അങ്കമാലി ഡയറീസിലെ നായക കഥാപാത്രമായ വിന്‍സെന്റ് പെപ്പെയായി തകര്‍ത്ത് അഭിനയിച്ച ആന്റണി വര്‍ഗീസിന്റെ പുതിയ ചിത്രം സ്വാതന്ത്ര്യം അര്‍ദ്ധരാത്രിയില്‍ ഫസ്റ്റ്ലുക്ക് പുറത്തിറങ്ങി. പൃഥ്വിരാജ് ആണ് പോസ്റ്റർ ഔദ്യോഗികമായി പുറത്തിറക്കിയത്. പരുക്കൻ ഗെറ്റപ്പിലുള്ള ആന്റണിയുടെ ലുക്ക് തന്നെയാണ് പ്രധാനആകർഷണം. ആക്‌ഷന്‍ ത്രില്ലർ ഗണത്തിൽപ്പെടുന്ന ചിത്രത്തിൽ കോട്ടയംകാരനായാണ് ആന്റണി എത്തുക.
ലിജോ ജോസ് പല്ലിശ്ശേരിയുടെ അസ്സോസ്സിയേറ്റ് ആയിരുന്ന ടിനു പാപ്പച്ചനാണ് ചിത്രം സംവിധാനം ചെയ്യുന്നത്. അങ്കമാലി ഡയറീസിന്റെ ചീഫ് അസോസിയേറ്റായിരുന്നു ടിനു പാപ്പച്ചന്‍. ദിലീപ് കുര്യന്‍ തിരക്കഥ ഒരുക്കുന്നു.
ബി ഉണ്ണികൃ‍ഷ്ണന്‍ ആദ്യമായി നിർമിച്ച് അവതരിപ്പിക്കുന്ന ചിത്രം കൂടിയാണിത്. നിർമാണത്തില്‍ ബി.സി ജോഷിയും പങ്കാളിയാണ്. ലിജോ ജോസ് പല്ലിശ്ശേരിയും ചെമ്പന്‍ വിനോദ് ജോസും ചിത്രത്തിന്റെ സഹനിര്‍മ്മാതാക്കളാണ്.
അങ്കമാലി ഡയറീസിലെ വില്ലൻ കഥാപാത്രമായ യു ക്ലാംപ് രാജനെ അവതരിപ്പിച്ച ടിറ്റൊ വിൽസൺ ഒരു പ്രധാനവേഷത്തിൽ എത്തുന്നുണ്ട്.
ഫിനാന്‍സ് കമ്പനി മാനേജരായ കോട്ടയംകാരന്‍ യുവാവിനെയാണ് ആന്റണി അവതരിപ്പിക്കുന്നത്. ഒരു രാത്രിയിലെ സംഭവം അവന്റെ ജീവിതം മാറ്റി മറിക്കുന്നതും ആ പ്രശ്‌നം പരിഹരിക്കാന്‍ നടത്തുന്ന ശ്രമങ്ങളുമാണ് ചിത്രത്തിന്റെ ഇതി വൃത്തം. കോട്ടയം, മംഗലാപുരം, ഓസ്‌ട്രേലിയ എന്നിവിടങ്ങളാണ് പ്രധാനലൊക്കേഷൻ.
