പ്രകൃതിക്ഷോഭങ്ങളിൽ നിന്ന് വീട് സുരക്ഷിതമാക്കാം: വേണം മുൻകരുതൽ

∙വീട് പണിയുവാനുള്ള സ്ഥലം / പ്ലോട്ട് തിരഞ്ഞെടുക്കുമ്പോൾ തന്നെ മണ്ണു പരിശോധനയും, മണ്ണിന്റെ ജല ആഗിരണശേഷിയും വെള്ളക്കെട്ടും പരിശോധിക്കണം. വെള്ളക്കെട്ടുള്ള സ്ഥലങ്ങൾ പൂർണമായും ഒഴിവാക്കപ്പെടണം. 

∙പ്ലോട്ടിലെ മരങ്ങൾ കഴിവതും മുറിക്കരുത്. ചെറിയ തോട്, നീർക്കുഴികൾ ഇവ മണ്ണിട്ട് നികത്തി വീട് പണി ചെയ്താൽ ഭാവിയില്‍ ഫൗണ്ടേഷൻ ഇരുന്നുപോകാൻ സാധ്യതയുണ്ട്. 

∙ചരിവുള്ള ഭൂമി കട്ട് ചെയ്ത് മണ്ണു മാറ്റിയുള്ള വീട് നിർമാണവും അപകടം ക്ഷണിച്ചു വരുത്തും. വലിയ തോതിലുള്ള മഴക്കാലത്ത് മുകൾഭാഗത്ത് വെള്ളമിറങ്ങി ഉരുൾപൊട്ടലും മണ്ണിടിച്ചിലും സംഭവിക്കാൻ സാധ്യത കൂടുതലാണ്. 

∙വെള്ളത്തിന്റെ സ്വാഭാവിക ഒഴുക്ക് തടസ്സപ്പെടുത്തിയും വീട് നിർമാണത്തിന് തുനിയരുത്. അപ്പോൾ പിന്നീടുണ്ടാവാനിടയുള്ള നാശനഷ്ടം ഒഴിവാക്കാനും സാധിക്കും. 

∙നദികളുടെ റെഗുലേഷൻ സോണിൽ നിന്നും സുരക്ഷിത അകലെ മാത്രമേ വീട് നിർമാണം പാടുള്ളൂ. നദികൾ കരകവിഞ്ഞ് ഒഴുകിയ ദൂരത്തു നിന്നും കൂടുതൽ അകലം പാലിച്ചു വേണം പുതിയ ഗൃഹനിർമാണം നടത്തുവാന്‍. 

∙വീടുപണി ആരംഭിക്കുന്നതിനു മുൻപേ ട്രയൽ കുഴി എടുത്ത് ഏതു തരം അടിത്തറയാണ് വേണ്ടതെന്ന് വിദഗ്ധ എൻജിനീയറെക്കൊണ്ട് പരിശോധിപ്പിച്ചു തന്നെ തീരുമാനിക്കണം. 

∙പല വീടുകളുടെയും പറമ്പുകളുടെയും ഇടയിലൂടെയുള്ള കൈത്തോടുകൾ ഒരിക്കലും നികത്തരുത്. വെള്ളത്തിന്റെ സ്വാഭാവിക ഒഴുക്ക് തടസ്സപ്പെടാതെ വേണം വീട് നിർമിക്കാൻ. 

∙വീടുപണി പൂർത്തിയാകുമ്പോൾതന്നെ ഉറവിടത്തിൽ മാലിന്യ സംസ്കരണം നടത്താനുള്ള സാഹചര്യവും ഒരുക്കണം. പ്രളയത്തിനൊടുവിൽ നദികൾ തിരിച്ചു നൽകിയ മാലിന്യക്കൂമ്പാരം ഒരു പാഠമായിരിക്കട്ടെ. 

∙വെള്ളപ്പൊക്കസാധ്യതയുള്ള സ്ഥലങ്ങളിൽ കോളം, പ്ലിന്ത്ബീം ഫൗണ്ടേഷൻ നൽകി ഉയരത്തിൽ വീട് നിർമിച്ച് അടിഭാഗം കാലിയാക്കി ഇടണം. വെള്ളത്തിന്റെ സ്വാഭാവിക ഒഴുക്ക് തടസ്സപ്പെടാതെയുള്ള ഗൃഹനിർമാണത്തിന് കൂടുതൽ ഊന്നൽ നൽകണം.

∙കോൺക്രീറ്റ് തൂണുകൾക്ക് മുകളിലായി ഭാരം കുറച്ച് വീടുകൾ പണിതാൽ ചെലവ് കുറയ്ക്കാം. ഒപ്പം വെള്ളപ്പൊക്ക ഭീഷണിയെയും, ഭൂകമ്പത്തെയും പ്രതിരോധിക്കാൻ കഴിയും. 

∙കോൺക്രീറ്റ് വീടുകളുടെ അടിത്തറ പി.സി.സി. കോൺക്രീറ്റിന് മുകളില്‍ കരിങ്കല്ല് സിമന്റിട്ടു തന്നെ പണിയാൻ ശ്രദ്ധിക്കണം. വീടിന്റെ അടിത്തറയിലെ ഈർപ്പസാധ്യത കുറയ്ക്കാൻ ആർ. ആർ. ഫൗണ്ടേഷന് ഒരു പരിധിവരെ സാധിക്കും. ബെയ്സ്മെന്റിന്റെ ഉയരം കൂട്ടി നിർമിക്കുവാനും ശ്രദ്ധിക്കണം. 

∙ഒരുനില വീടുകൾക്ക് കോണുകളിൽ നൽകുന്ന കോൺക്രീറ്റ് കോർണർ പില്ലറുകൾ പ്രളയശേഷമുള്ള ഭിത്തിയിലെ പൊട്ടലിനും ബലക്കുറവിനും എതിരെയുളള പരിഹാരമാർഗമാണ്. 

∙നമ്മുടെ പ്ലോട്ടിലെ / പറമ്പിലെ വെള്ളം പുറത്തേക്ക് ഒഴുകുവാനുള്ള ഓടയും, ചെരിവും നൽകണം. ഒപ്പം പൊതുവായുള്ള റോഡിലെ ഓടയും അടയാതെ സൂക്ഷിക്കണം. 

∙ഉറപ്പുള്ള മണ്ണിലാണെങ്കിലും സെല്ലാർ ഫ്ളോർ പണിയുമ്പോൾ കരിങ്കല്ല് കെട്ടിനു പകരം കോൺക്രീറ്റ് വാൾ (Retaining Wall) തന്നെ നിർമിക്കുക. 

∙വീടിന്റെ ബെയ്സ്മെന്റിനു മുകളിൽ നൽകുന്ന ഡി.പി.സി. ബെൽറ്റിന് കുറഞ്ഞത് 15 സെ.മീ. കനത്തിൽ ബീം കണക്കെ കമ്പികൾ സ്റ്റിറപ്പിട്ട് കെട്ടി വാർക്കാൻ ശ്രദ്ധിക്കണം. ഒപ്പം ഗുണമേന്മയുള്ള M20(1:1.5:3) കോൺക്രീറ്റ് തന്നെ ഉപയോഗിക്കുവാനും മറക്കരുത്.

∙മുൻപ് ഉരുൾപൊട്ടലോ, മണ്ണിടിച്ചിലോ വന്ന പ്രദേശങ്ങൾ പൂർണമായും വീട് നിർമാണത്തിന് അനുയോജ്യമല്ല എന്നു തിരിച്ചറിയണം.

English Summary- Protect House from Natural Calamities- Precautions