട്, ലിവിങ്, ഡൈനിങ്, കിച്ചൻ, രണ്ടു കിടപ്പുമുറികൾ, ബാത്റൂം, ബാൽക്കണി എന്നിവയാണ് ഇവിടെ ഒരുക്കിയത്.

മേൽക്കൂര ട്രസ് വർക്ക് ചെയ്തു പഴയ മംഗലാപുരം ഓട് വിരിച്ചു. അതിനടിയിൽ ഫൈബർ സിമന്റ് ബോർഡ് വിരിച്ചു. കുന്നിൻപ്രദേശമായതിനാൽ കരിങ്കല്ലുപയോഗിച്ച്  RCC വർക്ക് ചെയ്താണ് അടിത്തറ ഉറപ്പോടെ പണിതത്. 

മണ്ണും സിമന്റും പ്രത്യേക അനുപാതത്തിൽ കൂട്ടിക്കുഴയ്ക്കുന്ന റാംഡ് എർത്ത് ശൈലിയിലാണ് പുറംചുവരുകൾ നിർമിച്ചത്. ഫില്ലർ സിമന്റിനു പകരം മണ്ണും കുമ്മായവും ഉപയോഗിച്ചാണ് വെട്ടുകല്ലുകൾ ഫിൽ ചെയ്തത്. വീടിനുള്ളിലെ പ്ലാസ്റ്ററിങ്ങിനും സിമന്റ് ഒഴിവാക്കി. സുർക്കി മിശ്രിതം കൊണ്ടാണ് പ്ലാസ്റ്ററിങ് ചെയ്തത്.

പുറത്തെ കാറ്റും കാഴ്ചകളും നന്നായി ലഭിക്കാൻ വലിയ ജാലകങ്ങൾ നൽകി. മൈൽഡ് സ്റ്റീലും അലുമിനിയവും കൊണ്ടാണ് ജനലുകൾ പണിതത്. അങ്ങനെ തടിയുടെ ഉപയോഗം നിയന്ത്രിച്ചു.

സ്ട്രക്ചറും ഫർണിഷിങ്ങും സഹിതം വെറും 12 ലക്ഷം രൂപയ്ക്ക് പണി പൂർത്തിയാക്കി എന്നതാണ് ഹൈലൈറ്റ്. ചെലവ് കുറഞ്ഞ പ്രകൃതിദത്ത നിർമാണസാമഗ്രികൾ ഉപയോഗിച്ചതാണ് വീടിന്റെ ബജറ്റ് കുറയ്ക്കാൻ സഹായകരമായത്. കരിമ്പനകൾ നിറഞ്ഞ പ്രദേശത്ത് ചൂടേറിയ പാലക്കാടൻ കാറ്റ് വീശിയടിക്കുന്നുണ്ടെങ്കിലും വീടിനുള്ളിൽ അതൊന്നും അറിയുകയേയില്ല എന്നതാണ് നിർമാണത്തിലെ വിജയം.

Project facts

Location- Kailiyaad, Palakkad

Plot- 8 Acre

Area- 710 SFT

Owner- Shanavas Khan

Designer- Mohammed Yasir

Earthen Sustainable Habitats, Calicut

Mob- 9895043270

Completion year- Dec 2019

English Summary- 12 Lakh Farm House Palakkad