അമ്പമ്പോ എന്തൊരു കുതിപ്പ്! സോഷ്യൽ മീഡിയ കത്തിച്ച് ശ്രീലീല; കോടികൾ കടന്ന് പുഷ്പയിലെ ഹോട്ട് നമ്പർ

‘പുഷ്പ 2’ല്‍ തെലുങ്കിലെ ഡാൻസിങ് ക്വീൻ ശ്രീലീല ആറാടിയ ഐറ്റം നമ്പർ യൂട്യൂബിൽ തരംഗമാകുന്നു. ‘കിസിക്’ എന്നു പേരിട്ടിരിക്കുന്ന പാട്ട് പുറത്തിറങ്ങി മണിക്കൂറുകൾക്കകം 2 കോടിയിലേറെ പ്രേക്ഷകരെ നേടി. മികച്ച പ്രതികരണങ്ങളോടെ പാട്ട് ട്രെൻഡിങ്ങിലും ഇടം പിടിച്ചു. പാട്ടിലെ ശ്രീലലയുടെ പ്രകടനം ചർച്ചയാവുകയാണ്. 

ദേവി ശ്രീ പ്രസാദ് ആണ് കിസിക്കിന് ഈണമൊരുക്കിയത്. സുഭലഷിണി ഗാനം ആലപിച്ചു. ചന്ദ്രബോസിന്റേതാണു വരികൾ. പാട്ടിന്റെ ലിറിക്കൽ വിഡിയോ ആണ് അണിയറപ്രവർത്തകർ പുറത്തിറക്കിയത്. വിഡിയോ പതിപ്പിനു വേണ്ടി കാത്തിരിക്കുകയാണ് ആരാധകർ. ഏതാനും ദിവസങ്ങൾക്കു മുൻപ് പുറത്തിറങ്ങിയ പാട്ടിന്റെ പ്രമോ വിഡിയോ അരക്കോടിക്കടുത്ത് പ്രേക്ഷകരെ സ്വന്തമാക്കിയിരുന്നു. 

‘പുഷ്പ’യിലെ ഹോട്ട് നമ്പറിനായി ശ്രീലീല 3 കോടിയാണ് പ്രതിഫലമായി വാങ്ങുന്നത്. ‘ഗുണ്ടൂര്‍ കാരം’ എന്ന ചിത്രത്തിലെ കുര്‍ച്ചി മടത്തപ്പെട്ടി എന്ന ഗാനത്തിലൂടെ പ്രേക്ഷശ്രദ്ധ നേടിയ നടിയാണ് ശ്രീലീല. ‘പുഷ്പ’ ഒന്നാം ഭാഗത്തിൽ നടി സമാന്തയാണ് ഐറ്റം ഡാൻസുമായി എത്തിയത്. ‘ഊ അന്തവാ...’ എന്ന ഹോട്ട് നമ്പറിനു വേണ്ടി നടി 5 കോടി രൂപ പ്രതിഫലം വാങ്ങിയിരുന്നു.