ശ്രീദേവിയുടെ മകൾ ജാൻവിയുടെ അരങ്ങേറ്റ ചിത്രം ധടക്കിലെ ആദ്യ വിഡിയോ ഗാനം പുറത്തിറങ്ങി. ശശാങ്ക് ഖൈയ്ത്താൻ സംവിധാനം ചെയ്യുന്ന ചിത്രത്തിൽ ഷാഹിദ് കപൂറിന്റെ സഹോദരൻ ഇഷാനാണ് നായകനാകുന്നത്. പ്രശസ്ത സംവിധായകൻ കരൺ ജോഹർ ആണ് നിർമാണം.
അജയ്–അതുൽ സംഗീതം കൊടുത്തിരിക്കുന്ന ചിത്രത്തിന്റെ ടൈറ്റിൽ ഗാനമാണ് പുറത്തിറങ്ങിയിരിക്കുന്നത്. അമിതാബ് ഭട്ടാചാര്യയാണ് വരികൾ എഴുതിയിരിക്കുന്നത്. ശ്രേയാ ഘോഷാലും അജയ് ഗോഗാവാലെയും ചേർന്നാണ് ഇൗ ഗാനം ആലപിച്ചിരിക്കുന്നത്. ഗാനരംഗങ്ങളിൽ അതിസുന്ദരിയായാണ് ജാൻവി എത്തുന്നത്.
ധടക് സിനിമയുടെ ഷൂട്ടിങിനിടെയാണ് ശ്രീദേവിയുടെ അപ്രതീക്ഷിത വിടവാങ്ങൽ ഉണ്ടാകുന്നത്. അമ്മയുടെ മരണശേഷം മാനസികമായി തളർന്ന ജാൻവി പിന്നീട് സിനിമയുടെ ചിത്രീകരണം പൂർത്തിയാക്കുകയായിരുന്നു. ജാൻവിയെ വെളളിത്തിരയിൽ എത്തിക്കാൻ വന്ന പ്രമുഖ ബാനറുകളുടെയും ഓഫർ നിരസിച്ചാണ് ശ്രീദേവി 'ധടകിനായി സമ്മതം മൂളിയത്.
