കാർ ഉൽപാദനം ഉയരുന്നില്ല

മുംബൈ∙ ഇലക്ട്രോണിക് ഘടകങ്ങളുടെ ലഭ്യതക്കുറവ് വാഹന നിർമാണത്തെ ബാധിക്കുന്നതു തുടരുന്നു. കഴിഞ്ഞ മാസവും പ്രമുഖ കാർ കമ്പനികളുടെ ഉൽപാദനം കുറയുകയായിരുന്നു. മാരുതി സുസുകിയുടെ മൊത്തവിൽപന കഴിഞ്ഞ വർഷം ജനുവരിയെ അപേക്ഷിച്ച് 8% കുറഞ്ഞ് 1,36,442 എണ്ണം ആയി. ഹ്യുണ്ടായിയുടേത് 15.35% ഇടിവോടെ 44,022 ആയി. മഹീന്ദ്ര 19,664 കാറുകളും (3.25% കുറവ്) ടൊയോട്ട 7328 കാറും (ഇടിവ് 34%) വിറ്റു. ഹോണ്ട 10427 കാർ വിറ്റു. 7.88% ഇടിവ്.

ടാറ്റ, സ്കോഡ, കിയ, എംജി എന്നിവ വിൽപനയിൽ, പക്ഷേ ഈ ട്രെൻഡ് മറികടന്നു. ടാറ്റയുടെ വിൽപന 2021 ജനുവരിയിലേതിനെക്കാൾ 51% വർധനയോടെ 40,777 എണ്ണമായി. ഇതിൽ 2892 എണ്ണം വൈദ്യുതകാറുകളാണ്. കിയ വിറ്റത് 19319 കാറുകളാണ്. വർധന 1.38%. സ്കോഡയുടെ വിൽപന മൂന്നിരിട്ടിയായി. 3009 കാറാണ് കഴിഞ്ഞ മാസം വിറ്റത്. എംജി 20% വർധനയോടെ 4306 കാറുകൾ വിറ്റു.

Content highlights: Car sale