ബെൻസ് കാറുകൾ കൊല്ലത്ത് കുതിച്ചു പാഞ്ഞ കാലം; കശുവണ്ടിക്കച്ചവടം കണ്ടുപഠിച്ച് ഹിറ്റാക്കി വിയറ്റ്നാം, കേരളമോ?

ലാഭ മാർജിൻ കുറഞ്ഞുവെന്നതാണു വസ്തുത. ഇവിടുത്തെ സംസ്ക്കരണ ചെലവും വിയറ്റ്നാമിൽ നിന്നുള്ള മൽസരവും സർക്കാരിന്റെ നിഷേധാത്മക നയവും നികുതികളും തോട്ടണ്ടി ഇറക്കുമതി ചുങ്കവുമെല്ലാം ചേർന്ന് കശുവണ്ടി വ്യവസായത്തെ അട്ടിമറിച്ചു. തോട്ടണ്ടി ആഫ്രിക്കൻ രാജ്യങ്ങളിൽനിന്നാണ് ഇറക്കുമതി ചെയ്യുന്നത്. ഘാന, ടാൻസാനിയ, ഐവറി കോസ്റ്റ്... തോട്ടണ്ടി സംസ്ക്കരിച്ചാൽ പരമാവധി 25% പരിപ്പ് മാത്രമേ കിട്ടൂ. പക്ഷേ തോട്ടണ്ടിക്ക് ഇറക്കുമതിച്ചുങ്കം വന്നതോടെ വിദേശത്തെ മൽസരത്തെ അതിജീവിക്കാൻ കഴിയാതായി.

കപ്പലിലൂടെ കയറ്റുമതിക്ക് 5% കയറ്റുമതിച്ചുങ്കവും വന്നു. ബാങ്ക് വായ്പാ പലിശയിൽ ഡിസ്ക്കൗണ്ട് ലഭിക്കുന്ന ആനുകൂല്യവും നിലച്ചു. ഇന്നു കൊല്ലത്തെ കശുവണ്ടി വ്യവസായികൾ വിദ്യാഭ്യാസ സ്ഥാപനങ്ങളിലേക്കും മറ്റ് അനേകം ബിസിനസുകളിലേക്കും മാറിയിരിക്കുന്നു. അങ്ങനെ മാറാൻ കഴിയാത്തവർ പാപ്പരായി. പഴയ പ്രതാപം മാത്രം പറഞ്ഞിരിക്കുന്നവരുമുണ്ട്. മംഗലാപുരത്ത് യന്ത്രവൽകൃത സംസ്ക്കരണം നടക്കുന്ന അനേകം നവീന ഫാക്ടറികളും കൂടി എത്തിയതോടെ കൊല്ലത്തിന്റെ കാഷ്യു കഥ കഴിഞ്ഞു.

∙ വിയറ്റ്നാമിന്റെ വരവ്

അമേരിക്കയിലും യൂറോപ്പിലും മാന്ദ്യം വരുന്നല്ലോ, അത് കശുവണ്ടി വ്യവസായത്തെ ബാധിക്കുമോ എന്നു ചോദിച്ചാൽ? അതിന് കേരളത്തിൽനിന്ന് യുഎസിലേക്കും യൂറോപ്പിലേക്കും കശുവണ്ടി കയറ്റുമതി ഉണ്ടായിട്ടു വേണ്ടേ എന്നാണു മറുപടി. വിയറ്റ്നാമിൽ നിന്നാണ് അവിടങ്ങളിലേക്കു കശുവണ്ടിയുടെ വരവ്. ഇവിടെ കശുവണ്ടി കിലോ 650 രൂപയ്ക്കു കയറ്റുമതി ചെയ്യുമ്പോൾ വിയറ്റ്നാം 457 രൂപയ്ക്ക് ചെയ്യുന്നു. അവിടെ സർവ സർക്കാർ ആനുകൂല്യങ്ങളും കിട്ടുന്നു. തോട്ടണ്ടിക്ക് വിയറ്റ്നാമിൽ ഇറക്കുമതിച്ചുങ്കവുമില്ല. പോരെങ്കിൽ, കോവിഡ്കാലത്ത് സർവ കശുവണ്ടി ഫാക്ടറികളും അടയ്ക്കാൻ നിർബന്ധിതമായപ്പോൾ വിയറ്റ്നാമിൽ അവ തുറന്നിരുന്നു. കയറ്റുമതി വ്യവസായത്തെ അവർ കോവിഡ് നിയന്ത്രണങ്ങളിൽനിന്ന് ഒഴിവാക്കി. നമ്മളാകട്ടെ 2020 മാർച്ച് മുതൽ അടച്ചിട്ടു. അതോടെ പല വിദേശ വിപണികളും നഷ്ടമായി.

ഇന്ത്യൻ കശുവണ്ടിക്ക് ജപ്പാൻ ഇപ്പോൾ പ്രധാന വിപണിയാണ്. വിയറ്റ്നാം കശുവണ്ടി കുറേശ്ശെ ജപ്പാനിലേക്ക് എത്തുന്നുണ്ട്. ഇനി അതും വിയറ്റ്നാം കൊണ്ടു പോകുമോ എന്നാണ് ആശങ്ക. ഗൾഫ് രാജ്യങ്ങളാണ് നമ്മുടെ കശുവണ്ടിയുടെ മറ്റൊരു പ്രധാന വിപണി. വിയറ്റ്നാമിൽനിന്ന് നമ്മൾ കശുവണ്ടി ഇറക്കുമതി ചെയ്തിരുന്ന കാലമുണ്ടായിരുന്നു. എൺപതുകളിൽ വിയറ്റ്നാമിൽനിന്നു വന്ന കയറ്റുമതി ഏജന്റുമാർ ഇവിടെ അണ്ടിയാപ്പീസുകളിൽ പോയി കണ്ടു പഠിച്ച് അവിടെ തുടങ്ങി. ഒടുവിൽ അവർ നമ്മളെ കവച്ചു വച്ച് ലോകത്തെ ഒന്നാം നമ്പർ കയറ്റുമതിക്കാരായി. 

പറങ്കികളാണ് (പോർച്ചുഗീസുകാർ) ബ്രസീലിൽനിന്ന് ആദ്യമായി കശുവണ്ടി ഇന്ത്യയിലെത്തിച്ചത്. ആദ്യം ഗോവയിലും പിന്നെ മലബാർ തീരത്തും. 1920കളിൽ കൊല്ലത്തു കുടിയേറിയ റോച്ച വിക്ടോറിയ എന്ന ശ്രീലങ്കക്കാരനാണത്രെ കശുവണ്ടി സംസ്ക്കരണം ആദ്യമായി ആരംഭിച്ചത്. ഡബ്ല്യു.ടി. ആൻഡേഴ്സൺ എന്ന ബ്രിട്ടിഷ് കമ്പനി അതിനു ശേഷംവന്നു. അവരാണ് ആദ്യം കയറ്റുമതി തുടങ്ങിയത്. അവരെ കണ്ടു പഠിച്ചാണ് കൊല്ലമാകെ കാഷ്യു പടർന്നത്.

∙ ഉൽപാദനമെത്ര, തീറ്റയെത്ര?

ഇനി ആദ്യം പറഞ്ഞ പോയിന്റിലേക്കു വരാം. ഇന്ത്യയാണോ ലോകത്ത് ഏറ്റവും കൂടുതൽ കശുവണ്ടി തിന്നുന്ന രാജ്യം? ഇന്ത്യയിലേക്ക് ഏകദേശം 12 ലക്ഷം മുതൽ‍ 15 ലക്ഷം ടൺ വരെ തോട്ടണ്ടിയാണ് ഇറക്കുമതി. 12 ലക്ഷം ടൺ തോട്ടണ്ടി എന്നു കണക്കാക്കുക. സംസ്ക്കരിക്കുമ്പോൾ കുറഞ്ഞത് 20% പരിപ്പ് കിട്ടുന്നു. അപ്പോൾ 2.4 ലക്ഷം ടൺ പരിപ്പ്. ആന്ധ്രയിലും കർണാടകയിലും ഗോവയിലും മറ്റും കശുമാവ് കൃഷിയുണ്ട്. ഏകദേശം 5 ലക്ഷം ടൺ തോട്ടണ്ടി കിട്ടുമായിരിക്കും. അതു സംസ്ക്കരിച്ചാൽ 1 ലക്ഷം ടൺ പരിപ്പ്. അങ്ങനെ ആകെ ഉത്പാദനം 3.4 ലക്ഷം ടൺ പരിപ്പ്.

പക്ഷേ ഇന്ത്യയുടെ കശുവണ്ടിപ്പരിപ്പ് കയറ്റുമതി 32,000 ടൺ മാത്രം. ഏകദേശം 2000 കോടി രൂപയുടെ. ബാക്കി 3 ലക്ഷം ടണ്ണിലേറെ കശുവണ്ടി എവിടെ പോകുന്നു? ഇന്ത്യാക്കാരുടെ വയറ്റിലേക്ക് പോകുന്നു. വർഷം 20,000 കോടിയുടെ കശുവണ്ടിയാണു തിന്നു തീർക്കുന്നത്!!!  നമുക്ക് പായസത്തിനും ലഡുവിനും മധുരപലഹാരങ്ങൾക്കും ബിസ്ക്കറ്റിനും ഇറച്ചിക്കറിക്കുമെല്ലാം കശുവണ്ടി വേണമല്ലോ. ഉത്തരേന്ത്യൻ വിഭവങ്ങളിലും കശുവണ്ടി പ്രധാനമാണ്. അങ്ങനെ ഇവിടുത്തെ ആഭ്യന്തര വിപണി വളരെ വലുതാണ്. 140 കോടി ജനം ഉള്ളതിനാൽ അതിൽ അദ്ഭുതവുമില്ല. ഇന്ത്യ തന്നെയാണ് ലോകത്ത് ഏറ്റവും കൂടുതൽ തോട്ടണ്ടി ഇറക്കുമതി ചെയ്യുന്ന രാജ്യവും. രണ്ടാം സ്ഥാനം വിയറ്റ്നാം. അവർക്ക് സ്വന്തം രാജ്യത്ത് ഉത്പാദനം കൂടുതലാണ്. 

∙ പൊതുമേഖലയിൽ വെറും പടം

കശുവണ്ടി വികസനകോർപ്പറേഷനും കാപ്പക്സിനും കൂടി നാൽപ്പതോളം ഫാക്ടറികളുണ്ട്. കോർപ്പറേഷൻ ഫാക്ടറികളിൽ 10,000 പേരും കാപ്പക്സിൽ 5000 പേരും ഉൾപ്പടെ 15,000 തൊഴിലാളികൾ. നിലനിൽക്കുന്നത് സർക്കാർ ഫണ്ട്കൊണ്ട് മാത്രം. തോട്ടണ്ടി  ഇറക്കുമതിക്ക് സർക്കാർ നൽകുന്ന കോടികൾ വൻതോതിൽ വെട്ടിച്ചതിന് സിബിഐ കേസുണ്ട്. പിരിഞ്ഞു പോകുന്നവരുടെ ആനുകൂല്യങ്ങൾക്കും സർക്കാർ പണം നൽകണം. അങ്ങനെ എത്രനാൾ നിലനിൽക്കും? യന്ത്രവൽക്കരണമില്ല, കശുമാവ് കൃഷി കുറയുന്നു, ട്രേഡ് യൂണിയനുകൾ സഹായകരമല്ല, സർക്കാരിന്റെ അമിത ഇടപെടൽ... എല്ലാം ചേർന്ന് കശുവണ്ടി വ്യവസായത്തെ തകർത്തു. കേന്ദ്ര സർക്കാരിനാകട്ടെ ഇങ്ങനെയൊരു വ്യവസായം ഇവിടെയുണ്ടെന്ന പരിഗണന പോലുമില്ല. കയർ പോലെ കശുവണ്ടിയും പരമ്പരാഗത വ്യവസായം എന്ന പേരും ഗതകാല പ്രതാപവും മാത്രം ബാക്കിയാക്കി പതിയെ കാലയവനികയ്ക്കുള്ളിൽ മറയുകയാണ്.

English Summary: How Kollam Lost its Cashew Capital Status?