പുസ്തകമെഴുത്തിൽ ‘ദീദി’ സെഞ്ചുറി കടന്നു; മമതാ ബാനർജിയെക്കുറിച്ച് പ്രസാധകർക്ക് പറയാനുള്ളത്

ബംഗാളി ഭാഷയിൽ 6 പുസ്തകങ്ങൾ, ഇംഗ്ലിഷിൽ 7 എണ്ണം. ഉറുദുവിൽ മറ്റൊന്ന്. ബംഗാൾ മുഖ്യമന്ത്രി മമത ബാനർജി എഴുതിയ പുതിയ പുസ്തകങ്ങളുടെ കണക്കാണിത്. കഴിഞ്ഞദിവസം തുടങ്ങിയ കൊൽക്കത്ത പുസ്തകമേളയിൽ ഈ 14 പുസ്തകങ്ങളുടെ പ്രകാശനം നടന്നതോടെ പുസ്തകമെഴുത്തിൽ ‘ദീദി’ സെഞ്ചുറി കടന്നു. 

ഇപ്പോൾ ആകെ 102 പുസ്തകങ്ങളാണു ചിത്രകാരി കൂടിയായ മമതയുടെ പേരിലുള്ളത്. പുസ്തകവിഷയ ങ്ങളായി രാഷ്ട്രീയവും ചരിത്രവും സംസ്കാരവും സ്മരണകളും നിയമസഭാപ്രസംഗങ്ങളും മുതൽ കവിത വരെയുണ്ട്. 

ഇംഗ്ലിഷും ഉറുദുവും കൂടാതെ സന്താളി ഭാഷയിൽ വരെ കവിതാപരിഭാഷകളുണ്ട്. പുതിയ ഇംഗ്ലിഷ് പുസ്തകങ്ങളിലൊരെണ്ണം പൗരത്വനിയമത്തിനെതിരെ ഉള്ളതാണ്.തലക്കെട്ടും കവർചിത്രവും മുതൽ പുസ്തകത്തിന്റെ എല്ലാക്കാര്യങ്ങളിലും അതീവശ്രദ്ധ പുലർത്തുന്നയാളാണു മമതയെന്നു പ്രസാധകരായ ഡേയ്സ് പബ്ലിഷിങ് പറയുന്നു.  

English Summary : West Bengal CM Mamata Banerjee Scores Century With Books