‘എംടി കാലം – നവതിവന്ദനം’ 22ന് കൊച്ചിയിൽ; മമ്മൂട്ടിയും മോഹൻലാലും ആദരമർപ്പിക്കും

കൊച്ചി ∙ മലയാളത്തിന്റെ ഇതിഹാസ സാഹിത്യകാരൻ എം.ടി.വാസുദേവൻ നായർക്ക് നവതിയാദരമർ‌പ്പിച്ച് മനോരമ ഓൺലൈൻ. ഡിസംബർ 22 ന് വൈകിട്ട് അ‍ഞ്ചിനു കൊച്ചിയിൽ നടക്കുന്ന ‘എംടി കാലം – നവതിവന്ദനം’ എന്ന പരിപാടിയിൽ മമ്മൂട്ടിയും മോഹൻലാലുമാണ് മലയാളത്തിന്റെ മഹാസാഹിത്യകാരന് ആദരമർപ്പിക്കുന്നത്. ജോയ്ആലുക്കാസിന്റെ സഹകരണത്തോടെ നടത്തുന്ന നവതിവന്ദനത്തിന് മുത്തൂറ്റ് ഫി‌നാൻസാണ് പിന്തുണ നൽകുന്നത്. 

ഹോട്ടൽ ലേ മെറിഡിയനിൽ‌ നടക്കുന്ന ആദരണച്ചടങ്ങിന്റെ ഭാഗമായ ദൃശ്യവിരുന്നിൽ ചലച്ചിത്രതാരവും നർത്തകിയുമായ ശോഭന അവതരിപ്പിക്കുന്ന നൃത്തപരിപാടി, ചലച്ചിത്ര പിന്നണിഗായകരായ വിധുപ്രതാപും രാജലക്ഷ്മിയും അവതരിപ്പിക്കുന്ന ഗാനാഞ്ജലി, എംടി കഥാപാത്രങ്ങളെ കോർത്തിണക്കി പ്രശസ്ത നാടകപ്രവർത്തകൻ പ്രശാന്ത് നാരായണൻ അവതരിപ്പിക്കുന്ന നാടകം ‘മഹാസാഗരം’ എന്നിവയുമുണ്ടാകും. മലയാള സിനിമാ, സാഹിത്യ, സാംസ്കാരിക, രാഷ്ട്രീയ രംഗങ്ങളിലെ പ്രമുഖർ പങ്കെടുക്കും. 

മനോരമ ബുക്സ് പുറത്തിറക്കുന്ന എംടി കൃതികളുടെ ഓഡിയോ ബുക്കിന്റെ ലോഞ്ചും, എംടിക്ക് നവതിയാദരമായി സമർപ്പിക്കുന്ന ‘എംടി: കാലം കാലാതീതം’ എന്ന പുസ്തകത്തിന്റെ പ്രകാശനവും ചടങ്ങിൽ നടക്കും. പ്രവേശനം ആദ്യം റജിസ്റ്റർ ചെയ്യുന്ന 600 പേർക്കു മാത്രം. റജിസ്ട്രേഷന് www.manoramaonline.com/mt വാട്സാപ് നമ്പർ‌: 99958 11111