‘അഞ്ചാം പതിപ്പിൽ ഞാനില്ല, പക്ഷേ ആ ട്യൂൺ ഉണ്ടാകും’; മാറ്റങ്ങളെ സ്വാഗതം ചെയ്ത് ശ്യാം

മലയാള കുറ്റാന്വേഷണ സിനിമകളിലെ എക്കാലത്തെയും മികച്ച സീരീസായ സിബിഐ ഡയറിക്കുറിപ്പിന്റെ അഞ്ചാം വരവിലെ ടീസർ ചെന്നൈയിലെ വസതിയിലിരുന്ന് കൗതുകപൂർവം വീക്ഷിക്കുകയാണ് സംഗീതസംവിധായകൻ ശ്യാം. കഴിഞ്ഞ നാലു സീരീസിലും ഈ ടീമിനൊപ്പം ശ്യാമും ഉണ്ടായിരുന്നെങ്കിലും ഇത്തവണ ശ്യാമിന് പകരം ജേക്സ് ബിജോയ് ആണ് സംഗീതവിഭാഗം കൈകാര്യം ചെയ്യുന്നത്. ഈ മാറ്റത്തെ സ്വാഗതം ചെയ്യുന്നുവെന്ന് ശ്യാം പറഞ്ഞു. ഒപ്പം, ചെറിയ നിർദേശങ്ങളും. 

വർഷങ്ങൾക്കിപ്പുറവും ശ്യാമിന്റെ പ്രതിഭയിൽ ഒരുക്കപ്പെട്ട പ്രശസ്തമായ സിബിഐ തീം മ്യൂസിക് സൃഷ്ടിച്ച ആവേശത്തിന് ഒട്ടും കുറവ് സംഭവിച്ചിട്ടില്ലെന്ന് പുതിയ ടീസറിന് ലഭിക്കുന്ന പ്രതികരണങ്ങളിൽ നിന്നു വ്യക്തം. കൊച്ചുകുട്ടികളെ പോലും ആകർഷിക്കുന്ന ആ തീം മ്യൂസിക് ഒരിക്കൽ കൂടി ശ്യാം തന്റെ കീബോർഡിൽ വായിച്ചു. 

എസ്.എൻ. സ്വാമിയുടെ തിരക്കഥയിൽ കെ. മധു തന്നെയാണ് അഞ്ചാംവട്ടവും മമ്മൂട്ടിയുടെ സേതുരാമയ്യരെ വെള്ളിത്തിരയിലെത്തിക്കുന്നത്. സ്വർ​ഗചിത്ര അപ്പച്ചനാണ് നിർമാണം. മലയാള സിനിമയിൽ നിരവധി ബ്ലോക്ക് ബസ്റ്റർ ഹിറ്റുകൾ സമ്മാനിച്ച സ്വർഗചിത്രയുടെ വർഷങ്ങൾക്കു ശേഷമുള്ള ശക്തമായ തിരിച്ചുവരവ് കൂടിയാണ് ചിത്രം.

സേതുരാമയ്യർ സീരീസിലെ മുൻപിറങ്ങിയ നാലു ഭാഗങ്ങളും സൂപ്പർഹിറ്റുകളായിരുന്നു. 1988-ൽ ഒരു സിബിഐ ഡയറിക്കുറിപ്പ് എന്ന പേരിലായിരുന്നു ആദ്യ വരവ്. 1989–ൽ ജാഗ്രത എന്ന പേരിൽ രണ്ടാംവട്ടവും സേതുരാമയ്യരെത്തി. 2004-ൽ സേതുരാമയ്യർ സിബിഐ, 2005-ൽ നേരറിയാൻ സിബിഐ എന്നീ ചിത്രങ്ങളും എത്തി. നാലുഭാഗങ്ങളും പ്രദർശനവിജയം നേടിയ മലയാളത്തിലെ തന്നെ അപൂർവചിത്രമെന്ന റെക്കോർഡും സേതുരാമയ്യർക്ക് സ്വന്തമാണ്. 13 വർഷങ്ങൾക്കിപ്പുറമാണ് ചിത്രത്തിന്റെ അഞ്ചാം ഭാഗമൊരുങ്ങുന്നത്.